काठमाडौं । साफ च्याम्पियनसिप फुटबलमा नेपालले ऐतिहासिक प्रर्दशन र नतिजा आत्मसाथ गर्यो । नेपालले पहिलो पटक साफको फाइनल खेल्यो । उपविजेता बन्यो । दक्षिण एसियाली फुटबलमा भारतपछि नेपालनै उत्कृष्ट देखियो ।
नेपालले प्राप्त गरेको उपलब्धि प्रशिक्षक अब्दुल्लाह अलमुताइरीको टिम छाड्ने निर्णयले छायाँमा पर्यो । फाइनल अघि अलमुताइरीले भारतविरुद्धको खेल आफ्नो अन्तिम हुने घोषणा गरेका थिए । अलमुताइरीले घोषणाले पुन: पुराना घटना सतहमा आए ।
केही महिनाअघि उनको एन्फा उपाध्यक्ष पंकजबिक्रम नेम्वाङसँग ‘नोक–झोक’ चलेको थियो । नेम्वाङलाई आरोपित गर्दै अलमुताइरीले राष्ट्रिय टिम छाड्ने घोषणा गरेका थिए । तर एन्फा अध्यक्ष कर्माछिरिङ शेर्पाको पहलमा अलमुताइरी केही समयमा ‘थामथुम’ भए ।
अलमुताइरीकै लागि घटनाबारे छानविन गर्न गठित समितिको प्रतिवेदन समेत ‘ढिसमिस’ पारियो । एन्फा र राखेपको नेतृत्वको ठानेका थिए, प्रतिवेदन कार्यान्वयनमा गएको अवस्थामा अलमुताइरी नेपाल बस्ने छैनन् । दुवै निकाय साफको तयारीलाई प्रभावित बनाउन चाहदैन थिए । साफसम्म हेरौं भन्ने दुवै निकायको मनसाय देखिन्थ्यो ।
सबै ठिक ठाकै थियो । नेपाल ऐतिहासिक रुपमा साफको फाइनल पुगेको थियो । पोस्ट म्याच कन्फरेन्समा आएका अलमुताइरीले भनिदिए, ‘फाइनल खेल नेपालबाट मेरो अन्तिम हुनेछ । म नेपाल फर्कने छैन ।’
अलमुताइरीको उत्तेजक अभिव्यक्तिको केन्द्रमा केही मिडिया र पत्रकार रहेको देखिन्थो । उनी मिडिया र पत्रकारलाई गाली गरिरहेका थिए । ती मिडिया र पत्रकारको नाम भने खुलाएनन् । तर आफुमाथि मिडियाले फिक्सिङ्गको आशंका गरेको गम्भिर आरोप लगाए ।
अलमुताइरीले भने जस्तो सेमिफाइनलको प्रेस कन्फरेन्समा मुख्य प्रशिक्षक नआउनुलाई कुनै पनि मुल धारका मिडियाले त्यसो त लेखेका थिएनन् । केही अनाधिकृत पेज र यूटूबमा हुन पनि सक्छ । तर त्यस प्रकारको प्रशिक्षक लक्षित आरोप कतै भेटिएन ।
तर अलमुताइरीले भेटेको भने । चित्त दुखाए । उत्तेजनामा आए । र भनिदिए, ‘मेरो नाम बेचेर ‘क्लिक’ बढाउन पाउने छैनौं । पैसा कमाउन पाउने छैनौं । म नेपाल आउनेवाला छैन ।’
यि कुवेती प्रशिक्षक अलमुताइरीले मुल धारका मिडिया र सञ्चारकर्मीले नभेटेका सामाग्री कसरी भेट्छन् ? कसले पुर्याउछ ?
