एजेन्सी । इंग्लिश प्रिमियर लिग फुटबलको म्यानचेस्टर डर्बी भिडन्तमा सिटीले सहज जित निकालेको छ । आइतबार राति भएको डर्बी भिडन्तमा सिटीले युनाइटेडलाई ३ - १ ले पराजित गरेको हो ।
घरेलु मैदानमा सिटीलाई जित दिलाउन डेभिड सिल्भा, सर्जियो अग्युरो र गुन्डोगानले एक एक गोल गरे । युनाइटेडका एन्थोनी मार्सियलले एक गोल फर्काए ।
इतिहाद स्टेडियममा सिटीले खेलको १२ औं मिनेटमा सिल्भाको गोलबाट सुरुवाती अग्रता बनाएको थियो । खेलको ४८ औं मिनेटमा अग्युरोले गोल गर्दै सिटीको अग्रता दोब्बर बनाए ।
खेलको ५८ औं मिनेटमा मार्सियलले पेनाल्टीमा गोल गर्दै युनाइटेडलाई खेलमा फर्काउन कोशिस गरे । तर, खेलको ८६ औं मिनेटमा गुन्डोगानले गोल गर्दै सिटीलाई ३ - १ को सहज जित दिलाए ।
जितसंगै सिटी लिगको शीर्ष स्थानमा उक्लिएको छ । सिटीले १२ खेलबाट ३२ अंक जोडेको छ । सिटीले लिभरपुललाई २ अंकले पछि पार्दै शीर्ष स्थान उक्लिएको हो । पराजित युनाइटेड २० अंक जोडेर लिगको आठौं स्थानमा छ ।
