काठमाडौं। विश्वकप छनोटमा क्रिस्टियानो रोनाल्डोले आफ्नो कीर्तिमानमा २ गोल थप्दा ह्यारी केन भने फेरि निराश बने। थोमस टुचेलको प्रशिक्षकत्वमा इङ्ल्यान्डले फेरि पनि विश्वास दिलाउन सकेन।
जुन महिनामा एन्डोरामाथि हात परेको १–० को जितलाई बेलायती सञ्चारमाध्यमले प्रश्न उठाउँदै इङ्ल्यान्डको इतिहासकै सबैभन्दा कमजोर प्रदर्शन भनेर व्याख्या गरेका थिए। त्यसपछि सिजन अन्त्य हुनुअघि भएको मैत्रीपूर्ण खेलमा सेनेगलसँग ३–१ ले हार्दै इङ्ल्यान्ड आलोचनामा परेको थियो।
यसपटक टुचेलले टोलीमा १० परिवर्तन गरे। खेलमा केही सुधार देखिए पनि फिफा वरीयतामा १७४औं स्थानमा रहेको एन्डोराविरुद्ध दोस्रो लेगमा २–० को जित निकाल्न इङ्ल्यान्डले निकै मिहिनत गर्नुपर्यो।
२५औं मिनेटमा एन्डोराका क्रिस्टियन गार्सियाले नोनि माडुकेको क्रस क्लियर गर्न खोज्दा आत्मघाती गोल गरेपछि इङ्ल्यान्डले अग्रता लियो। डेक्लान राइसको हेडरसँगै अर्को गोल निस्कियो। चार खेलमा चारै जित निकाल्दै इङ्ल्यान्ड समूह ‘के’ को शीर्ष स्थानमा छ।
दोस्रो हाफमा इङ्ल्यान्डले थप अवसर सिर्जना गर्यो। तर, एन्डोराका गोलरक्षक इकर आल्भारेजले इबेरेचि इजे र एलियट एन्डरसनका प्रहार रोक्दै उत्कृष्ट बचाउ गरे।
६७औं मिनेटमा राइसले रीस जेम्सको क्रसमा टाढाको पोस्टमा हेड गर्दै अग्रता दोब्बर बनाए। ‘ऊर्जा सही थियो, खेलपनि राम्रो थियो। तर, हामीले अझ धेरै गोल गर्नुपर्ने थियो,’ खेलपछि प्रशिक्षक टुचेलले भने।
तर, इङ्ल्यान्डका सर्वकालीन शीर्ष गोलकर्ता ह्यारी केनले कीर्तिमान थप्न सकेनन्। सबैभन्दा ठूलो मौका पहिलो हाफमै आएको थियो, तर जेम्सको क्रसलाई खाली पोस्टमा गोल गर्न उनी असफल भए।
समूह ‘के’ मा सर्बियाले लाट्भियालाई १–० ले हराउँदै दोस्रो स्थानमा उक्लिएको छ। अब मंगलबार इङ्ल्यान्डले सर्बियाविरुद्ध खेल्नेछ, जुन समूहको सबैभन्दा कठिन खेल मानिएको छ।
टुचेलले भने,‘हामीलाई थाहा छ के आउँदैछ। यो निकै कठिन अवे खेल हो। तर, यसले छनोटमा ठूलो कदम चाल्न मद्दत गर्नेछ भन्ने कुरा हामी पूर्ण रूपमा सचेत छौं।’
