रोड्रीलाई पुन: समस्या

काठमाडौं। म्यानचेस्टर सिटीका मिडफिल्डर रोड्रीले आफ्नो घुँडामा पुनः समस्या देखिएको बताएका छन्।

उनले गत सिजनमा एसीएल चोट खेपेको सोही घुँडामा फेरि पीडा अनुभव गरिरहेका छन्। योसँगै च्याम्पियन्स लिगमा मोनाकोविरुद्धको खेलमा उनको फिटनेसबारे शंका उब्जाएको छ।

गत वर्षको बालोन डि’ओर विजेता रोड्रीले शनिबार प्रिमियर लिगमा बर्नलीविरुद्धको ५–१ को जित निस्किएको खेल गुमाए। शुक्रबारको अभ्यासपछि उनले खेल्न नसक्ने निर्णय गरेका थिए। ‘उसले म खेल्न सक्दिनँ, मेरो घुँडामा धेरै दुखिरहेको छ खेल्न सक्दिनँ भन्यो,’ प्रशिक्षक पेप ग्वार्डिओलाले बर्नलीसँग खेलपछि भने,‘ यदि तिमी खेल्न सक्दैनौ भने अर्को खेलाडी खेल्छ भनेर उसलाई भने।’

रोड्री गत सिजन दायाँ घुँडाको एसीएल चोटका कारण आठ महिना मैदान बाहिर बसेका थिए। ग्वार्डिओलाले अहिले समस्या फेरि त्यही घुँडामा भएको पुष्टि गरेका छन्। यस महिनाको मध्यतिर आठ दिनमा लगातार तीन खेल खेलेका रोड्री खेलमैत्री नभएको महसुस गरिरहेका थिए। अभ्यासमै पनि सहज अनुभव नगरेको प्रशिक्षकले जनाए।

गत सिजनको अधिकांश समय रोड्रीको अनुपस्थितिले नै सिटीको प्रदर्शनमा असर परेको थियो। प्रिमियर लिग उपाधि रक्षा गर्न पनि असफल भएको थियो। सिटीले यसपटक च्याम्पियन्स लिगको पहिलो चरणमा नेपोलीलाई २–० ले हराएको छ। यसै साताको खेलका लागि मोनाको यात्रा गर्दैछ।