काठमाडौं । फ्रेन्चाईज क्रिकेट प्रतियोगिता पोखरा प्रिमियर लिग पीपीएल पोखरा रंगशालमा शुक्रबारबाट सुरु भएकाे छ । ६ शहरलाई फ्रेन्चाईज गरेर आयोजना गरिएको प्रतियोगितामा घरेलु क्रिकेटका स्टार सितारादेखि राम्रा विदेशी खेलाडी समेत समावेश गरिएको छ । पहिलो संस्करणको प्रतियोगितामा घरेलु क्रिकेटका नयाँ र पुराना खेलाडीकासाथै सहभागि टोलीले केही नयाँ खेलाडीलाई अवसर दिएका छन् ।
पर्यटकीय नगरी पोखरामा सुरु भएको प्रतियोगिताको पहिलो संस्करणको उपाधि कसले जित्ला त ? करिब दुई हप्ता चल्ने प्रतियोगिता सबै टिमले आफुलाई मैदानमा प्रमाणित गर्न हरसम्भव मेहनत गर्नेछन् ।
पोखरा पल्टन
पोखरा प्रिमियर लिग पीपीएलमा पोखरा पल्टन घरेलु टोली हो । राष्ट्रिय क्रिकेट टिमका आक्रमक ब्याट्सम्यान शरद भेषवाकर मार्की प्लेयर रहेको पोखरालाई उपाधिको प्रमुख दाबेदार मानिएको छ । बिनोद भण्डारी, रोहितकुमार पौडेल जस्ता आक्रमक व्याट्सम्यानको साथ रहेको पोखरामा आसिफ शेख जस्ता युवा खेलाडीको समावेश छन् ।
कप्तान भेषवाकरले राम्रो प्रर्दशन गर्दै सबै टोलीलाई टक्कर दिने आफ्नो लक्ष्य रहेको बताउछन् । पहिलो खेलमा प्रभावशाली जित निकालेर पोखराले उपाधिमा बलियो चुनौती पेश गरिसकेको छ । घरेलु मैदानमा दर्शकको साथ पाएको पोखराको प्रर्दशनमा विदेशी खेलाडी रविइन्द्र सिंह र युएईका मोहमद नविदले प्रर्दशनले समेत धेरै फाईदा पु¥याउनेछ ।
चितवन राईनोज
पीपीएल क्रिकेटमा चितवन राईनोज उपाधिको अर्को दाबेदार टोली हो । राष्ट्रिय टिमका कप्तान पारस खड्का मार्की प्लेयर रहेको टोलीले खेलाडी लिलामी प्रक्रियामा समेत बाजी मारेको थियो । करण केसी, आरिफ शेख जस्ता युवा खेलाडी समावेश टोलीमा शक्ति गौचन जस्ता भेट्रान खेलाडी समावेश छन् ।
दुई भारतीय खेलाडी सन्नी पटेल र समित पटेलको आगमनले चितवन थप बलियो देखिएको छ । नेपाली क्रिकेटको सफलताको पर्याय बनेका कप्तान पारसको नेतृत्वले पहिलो संस्करणको प्रतियोगिता जित्न सक्ने धेरैको अनुमान छ ।
हुलास काठमाण्डौँ रोयल्स
युवा तथा नयाँ खेलाडीको बाहुल्यता रहेको टिम हो, हुलास काठमाडौं । राष्ट्रिय क्रिकेट टिमका उपकप्तान ज्ञानेन्द्र मल्ल मार्की प्लेयर रहेको काठमाडौं रोयल्स पृथु वास्कोटा र नरेश बुढाएर जस्ता अनुभवी खेलाडी समेत समावेश छन् ।
काठमाडौंको बलिङ लाईनलाई अनुभवी स्पिनर बसन्त रेग्मीले सम्हाल्नेछन्, ब्याटिङमा कप्तान ज्ञानेन्द्रले नेतृत्व गर्नेछन् । युवा खेलाडीलाई मौका दिएको काठमाडौंमा अमित श्रेष्ठ, सुमित झा, सुचान श्रेष्ठ लगायतका खेलाडी समावेश छन् । युवा तथा सन्तुलित टिम देखिएको काठमाडौले पीपीएलको उपाधिमा बलियो चुनौती दिने देखिएको छ ।
बुटवल ब्लास्टरर्स
तिव्र गतिका बलर सोमपाल कामी मार्की प्लेयर रहेको बुटल ब्लास्टर्स पीपीएल क्रिकेटको अर्को उपाधि दाबेदार हो । सागर पुन र ललित सिंह भण्डारी जस्ता अलराउण्ड समावेश बुटवलाई प्रतियोगिताको बलियो टोलीमा हेरिएको छ ।
प्रतियोगिताका खेल्न राम्रो तयारी गरेको बुटवलमा रोहन मुस्तफा र चिराग सुरी जस्ता अनुभवी विदेशी खेलाडीको साथ छ । शंकर राना जस्ता युवा खेलाडी समावेश बुटवल प्रतियोगिताको सन्तुलित र बलियो टोली मानिएको छ ।
विराटनगर टाईटन्स
वर्तमान समयमा नेपाली क्रिकेटको सबै भन्दा ठुलो नाम हो, सन्दिप लामिछाने । क्रिकेटबाट विश्वभर नेपाललाई परिचय दिईरहेका सन्दिपले अन्तराष्ट्रिय क्रिकेटमा आफुलाई एक पछि अर्को सफलता दिलाईरहेका छन् ।
उनै सन्दिपले नेतृत्व गरेको विराटनगर प्रतियोगिताको अर्को बलियो टोली हो । राजु रिजाल, सुनिल धमला, राजेश पुलामी मगर, दिपेश श्रेष्ठ, प्रदीप ऐरी, सहाव आलम र जितेन्द्र मुखिया जस्ता घरेलु क्रिकेटका चलेका नाम विराटनगरसंग जोडिएका छन् । युवा तथा अनुभवी खेलाडीले भरिएको विराटनगरले प्रतियोगिताका सबै टिमलाई कडा टक्कर दिने अपेक्षा गरिएको छ । जसमा सन्दिप लामिछानेको लेग स्पिनको फाईदा समेत विराटनगरले उठाउनेछ ।
एक्सपर्ट धनगढी ब्लुज
पछिल्लो समय राष्ट्रिय क्रिकेट टिमले पाएको राम्रा ब्याट्सम्यानमा पर्छन्, दिपेन्द्र सिंह ऐरी । उमेर समुहमा उत्कृष्ट प्रर्दशन गर्दै सिनियर टिममा स्थान बनाएका दिपेन्द्र घरेलु क्रिकेटका जमेका ब्याट्सम्यान हुन् । उनी दिपेन्द्र मार्की प्लेयर रहेको धनगढीलाई पीपीएलको बलियो टोलीको रुपमा हेरिएको छ ।
उमेर समुहमा उत्कृष्ट प्रर्दशन गर्दै राष्ट्रिय टिममा फर्कन प्रतिक्षा गरिरहेको धेरै खेलाडी टोलीमा समावेश छन् । दिलिप नाथ देखि मञ्जित श्रेष्ठ, योगेन्द्र सिंह कार्की, कमल सिंह ऐरी जस्ता भरपर्दा खेलाडी टोलीमा समावेश छन् । इग्ल्यान्डका ब्याटम्यान इयान लरेन्स र डेविड ट्रेगोको आगमनले पीपीएलमा धनगढीले उपाधिमा बलियो चुनौती पेश गर्ने धेरैको अनुमान छ ।
