काठमाडौं । इंग्लिस प्रिमियर लिगको पहिलो साता अपेक्षा अनुसार सनसनीपूर्ण रह्यो । कुल दस खेलमा ३४ गोल भए । अनि तीन लाख समर्थकले सिधै रंगशाला गएर खेल हेरे ।
पहिलो चरणको खेलको सबैभन्दा ठूलो हरुवा टिम रह्यो, म्यानचेस्टर सिटी । तर म्यानचेस्टर युनाइटेड, चेल्सी र लिभरपुलले भने अपेक्षित सजिलो जित निकाल्यो र उनीहरूले भन्न चाह्यो, सिटीलाई उपाधि रक्षा गर्न दिन्नौं ।
पहिलो साताका खेलका तीन उल्लेखनीय पक्ष के के रहे त ? फ्रान्सेली समाचार संस्था एएफपीले तयार पारेको आलेख ।
१. फर्के समर्थकहरू, ‘होम ग्राउन्ड’ को फाइदा सुरु
इंग्लिस प्रिमियर लिगमा १७ महिनापछि समर्थक रंगशालामा फर्के । सन् २०१९/२०२० को सिजनदेखि दर्शकले रंगशालामा प्रवेश पाइरहेका थिएनन्, कोरोना भाइरस संक्रमणको महामारीका कारण । घरेलु समर्थक नभएपछि आफ्नो घरेलु मैदानको फाइदा पनि कमजोर भएको थियो । तर तिनै दर्शक फर्केपछि त ‘होम ग्राउन्ड’ को फाइदा फेरि सुरु भएको छ । त्यसैले त होला, पहिलो साताका दस खेलमध्ये सातमा घरेलु टिम विजयी रह्यो । सबैभन्दा बढी घरेलु समर्थकको फाइदा कसैलाई भएको देखियो भने त्यो म्यानचेस्टर युनाइटेडलाई थियो ।
२. म्यानचेस्टरको स्वप्नील सुरुवात
यो साता कुनै टिमले सबैभन्दा बढी स्वपनिल सुरुवात लियो भने त्यो म्यानचेस्टर युनाइटेडकै थियो । उसले लिड्सलाई ५–१ ले हराएको थियो । म्यानचेस्टरका लागि सबैभन्दा खुसीको पक्ष रह्यो, ब्रुनो फर्नान्डेज र पउल पोग्बाबीच मैदानमा देखिएको मीठो साझेदारी । पोग्बाले सिर्जना गरेका अवसरमा फर्नान्डेजले ह्याट्रिक पनि गरे । खासमा पोग्बाले चार गोलमा अवसर बनाएका थिए ।
३. सिटीको फितलो आक्रमण
म्यानचेस्टर सिटीलाई ह्यारी केन त चाहिएकै रहेछ, नत्र उसले टोटेनहमविरुद्धको खेलमा गोल त गर्ने थियो । उसले गोल गर्न सकेन नै, नतिजा डिफेन्डिङ च्याम्पियन पराजित रह्यो । बरू केन विना नै टोटेनहमको खेल भने सुमधुर देखियो । सायद अब टोटेनहमले केन विना पनि राम्रो खेल्न सक्नेछ । नयाँ व्यवस्थापकका रूपमा नुनो सान्टोको पहिलो खेल सुखद नै रह्यो । सिटीका लागि १० करोड पाउन्डका ज्याक ग्रेसिलले डेब्यु पनि गरे, तर पनि पेप ग्वार्डिओलाको टिम नराम्रोसँग माथ खान बाध्य रह्यो ।
