उज्वेकिस्तान पुगेका नेपाली टोलीको कोरोना रिपोर्ट नेगेटिभ

काठमाडौं । उज्वेकिस्तान पुगेका नेपाली राष्ट्रिय महिला फुटबल टोलीका खेलाडी र  अफिसियलको कोरोना रिपोर्ट नेगेटिभ आएको छ।

एएफसी महिला एसियन कप-२०२२ छनोटका लागि उज्वेकिस्तानको ताश्केन्त पुगेका नेपाली टोलीका सबै सदस्यको रिपोर्ट नेगेटिभ आएको हो ।

उज्वेकिस्तान पुगेपछि नेपाली टिमको पीसीआर गरिएको थियो । र, बुधबार आएको रिपोर्ट नेगेटिभ आएको हो ।

रिपोर्ट नेगेटिभ आएपछि अब नेपाली टिमले प्रशिक्षण थाल्ने छन् ।

उज्वेकिस्तानको जेएआर स्टेडियममा हुने छनोटमा नेपाल समूह 'एफ' मा रहेको छ । नेपालको समूहमा फिलिपिन्स र हङकङ रहेको छ ।

नेपालले फिलिपिन्ससँग खेल्दै छनोटको सुरुवात गर्नेछ । नेपाल र फिलिपिन्सबीचको खेल सेप्टेम्बर १८ (असोज २) मा हुनेछ ।

यस्तै नेपालले दोस्रो खेलमा हङकङको सामना गर्नेछ । उक्त खेल सेप्टेम्बर २१ (असोज ५) मा हुनेछ ।

यस समूहको फिलिपिन्स र हङकङबीचको खेल सेप्टेम्बर २४ (असोज ८) मा हुनेछ ।

समूहको शीर्ष टोलीले अर्को वर्ष भारतमा हुने एसियन कप खेल्नेछ ।

एसियन कप जनवरी २० देखि फेब्रुअरी ६ सम्म हुनेछ ।