कहिले काही म स्वयमलाई आश्चार्य लाग्छ, ताजुब लाग्छ ।
क्षणभरमै ३६० डिग्री फर्किने अलमुताइरी स्वभावले नेपाली सञ्चारजगत ‘हायाकायल’ छ ।
तर उनै अलमुताइरीलाई नेपाली प्रशंसक औधी माया गर्छन् । सम्मान र समर्थन गर्छन् ।
लाग्छ, यो देशमा अहिले एन्फाको अध्यक्ष भन्दा एन्फाको मुख्य प्रशिक्षक चर्चित र लोकप्रिय छ ।
विषयमै फर्कौ ।
अलमुताइरीले साफको फाइनल अघि नेपाल छाड्ने पुन घोषणा गरे । फाइनल खेल लगत्तै एउटा भावनात्मक प्रतिक्रिया दिए । जो भाइरल पनि बन्यो ।
उनले नेपाल आफ्नो घर रहेको बताउँदै त्यो कसैले मेट्न नसक्ने बताए ।
क्षणभरमै भावुक बनिहाल्ने अलमुताइरीले भने, ‘मैले नेपाली टिममात्र बनाएको हैन, अलमुताइरीलाई पनि नेपालले बनाएको हो ।’
कुन परिस्थितीमा कस्तो बोल्न पर्छ, अलमुताइरीलाई राम्रोसँग थाहा छ । त्यही भएर उनी बेला मौकामा धाकै लगाउँछन्, ‘म मनोबिज्ञानको डिग्री होल्डर हो ।’
फाइनलमा अलमुताइरीले के भावना दर्साए, नेपालका खेल प्रशंसक पुग्यो । सामाजिक सञ्जालभरी भन्न थाले, ‘हामलाई अलमुताइरी चाहिन्छ । अलमुताइरीलाई फिर्ता ल्याउ ।’
एन्फालाई फसाद !
प्रशिक्षक रिसाएर घरी एउटा अभिव्यक्ति दिन्छ । अर्को दिन मनभरीको माया पोख्छ ।
के ठान्ने ? के मान्ने ? के सोच्ने ? विचित्रै छ ।
साफको फाइनलको अवसर पारेर माल्दिभ्समै साफको बैठक पनि बस्यो । नेपालबाट अध्यक्ष कर्माछिरिङ शेर्पा, महासचिव इन्द्रमान तुलाधर, कार्यसमिति सदस्य रत्नकुमार श्रेष्ठ बैठकमा सहभागी हुन माल्दिभ्स पुगे ।
फाइनलकै साँझ अलमुताइरीले एक टेलिभिजनलाई अन्तरवार्ता दिदै आफु नेपाल बस्न तयार रहेको र त्यसका लागि एन्फाले प्रस्ताव गर्नुपर्ने बताए । उनले एन्फाले चाहेको खण्डमा आफु नेपाली फुटबलको सिपाई बन्न तयार रहेको बताए । अलमुताइरीले यो पनि भने, ‘एन्फासँग मेरो सम्झौता अब ४–५ दिनमा सकिन्छ । एन्फाले नयाँ प्रस्ताव ल्याउन पर्छ ।’
सबैले बुझ्न पर्ने एउटा कुरा छ ।
जब अलमुताइरी नेपाल आएका थिए, एन्फाले एउटा ‘टार्गेट’ उनलाई दिएको थियो । त्यो भनेको नेपाललाई साफको फाइनल पुर्याउने हो ।
अलमुताइरीले त्यो गरेर देखाए ।
त्यतिमात्र हैन, उनले ऐतिहासिक रुपमा नेपाललाई एसियन कप छनोटको तेस्रो चरणमा पुर्याए । अलमुताइरी खेलाडीलाई बारम्बार भन्ने गर्थे, लक्ष्य साफ भएपनि सपना एसिया कप हो । नेपाल र खेलाडीहरु एसियन कपका लागि तयार हुनुपर्छ ।
अलमुताइरीले सार्वजनिक रुपमै भनेका छन्, हाम्रो लक्ष्य एसियन कप खेल्नु हो । उनी खेलाडीलाई त्यसका लागि प्रेरित गरिरहेको हुन्छन् । साफको फाइनल पुर्याएर अलमुताइरीले एन्फाले दिएको लक्ष्य पुरा गरेका छन् । अर्थात एन्फासँग एक अध्याय पुरा भएको अलमुताइरीको बुझाई छ ।
