काठमाडौं । वर्षको चौथो तथा अन्तिम ग्रान्ड स्लाम यूएस ओपन सुरु भइसकेको छ र यसपल्टको प्रतियोगितामा सबैको ध्यान हुनेछ, नोभाक जोकोभिचमाथि ।
यसको कारण हो, यी सर्बियाली खेलाडीसामु वर्षका चारै ग्रान्ड स्लाम उपाधि जित्ने अवसर हुनेछ । सन् २०१६ मा उनले फ्रेन्च ओपन जितेर लगातार ग्रान्ड स्लाम उपाधि जित्ने कीर्तिमान बताए ।
तर लगतै विम्बल्डनमा पराजित भएपछि उनले एक वर्ष सबै ग्रान्ड स्लाम जित्ने अवसर भने गुमाए । त्यसको पाँच वर्षपछि विश्व नम्बर १ टेनिस खेलाडीसामु यस्तै अवसर फेरि अगाडि आएको छ ।
मज्जाले भन्न सकिन्छ, यसपल्ट उनका सामु अझ बलियो अवसर रहेको छ । उनले सन् २०२१ मा अष्ट्रेलियन ओपन, फ्रेन्च ओपन र विम्बल्डन जितिसकेका छन् ।
अब पालो यही यूएस ओपनको ।
सन् १९६९ मा रड लाभर एक वर्ष चारै ग्रान्ड स्लाम जितेका थिए र त्यसयता यस्तो उपलब्धी कोही पनि पुरुष खेलाडीले हात पार्न सकेका छैनन् ।
जोकोभिचले अब यूएस ओपन जिते, यो पक्कै पनि समग्र विश्व टेनिस इतिहासकै सबैभन्दा ठूलो उपलब्धी हुनेछ र जोकोभिच हुनेछन्, सर्वकालीन महान टेनिस खेलाडी ।
उनले मंगलबार पहिलो चरणमा डेनमार्कका क्वालिफायर होल्गर रुनको सामना गर्नेछन् र त्यस अगाडि भनेका छन्, ‘म यो प्रतियोगिताको व्यग्र प्रतीक्षामा थिएँ । यसमा म आफूले सक्दो उत्कृष्ट टेनिस खेल्न प्रेरित छुं ।’
जोकोभिच सामु आएको यो अवसर अर्को एउटा ठूलो कारणले महत्त्वपूर्ण छ ।
पुरुष टेनिसमा सर्वाधिक २० ग्रान्ड स्लाम जित्ने तीन खेलाडी छन् । यसमा एक त जोकोभिच भए । अन्य दुई रोजर फेडेरर र राफेल नाडाल हुन् ।
संयोगले यी दुवै खेलाडीले यसपल्टको यूएस ओपन खेलिरहेका छैनन् । त्यसैले जोकोभिचले २१ औं ग्रान्ड स्लाम जितेर फेडेरर र नाडाल दुवैलाई उछिन्न सक्नेछन् ।
–बीबीसीको सहयोगमा ।
-1747226778.jpeg)
