रियलसँग कोर्टुवाको नयाँ सम्झौता

काठमाडौं । स्पेनिस क्लब रियल मड्रिडका गोलकिपर कोर्टुवा थिवाउटले क्लबसँगको सम्झौता नवीकरण गरेका छन् ।

ला लिगा क्लब रियलले सोमबार गोलकिपरले सम्झौता नवीकरण गरेको जनाएको छ ।

बेल्जियमका गोलकिपरले क्लबसँग थप पाँच वर्ष क्लबमा बस्ने गरि सम्झौता नवीकरण गरेका हुन् ।

अब कोर्टुवा सन् २०२६ को जुन ३० सम्म रियलमा रहने छन् ।

२९ वर्षीय गोलकिपर सन् २०१८ मा चेल्सीबाट रियल आएका थिए ।

रियलका लागि उनले १ सय ३० खेलमा ५२ क्लिन सिट निकालेका छन् ।

उनले रियलबाट ला लिगा, क्लब विश्वकप र सुपर कोपा जितिसकेका छन् ।

बेल्जियमका लागि उनले ८९ खेल खेलेका छन् ।