अलमुताइरी एन्फासँग सुरुवातमा एक वर्षको सम्झौता गरेका थिए । त्यो सम्झौता अप्रिलबाट सुरु भएको थियो । पुन एन्फाले अलमुताइरीसँग जुलाइदेखि लागु हुने गरि एक वर्षको सम्झौता गरेको छ ।
अर्थात एन्फासँगको सम्झौता अनुसार उनी सन् २०२२ को सेप्टेम्बरको अन्तिमसम्म राष्ट्रिय फुटबल टिमको नेतृत्व गर्नेछन् । त्यो समय आफुलाई थाहा नदिएर दोस्रो पटक प्रशिक्षकको करार थपेको भन्दै एन्फा उपाध्यक्ष कृष्ण थापाले साउनको पहिलो साता टेक्निकल कमिटीबाट राजीनामै दिएका थिए ।
अलुमताइरीको एन्फासँग सम्झौता सन् २०२२ को सेप्टेम्बरसम्म रहेको छ ।
अर्को बुझ्नुपर्ने तथ्य, अलमुताइरीलाई नेपालले अनुदानमा पाएको हो । कतार फुटबल संघसँग अनुरोध गरेर एन्फाले अलमुताइरीलाई नेपाल ल्याएको हो ।
यसको अर्थ अलमुताइरीलाई तलब कतारले दिन्छ, काम भने अलमुताइरीले नेपालमा गर्छन् । प्राफेसनल लाइसेन्स प्रशिक्षक आफुसँग नभएको भन्दै एन्फाले कतारसँग अनुरोध गरेको थियो । कतारले अलमुताइरीले प्रस्ताव गर्यो । नेपालको अनुरोधमा अलमुताइरी नेपाल आएका हुन् ।
तर अलमुताइरी किन एन्फासँग आफ्नो सम्झौता सकिएको बताउँदैछन् त ?
सबैलाई थाहा छ, पछिल्लो समय नेपालको प्रर्दशन र नतिजामा मात्र सुधार आएको छैन्, अन्तराष्ट्रिय फुटबलमा अलमुताइरीको भाउ समेत बढेको छ ।
दक्षिण एसियाकै श्रीलंकाले अलमुताइरीलाई मुख्य प्रशिक्षकको रुपमा प्रस्ताव गरेको छ । खाडीका राम्रा क्लबको प्रस्ताव त उनको गोजीमै छ ।
यही सेरोफेरोमा अलमुताइरी एन्फासँग सम्झौता सकिएको र नयाँ प्रस्ताव आउनुपर्ने बताउन थालेका हुन् ।
अर्थात, साफको फाइनल पुर्याएसँगै नेपाली फुटबलसँग उनको एउटा अध्याय पुरा भएको छ । अब उनी नेपालसँग काम त गर्न चाहन्छन्, तर त्यसका लागि नयाँ प्रस्ताव चाहन्छन् ।
सिधा कुरा, अलमुताइरी कतारले दिने ६ हजार डलरमा अब नेपालमा काम गर्न चाहदैनन् ।
साफको ‘मिसन’ पुरा भएपछि आफ्नो क्षमता अनुसारको प्रस्ताव नेपालबाट चाहेका छन् ।
साफको समापनपछि एन्फाका पदाधिकारीले अलमुताइरीलाई नेपाल फर्कन र सम्झौता अनुसार अघि बढ्न अनुरोध गरेका थिए । अलमुताइरी त्यसमा सकारात्मक पनि छन् । कतारमा भेटेर अलमुताइरीलाई फकाउने एन्फा अध्यक्षको कोशिश जारीनै छ । तर मुख्य कुरा नेपाल सरकार र एन्फाले अलमुताइरीलाई दिने प्रस्तावमा निर्भर रहनेछ ।
आफु अनुकुल काम गर्ने वातावरण र आफुले हक राख्ने सेवा सुविधाको प्रस्ताव अलमुताइरीले खोेजेका छन् ।
हामीलाई राम्रोसँग थाहा छ, महिनामा दशौं लाख बढी तलब खुवाउने हैसियत एन्फाले राख्दैन । बाँकी कुरा सरकारको प्रस्तावमा निर्भर गर्छ ।
सायद एन्फा र सरकार बीच अलमुताइरीलाई सम्बोधन गर्ने विषयमा चाँडै औपचारिक संवाद सुरु हुनेछ । त्यसैले अलमुताइरीको भविष्यको टुङ्गो लाग्नेछ ।
