जावलाखेलले मनायो भलिबल दिवस

काठमाडौं । जावलाखेल भलिबल प्रशिक्षण केन्द्र र पूर्व राष्ट्रिय तथा अन्तर्राष्ट्रिय महिला भलिबल खेलाडी फाउण्डेसनको संयुक्त आयोजनामा आइतबार भलिबल दिवस मनाईएको छ ।

जावलाखेलले आफ्नै नवर्निमित कभर्डहलमा कार्यक्रम गरि भलिबल दिवस मनाएको हो ।

दिवसको अवसरमा पूर्व खेलाडी र सञ्चारकर्मीबीच मैत्रीपूर्ण खेल आयोजना गरिएको थियो ।  यस्तै दिवसको अवसरमा केक काटिएको थियो।

कार्यक्रममा भलिबल संघका उपाध्यक्ष निरोज मास्के, महासचिव जितेन्द्र बहादुर चन्द लगायत पूर्व खेलाडी तथा प्रशिक्षकहरु सहभागी थिए ।

कार्यक्रमलाई सम्बोधन गर्दै भलिबल संघकी उपाध्यक्ष मास्केले राष्ट्रिय खेल भएपनि राज्यले भलिबल खेलमा लगानी नगरेको बताईन् । उनले सबैको सहयोग र सहकार्यमा यस खेलको विकास गर्नुपर्ने धारणा राखिन् । 

नेपालमा जेठ ८ गते भलिबल दिवस मनाउने गरिन्छ ।  

सरकारले भलिबललाई राष्ट्रिय खेल घोषणा गरेको दिनको सम्झनामा नेपालमा भलिबल दिवस मनाउने गरिएको हो ।

नेपाल भलिबल संघले भने औपचारिक कार्यक्रमको आयोजना गरेन ।

तत्कालिन प्रधानन्त्री पुष्पकमल दाहाल (प्रचण्ड) नेतृत्वको सरकारले २०७४ साल जेठ ८ गते भलिबललाई राष्ट्रिय खेलको मान्यता दिएको थियो ।

युवा तथा खेलकुद मन्त्री दलजित श्रीपाईलीको पहलमा मन्त्रीपरिषदबाट भलिबललाई राष्ट्रिय खेलको रुपमा घोषणा गरिएको थियो ।

सोही दिनको सम्झनामा नेपाल भलिबल संघले जेठ ८ गतेलाई भलिबल दिवसमा अवसरमा मनाउन सुरु गरेको हो ।

भलिबललाई राष्ट्रिय खेलको रुपमा घोषणा गरेको सरकारले राष्ट्रिय खेलकुद विधेयकमै यसलाई समावेश गरेको छ । नेपालको राष्ट्रिय खेलको रुपमा भलिबल हुने व्यवस्था विधेयकमा उल्लेख गरिएको छ ।

सो विधेयक संघीय संसदका दुवै सदनबाट पारित भएर राष्ट्रपतिबाट समेत प्रमाणिकरण भएको छ ।

घरेलु खेलकुदमा पछिल्लो समय भलिबल लोकप्रिय खेलको रुपमा अगाडी आएको छ । भौगोलिक हिसाबले देशको सबै भागमा खेल्न सकिने र लोकप्रिय खेलको रुपमा रहेको भलिबललाई राष्ट्रिय खेल बनाउन भलिबल संघले समेत तिव्र लबिङ गरेको थियो ।