काठमाडौं । जंगी अड्डा भद्रकालीमा मंगलबार केही फरक दृष्य देखिए । राष्ट्रिय सुरक्षाको मुख्य जिम्मेवारी पाएको आर्मीको ‘हाइकमाण्ड’ मंगलबार फुटबलको औपचारिक कार्यक्रममा सरिक थियो ।
आर्मीले फुटबल खेलाडी उत्पादनमा महत्वपूर्ण मानिएको युथ एकेडेमीको औपचारिक उद्घाटन गर्यो ।
आर्मीको नवनियुक्त प्रधानसेनापति प्रभुराम शर्माले एकेडेमीको औपचारिक उद्घाटन गरे ।
घरेलु खेलकुदमा आर्मीको योगदान महत्वपुर्ण छ । राम्रा खेलाडी उत्पादन गर्नेदेखि खेलाडीलाई विभागमा रोजगारी सुनिश्चित गर्ने सन्दर्भमा आर्मी परिचित छ । त्यसैले घरेलु खेलकुद र खेलाडीमा आर्मीको बर्चस्व छ ।
आर्मीले अझै फुटबललाई प्राथमिकतामा राखेको देखिन्छ । नेपालमा एएफसी क्लब लाइसेन्सिङ कार्यान्वयनको हल्ला चल्ने वित्तिकै विभागीय टिमको भविष्यलाई लिएर ठुलो चिन्ता व्यक्त भएको थियो ।
एएफसीका मापदण्ड विभागले पुरा नगर्ने र पब्लिक क्लबको दरिलो उपस्थितीले विभागीय टिम विस्तारै हराउने धेरैको अनुमान थियो ।
तर सबैको अनुमान विपरित आर्मीनै एएफसीको क्लब लाइसेन्सिङ प्राप्त गर्ने पहिलो र एकमात्र क्लब बनेको छ ।
एएफसीका प्रतियोगिता खेल्ने वैधानिक अधिकार र हैसियत अहिले आर्मीसँग मात्र छ ।
आर्मीको ‘चेन अफ कमाण्ड’ अनुसार एएफसीको मापदण्ड पुरा गर्न निकै झन्झट हुने धेरैको बुझाई थियो । तर आर्मीले फुटबलका लागि बेग्लै विधान मात्र बनाएन, क्लबको नामनै परिवर्तन गर्न तयार भयो ।
अब त्रिभुवन आर्मी क्लब हैन, त्रिभुवन आर्मी फुटबल क्लबको रुपमा विभागीय टिमले घरेलु फुटबल खेल्नेछ ।
एउटा सुखद समाचारको अन्त्य हुन नपाउँदै आर्मीले घरेलु फुटबलमा अर्को कोशेढुङ्गा स्थापित गरेको छ ।
आर्मीले फुटबल खेलाडी उत्पादनका लागि मंगलबारबाट एकेडेमीको औपचारिक उद्घाटन गरेको छ ।
यो अवस्थासम्म आइपुग्न सहज भने थिएन ।
एएफसीको क्लब लाइसेन्सिङ प्रत्येक क्लबमा लागु गर्नुपर्ने दबाबमा एन्फा छ ।
एन्फाका अध्यक्ष कर्माछिरिङ शेर्पा सहितका अधिकांश पदाधिकारीलाई थाहा छ, यो नेपालमा लागु गर्न सहज छैन ।
तीन महिना समेत लिग खेल्न नसक्ने ए डिभिजन क्लबमा एएफसीको लाइसेन्स लागु गराउनु फलामको चिउरा चपाउनु सरहनै हो ।
त्यसपछि एन्फाको ध्यान विभागीय टिमतर्फ मोडिएको देखिन्छ । अध्यक्ष शेर्पाले आर्मीसँग छलफल गरेर फुटबल एकेडेमीको प्रस्ताव अघि बढाएका थिए । साथै एएफसी लाइसेन्स किन आवश्यक छ भनेर अन्तरक्रिया समेत गराएका थिए ।
