बुस्केट्सले घोषणा गरे सन्न्यास

काठमाडौं। लामो समयदेखि चर्चा हुँदै आएको कुरा अन्ततः सत्य साबित भएको छ। इन्टर मियामी तथा स्पेनिस मिडफिल्डर सर्जियो बुस्केट्सले शुक्रबार सन्न्यासको घोषणा गरेका छन्।

बिहान भिडियो सन्देशमार्फत ३७ वर्षीय बुस्केट्सले यो घोषणा गरेका हुन्। उनले अमेरिकी मेजर सकर लिग (एमएलएस)को चालु सिजन सकिएपछि फुटबलबाट बिदा लिने भएका छन्।

इन्टर मियामीका तर्फबाट खेलिरहेका बुस्केट्सले भिडियोमा भनेका छन्,‘मैदानमा बिताउने मेरा अन्तिम केही महिना हुन्। म निकै खुसी छु, गर्वित छु र सबैभन्दा ठूलो कुरा कृतज्ञ भएर सन्न्यास लिँदैछु। सबैलाई धन्यवाद र फुटबललाई धन्यवाद।’

२००८ मा बार्सिलोनाबाट डेब्यू गरेका बुस्केट्सले करिब दुई दशक लामो करिअरमा ८०० भन्दा बढी क्लब र १४३ अन्तर्राष्ट्रिय खेल खेलेका छन्। उनको उपलब्धिमा ३६ ट्रफी छन्। त्यसमा ९ ला लिगा उपाधि, ३ वटा युइएफए च्याम्पियन्स लिग र २०१० को विश्वकप पनि पर्छ।

पेप ग्वार्डियोलाको नेतृत्वमा बार्सिलोनामा डेब्यु गरेका बुस्केट्स डिफेन्सिभ मिडफिल्डरका रूपमा समयका उत्कृष्ट खेलाडीमध्ये एक मानिन्छन्। उनको शान्त स्वभाव, बल कन्ट्रोल र सटीक पासिङले उनलाई अलग्गै पहिचान दिलायो।

२०२३ मा बाल्यकालीन साथी लिओनल मेसीसँग पुनः एक हुन बुस्केट्स इन्टर मियामी पुगेका थिए। बिदाइ सन्देशमा उनले बार्सिलोना, स्पेन राष्ट्रिय टोली, इन्टर मियामी, आफ्ना सहकर्मी र समर्थकप्रति आभार प्रकट गरे। साथै, विशेष धन्यवाद उनले श्रीमती एलेना गालेरा र सन्तानलाई दिए।