काठमाडौं। गत वर्ष इन्टर मिलानका लागि सिरी ‘ए’ जित्नुका साथै अर्जेन्टिनालाई कोपा अमेरिका उपाधि जिताएका लाउटारो मार्टिनेजलाई ‘फ्रान्स फुटबल’को मतमा सातौं स्थान पर्नु मन परेको छैन।
भन्छन्,‘म अझै राम्रो स्थानमा हुने अपेक्षा गरेको थिएँ। निर्णायकहरूको निर्णयलाई सम्मान गर्छु। तर, उत्कृष्ट सिजन बिताएको हुँदा अझ राम्रो स्थान प्राप्त हुनुपर्ने थियो।’
मार्टिनेजका अनुसार प्रचारप्रसारको कमीका कारण यस्तो भएको हुन सक्छ। उनले थपे, ‘सायद व्यक्तित्वको प्रचार कम भएकै कारण यस्तो भएको हो। म सधैं सहखेलाडीहरूका लागि आफ्नो सर्वोत्तम दिन्छु। त्यो नै मेरो काम हो। म लक्ष्य पूरा गर्न चाहन्छु। २८ वर्षको उमेरमा म आफ्नो करियरप्रति सन्तुष्ट छु। बढी चिनिन चाहन्छु। तर, सबैभन्दा पहिला म राम्रो र भद्र व्यक्ति भनेर चिनिन चाहन्छु।’
अर्जेन्टिनाका लागि सर्वाधिक गोल लिओनल मेसीले गरेका छन्। उनले १९४ खेलमा ११४ गोल गरेका छन्। त्यसपछि क्रमशः ग्याब्रिएल बटिस्टुटा (७७ खेलमा ५५), सर्जियो अगुएरो (१०१ खेलमा ४१), हर्नान क्रेस्पो (६४ खेलमा ३५) र लाउटारो मार्टिनेज (७१ खेलमा ३३) छन्। क्लब स्तरमा उनको गोल संख्या १८१ छ।
मार्टिनेज हाल २८ वर्षका छन् र एक दशक लामो फुटबल करियरमा आफू विश्वका उत्कृष्ट पाँच स्ट्राइकरमध्ये पर्छु भन्ने दाबी गर्छन्। फ्रान्स फुटबलको प्रश्नमा उनले भने, ‘म सिधै शीर्ष पाँचमा पर्छु। नाम लिन चाहन्न। प्रत्येकको आफ्नै सूची हुन्छ। तर, पछिल्ला केही वर्षमा मैले गरेको उपलब्धिले मलाई शीर्ष पाँचमा राख्न अनुमति दिन्छ।’