एन्फाको प्रस्तावमा आर्मी सकारात्मक बन्यो । लगत्तै आर्मी ए लाइसेन्स प्राप्त गर्ने दिशामा अघि बढेको थियो ।
आर्मी मात्र हैन एन्फाले राज्यको स्रोत साधनले सम्पन्न अन्य दुई विभागीय टिम पुलिस र एपीएफमा समेत खेलाडी उत्पादनका लागि एकेडेमी र एएफसीको लाइसेन्सिङको छलफल चलाएको थियो । अहिले दुवै विभाग एएफसीको क्लब लाइसेन्सिङ प्राप्त गर्ने दिशामा अघि बढेका छन् । खेलाडी उत्पादनमा एकेडेमी सञ्चालन गर्न अन्य दुई विभाग सहमत बनेर काम सुरु गरिसकेका छन् ।
नेपालमा फुटबल खेलाडी उत्पादनका लागि व्यवस्थित एकेडेमी सञ्चालनमा छैनन् । केही छन्, ती नगन्य छन्, प्रभावकारी छैनन् ।
फुटबलको नीति बनाउने र कार्यान्वयन गर्ने निकाय एन्फाले एकेडेमी सञ्चालन गर्दै आएको छ ।
आन्तरिक विवादले कुनै समय एकेडेमी बन्द थियो, अहिले सञ्चालनमा छन् ।
ती एकेडेमी केन्द्रिय ‘हेडक्वार्टर’ सातदोबाटो सहित बुटवल र धरानमा सञ्चालित छन् । यिनै तीन एकेडेमीले फुटबल खेलाडी उत्पादनको सम्पुर्ण भार धानेका छन् ।
अब यसका तीन विभाग समेत जोडिएका छन् । जसको आर्मीले मंगलबार उद्घाटन गरेको छ । खेलाडी उत्पादनमा यसलाई ‘ब्रेक थ्रू’को रुपमा लिन सकिन्छ ।
देशभरबाट छानिएका उत्कृष्ट खेलाडीलाई छनोट गरि तीन विभागको टोलीमा बाँड्ने र तीन विभागमा आएका खेलाडीलाई सम्बन्धित विभाग, एन्फा र सम्बन्धित खेलाडी सहितको आर्थिक व्ययभारबाट सञ्चालन गर्ने ‘मोडालिटी’ घरेलु फुटबलको खेलाडी उत्पादनमा ‘ब्रेक थ्रू’ हुने विश्वास गरिएको छ ।
मंगलबार आर्मीले तीनै छनोट भएका खेलाडीबीच मैत्रीपूर्ण फुटबल खेलको आयोजना गर्यो र एकेडेमीको सुभारम्भ गर्यो ।
एउटा टिमको कप्तानी राष्ट्रिय टिमका स्टार भरत खवासले गरे, अर्को टिमलाई जर्ज प्रिन्स कार्कीले नेतृत्व गरे । एकेडेमीका खेलाडी विभागका सिनियर खेलाडीको नेतृत्वमा मैदानमा उत्रिए ।
यू–१३ बाट छनोट भएका खेलाडीले लोभलाग्दो स्किल देखाए ।
सबै खेलाडीको भरत खवास र जर्ज प्रिन्स कार्की जस्तै सफल खेलाडी बन्ने सपना बुनेका रहेछन् । एकेडेमीमा आएका खेलाडी आवसीय रुपमा आर्मीको विद्यालयमा बसेर पढ्नेछन् र सँगै फुटबलको कला पनि तिखार्नेछन् ।
एकेडेमीबाट उत्पादन भएका खेलाडीले राष्ट्रिय तथा अन्तराष्ट्रिय फुटबल प्रतियोगितामा उत्कृष्ट प्रर्दशन गर्ने आर्मीको अपेक्षा छ ।
