बेसीसहर । एमसीटीले बेसीसहरमा जारी २९ औं त्रिवेणी कप फुटबल प्रतियोगितामा विजयी सुरुआत गरेको छ ।
मंगलबार भएको खेलमा कामना युवा क्लबलाई पेनाल्टी सुटआउटमा ३-० ले हराउँदै एमसीटीले सुखद सुरुआत गरेको हो ।
निर्धारित समय १-१ गोलको बराबरीमा सकिएपछि खेल पेनाल्टीमा पुगेको थियो ।
पेनाल्टीमा एमसीटीका दिवस छन्त्याल, यक्कु मगर र सुदिप केसीले गोल गरे ।
कामनाका मिन गुरुङ, अजय श्रेष्ठ र संजय श्रेष्ठले पेनाल्टीमा गोल गर्न सकेनन् ।
पेनाल्टी अघि कामनाका संजय श्रेष्ठले ५० औं मिनेटमा गोल गर्दै अग्रता दिलाएका थिए ।
तर, ६५ औं मिनेटमा लक्ष्मण शाहीले गोल गर्दै एमसीटीलाई १-१ गोलको बराबरीमा ल्याएका थिए ।
मंगलबार नै भएको पहिलो खेलमा आयोजक त्रिवेणी युवा क्लबले भिमाद युथ क्लबलाई २-० गोल अन्तरले हराएको थियो ।
यस्तै दोस्रो खेलमा कालिका स्पोर्ट्स एकेडेमीले ब्रिटिश गोर्खालाई १-० गोल अन्तरले हराएको थियो ।
पुस २० गतेसम्म चल्ने प्रतियोगितामा १८ टोलीको सहभागिता रहेको छ ।
प्रतियोगिताको विजेताले ५ लाख र उपविजेताले ३ लाख पाउने आयोजक त्रिवेणी युवा क्लबले जनाएको छ ।
यस्तै सेमिफाइनलमा पराजित टोलीले ५०/५० हजार पाउने छन् ।
सर्वाधिक गोलकर्ता र सर्वोत्कृष्ट खेलाडीले जनही १५ हजार पाउने छन् ।
