कतै अब सेरेनाले खेलेको हेर्न नपाइने पो हो कि ?

काठमाडौं ।  निकै निकै भावुक भएकी सेरेनाले एकपल्ट भनेकी थिइन्, ‘म चुपचाप सन्यास लिन्छुं र कसैलाई केही पनि भन्दिनं ।’ सायद त्यस्ता दिन आएकै हो जस्तो छ । अमेरिकाकी यी सफल टेनिस खेलाडीलाई फेरि एउटा धक्का पुगेको छ र त्यो हो, उनले चोटका कारण अर्को साता सुरु हुने यूएस ओपनबाट आफ्नो नाम फिर्ता लिनु परेको छ ।

सेरेना ३९ वर्षकी भइसकिन र उनको कीर्तिमान २४ औं ग्रान्ड स्लाम जित्ने धोको अझै बाँकी छ । तर उनी जुन ग्रान्ड स्लाममा बढी सफल छिन्, त्यसमै उनी खेल्न असमर्थ भएकी हुन् । उनले भनेकी छिन्, ‘चिकित्सकीय टोलीसँग छलफलपछि मैले यूएस ओपन नखेल्ने निर्णय गरेकी छुं । मलाई आराम चाहिएको छ ।’

न्युयोर्कमा छ पल्टकी च्याम्पियन सेरेनाले विम्बल्डनबाट पहिलो चरणबाटै बाहिरिएपछि अहिलेसम्म कोर्टमा फर्केकी छैनन् । विम्बल्डनमा बेहोरेको त्यो हारपछि उनी स्तब्ध जस्तै देखिएकी थिइन् । मार्गरेट कोर्टको नाममा रहेको छ, २४ ग्रान्ड स्लाम उपाधि जितेको कीर्तिमान । सन् १९९९ देखि विश्व टेनिसमा छाइरहेकी सेरेना खालि त्यस कीर्तिमानबाट एक उपाधि टाढा छिन् ।

अबको सेप्टेम्बरमा सेरेना ४० वर्षकी हुनेछिन् र डर छ, कतै अब सेरेनाले खेलेको हेर्न नपाइने पो हो कि ? महिला टेनिसमा उनलाई महान खेलाडी भन्न पटक्कै कन्ज्युयाइ गर्नु पर्दैन् । तर उनले २४ ग्रान्ड स्लाम जित्ने सम्भावना झन झन कमजोर भइरहेको छ, भलै उनी कोर्टमै फर्कने हो भने पनि ।

सन् २०१७ मा उनले अन्तिम पटक अष्ट्रेलियन ओपन जितेकी थिइन्, त्यसपछि उनी चार पल्ट ग्रान्ड स्लामको फाइनल त पुगिन्, तर प्रत्येक पल्ट पराजित रहिन् । उनी सन् २०१८ र २०१९ को विम्बल्डन तथा यूएस ओपनको फाइनलमा पराजित भएकी थिइन् । टेनिसका प्रशंसकहरूको त इन्छा नै हो, सेरेना चाँडै कोर्टमा फर्कन सफल होस । त्यति मात्र होइन, उनले अर्को कुनै ग्रान्ड स्लाम उपाधि पनि जितोस ।

–एएफपीको सहयोगमा ।