भलिबल संघ र जनरल इन्स्योरेन्सबीच सम्झौता

काठमाडौं । नेपाल भलिबल संघले बीमा कम्पनी जनरल इन्स्योरेन्ससँग सम्झौता गरेको छ ।  

संघले छैटौं संस्करणको आरबीबी-एनभीए राष्ट्रिय महिला तथा पुरुष क्लब भलिबल लिगका लागि जनरल इन्स्योरेन्ससँग सम्झौता गरेको हो ।

संघका उपाध्यक्ष निरोज मास्के र इन्स्योरेन्सका सीइओ रामचन्द्र श्रेष्ठले सम्झौता पत्रमा हस्ताक्षर गरे ।

सम्झौतासँगै प्रतियोगितामा सहभागी खेलाडी र अफिसियलको बीमा जनरल इन्स्योरेन्सले गरेको छ  । कम्पनीले करिब ९ करोड बराबर रुपैयाँको बिमा खेलाडी र अफिसियललाई उपलब्ध गराएको हो ।

इन्स्योरेन्स कम्पनीका अनुसार प्रत्येक खेलाडी तथा अफिसियलले व्यक्तिगत ५ लाख रुपैयाँको बिमा सेवा प्राप्त गर्नेछन् । 

जनरल इन्स्योरेन्सले यसअघि गत चैतमा पाल्पाको रानीमहलमा भएको सञ्जय स्मृति राष्ट्रिय बीच भलिबल प्रतियोगितामा सहभागी खेलाडी तथा अफिसियलको समेत बिमा गरेको थियो ।
 
छैटौं संस्करणको क्लब भलिबल लिग बैशाख १८ देखि २४ गतेसम्म हुनेछ ।

राष्ट्रिय खेलकुद परिषद (राखेप) को कभर्डहलमा आयोजना हुने लिगमा पुरुषतर्फ ७ टिम र महिलातर्फ ५ टिमको सहभागिता रहने छ ।

पुरुषतर्फ त्रिभुवन आर्मी क्लब, नेपाल पुलिस क्लब, एपीएफ क्लब, हेल्प नेपाल, गण्डकी प्रदेश, गल्कोट स्पोर्ट्स क्लब र ढोरपाटन क्लब रहेको छ ।

महिलातर्फ त्रिभुवन आर्मी क्लब, नेपाल पुलिस क्लब, एपीएफ क्लब, न्यु डायमण्ड र एभरेस्ट मावि रहेको छ ।

हरेक टोलीले ३ विदेशी खेलाडी राख्न पाउने छन् ।

यस संस्करणमा पुरस्कार राशीमा वृद्धि गरिएको छ ।

विजेताले ६ लाख, उपविजेताले ३ लाख, तेस्रोले १ लाख ५० हजार र चौंथोले ७५ हजार प्राप्त गर्ने छन्  । 

सर्वोत्कृष्ट पुरुष तथा महिला खेलाडीले जनही ३५/३५ हजार  पाउँदा व्यक्तिगत विधा तर्फ उत्कष्ट सेटर, ब्लकर सर्भर, स्पाईकर, लिवेरो र प्रशिक्षकले जनही १५/१५ हजार प्राप्त गर्नेछन् ।