म्याक्सवेल घाइते

काठमाडौं। अस्ट्रेलियाका विस्फोटक अलराउन्डर ग्लेन म्याक्सवेल फेरि एक पटक चोटका कारण टोलीबाट बाहिरिन बाध्य भएका छन्।

न्युजिल्यान्डविरुद्धको तीन टी–२० खेलको श्रृंखलाअघि माउन्ट माउङ्गानुइमा भएको नेट अभ्यासकै क्रममा चोट लागेपछि म्याक्सवेल श्रृंखलाबाटै बाहिरिएका हुन्।

३६ वर्षीय म्याक्सवेललाई बलले लागेको थियो। स्क्यानपछि उनको हड्डीमा चिरा देखिएको र उनको स्थानमा जोस फिलिपेलाई टोलीमा बोलाइएको क्रिकेट अस्ट्रेलियाले जनाएको छ।

त्यो समय छेउकै नेटमा अभ्यास गरिरहेका म्याथ्यु सर्टले भने,‘मैले आडबाट हेरेको थिएँ। हामी छानामुनि अभ्यास गरिरहेका थियौं, आवाज निकै गुञ्जिएको थियो। मिच ओवेनले बल जोडले हाने र तुरुन्तै विपत्ति आयो—त्यो बल म्याक्सीको हातमा लाग्यो। आवाज निकै खराब सुनिएको थियो।’

अहिले उनी २९ अक्टोबरदेखि क्यानबेरामा सुरु हुने भारतविरुद्धको टी–२० श्रृंखलाभन्दा अघि फिर्ता हुने तयारीमा छन्। यो श्रृंखला र अघिल्लो न्युजिल्यान्डविरुद्धको श्रृंखला अस्ट्रेलियाको विश्वकप तयारीका लागि महत्त्वपूर्ण मानिएको थियो। म्याक्सवेलको अनुपस्थितिमा मार्कस स्टोइनिसले टोलीमा पुनः मौका पाउने सम्भावना बढेको छ।