पोखरा । एक्स्पर्ट धनगढी ब्लुजका कप्तान दिपेन्द्र सिंह ऐरीले पोखरामा जारी नमस्ते पोखरा प्रिमियर लिग (पीपीएल) टी–ट्वान्टी क्रिकेटको अन्तिम खेल जितेर प्रतियोगिताको प्ले अफमा पुग्ने बताएका छन् ।
बिहिबार भएको चौथो खेलमा बुटवल ब्लास्टर्सलाई हराएपछि धनगढीका कप्तान दिपेन्द्रले अन्तिम खेल जित्दै प्लेअफमा पुग्ने बताएका हुन् । पोखरा रंगशालामा धनगढीले सोमपाल कामीको बुटवललाई २० रनले हराएको थियो ।
जितपछि कप्तान दिपेन्द्रले भने,'उपाधिबारे भन्न सकिन्न तर हामी उत्कृष्ट पुनरागमन गर्छौं ।'
जितसंगै धनगढीले ४ खेलबाट ४ अंक जोडेको छ । अब धनगढीले अन्तिम खेलमा शुक्रबार पोखरा पल्टनसंग खेल्नेछ ।
यस्तै कप्तान दिपेन्द्रले ड्यानियल लरेन्स र आफ्नो उत्कृष्ट साझेदारी बन्दा टोलीको जित सहज भएको बताए ।
'खेलमा सुुरुआत राम्रो हुन सकेन तर, म र लरेन्सले इनिङ सम्हाल्यौं । सुरुमा विकेट गुमाएपछि हामीले १४—१५ ओभरसम्म खेल्ने योजना गर्यौं,' दिपेन्द्रले भने, 'त्यसैले सिङ्गल सिङ्गल रनमा फोकस गर्यौं । जित हात पार्यौं ।'
धनगढीको जितमा कप्तान दिपेन्द्र र लरेन्सले अर्धशतकीय पारी खेलेका थिए । दुवैले चौथो विकेटको लागि १०८ रनको साझेदारी गरे । लरेन्स ५२ रनमा आउट हुँदा कप्तान दिपेन्द्रले अविजित ५६ रन जोडेका थिए ।
प्रतियोगितामा लगातार दुई खेल गुमाएपछि बुटवलका कप्तान सोमपाल कामीले धेरै गल्ती गर्दा पराजित हुनु परेको बताए ।
'प्रदर्शन राम्रो भयो तर, हामीले खेलमा धेरै गल्ती गर्यौ । उनीहरुले कम गल्ती गरे । हाम्रो गल्ती भनेको महत्वपूर्ण क्याचहरु छुटे,' कप्तान सोमपालले भने ।
यस्तै कप्तान सोमपालले अन्तिम खेलमा रामो प्रदर्शन गर्ने बताए ।
