प्रशिक्षक संघले भन्यो– एन्फामा अराजक समूह आए

काठमाडौं। नेपाल फुटबल प्रशिक्षक संघले अखिल नेपाल फुटबल संघ (एन्फा) मा अराजक समूह सक्रिय भएको आरोप लगाएको छ।

संघले आइतबार विज्ञप्ति निकाल्दै केही व्यक्तिहरूले सामाजिक सञ्जालमा अमर्यादित शब्द प्रयोग गर्दै संघलाई बदनाम गर्ने प्रयास गरेको भन्दै आपत्ति जनाएको छ।

‘एन्फासँग वार्ता गर्ने भनि खेलाडी संघका अध्यक्षको नेतृत्वमा एन्फाको प्राङ्गणमा आएकोमा सो खेलाडीहरूसँगै एन्फामा आएका केही अराजक एवं फुटबल विकास विरोधी व्यक्तिले यस प्रशिक्षक संघलाई अर्मादित शब्द प्रयोग गरी सामाजिक सञ्जालमा पोष्ट गरी संघलाई बदनाम गर्न प्रयत्न गरेकोप्रति यस प्रशिक्षक संघ घोर भत्सना गर्दछ,’ विज्ञप्तिमा भनिएको छ।

नेपाल खेलाडी संघका अध्यक्ष विक्रम लामाको नेतृत्वमा केही खेलाडी तीन वर्षदेखि हुन नसकेको ‘ए’ डिभिजन लिगको निश्चितता, खेलाडी अक्षय कोषको विस्तृत विवरण, ९ वर्षदेखि खेलाडीले पाउन बाँकी पुरस्कार रकम उपलब्ध गराउनुपर्नेलगायतका माग लिएर आइतबार सातदोबाटोस्थित एन्फा कम्प्लेक्स पुगेका थिए। तर, ती खेलाडीलाई राजेन्द्र तामाङ नेतृत्वमा रहेको प्रशिक्षक संघले रोकेको थियो।

उक्त क्रममा खेलाडी र प्रशिक्षकबीच केहीबेर भनाभन भएको थियो। उक्त भनाभनको भिडियो सामाजिक सञ्जालमा छरपस्ट भएपछि प्रशिक्षक संघले आइतबार राति विज्ञप्ति निकाल्दै आफ्नो ‘डिफेन्स’ गरेको हो।

प्रशिक्षक संघले एन्फामा देखिएको विवाद समाधानका लागि खेलाडी संघले उठाएका मागहरूलाई सकारात्मक रूपमा लिनुपर्ने र वार्ताबाट समाधान खोज्नुपर्ने अवस्था रहेको जिकीर गरेको छ। यसै सन्दर्भमा खेलाडी संघका अध्यक्षको नेतृत्वमा एन्फासँग संवाद गर्न जाने क्रममा केही अराजक तथा फुटबल विकासविरुद्ध लागेका व्यक्तिहरूले सामाजिक सञ्जालमा गलत प्रचार गरेको प्रशिक्षक संघको दाबी छ।