काठमाडौं । विश्व क्लब फुटबलको सर्वाधिक लोकप्रिय इंग्लिस प्रिमियर लिगको नयाँ संस्करण आज शुक्रबारदेखि सुरु हुँदैछ ।
यसपल्टको लिगको सबैभन्दा ठूलो विशेषता रहेको छ, रंगशालामा पूर्णत दर्शकको प्रवेश । यस्तोमा लिगको रौनकता नै बेग्लै हुनेछ ।
धेरैको अनुमान के छ भने यसपल्टको लिग उपाधिमा खालि चार टिम हुनेछन् । ती हुन्, डिफेन्डिङ च्याम्पियन म्यानचेस्टर सिटीसँगै म्यानचेस्टर युनाइटेड, लिभरपुल र चेल्सी ।
लिगमा सहभागी क्लबको स्थिति कस्तो छ त?
त्यसबारे हामीले छोटकरीमा विश्लेषण गर्ने प्रयास गरेका छौं र यसका लागि बेलायती पत्रिका मिररको सहयोग लिएका छौं ।
आर्सनल
आर्सनलको यसपल्ट एकै मात्र उद्देश्य रहनेछ र त्यो हो, अंक तालिकाको शीर्ष चारमा प्रवेश पाउने । आर्सनलले च्याम्पियन्स लिगमा नखेलेको पनि पाँच सिजन भइसकेको छ । अहिले आर्सनलसँग त्यस्तो टिम छ, जसले शीर्ष चारका लागि चुनौती पेस गर्न सक्छ । तर यो पक्कै पनि सजिलो काम हुने छैन् । क्लबको प्रदर्शन कस्तो हुने हो, त्यो धेरै हदसम्म व्यवस्थापक मिखेल आर्टेटामा पनि भर पर्नेछ । उनी कत्तिका राम्रा प्रशिक्षक हुन्, त्यसमा कुनै शंका छैन् ।
एस्टन भिल्ला
एस्टन भिल्लाले आफ्ना प्रमुख खेलाडी रहेका ज्याक ग्रेलिसलाई कति धेरै गुमाएको महसुस गर्ने हो, त्यो हेर्न लायक हुनेछ । ग्रेलिसले म्यानचेस्टर सिटीलाई आफ्नो गन्तब्य बनाइसकेका छन् । त्यसो त उसले केही नयाँ खेलाडी पक्कै भित्र्याएको छ र त्यसमा प्रमुख नाम रहेको छ, ड्यानी इंग्स । भिल्लाले यसपल्ट युरोपा लिगको लक्ष्य राख्न सक्छ । तर भिल्लाले कमजोर सुरुआत लियो भने त्यो अन्त्यसम्म पनि क्लबका लागि संघर्ष गर्नु पर्ने बाध्यता बन्न सक्छ ।
ब्रेन्टफोर्ड
प्रिमियर लिगका लागि ब्रेन्टफोर्ड नयाँ हो भने ब्रेन्टफोर्डका लागि प्रिमियर लिग उत्तिकै नयाँ । निकै लामो समयपछि इंग्लिस फुटबलको माथिल्लो डिभिजनमा फर्केको ब्रेन्टफोर्डसामु रहेको सबैभन्दा ठूलो चुनौती हो, के उसले आफूलाई रेलिगेसनबाट बचाउन सक्छ त ? पूरा सिजन लन्डनको यो क्लबका लागि यही चुनौती हुनेछ । यस सिजनको पहिलो खेल नै ब्रेन्टफोर्डको रहेको छ, त्यो पनि छिमेकी आर्सनलविरुद्ध । यो खेलले धेरै हदसम्म टिम के कस्तो छ, त्यो देखाउने छ ।
ब्राइटन
सबथोक आफूले चिताए जस्तै हुने हो भने सम्भवत: ब्राइटनले युरोपेली फुटबलका लागि चुनौती पेस गर्न सक्छ । गत सिजन पनि उसकै आफ्ना केही सामान्य भुलका कारण ब्राइटनले युरोपमा खेल्ने अवसर गुमाएको थियो । ब्राइटनको टिम कस्तो छ भने उसले लिगका ठूला टिमलाई पनि चुनौती पेस गर्न सक्छ । ठीक यही बेला डर के पनि छ भने ब्राइटनका केही खास खेलाडी चल्न सकेन् भने उसलाई डर पनि रहनेछ, कहीं अंक तालिकाको पुछारमा दबाब सहनु पर्ने त होइन ?
बर्नली
बर्नलीले फेरि एकपल्ट इंग्लिस फुटबलको माथिल्लो डिभिजनमा रहनकै लागि संघर्ष गर्नेछ, त्यसमा कुनै शंका नगरे हुन्छ । तर ठीक यहींनिर खुसीको तथ्य के छ भने बर्नलीले प्रिमियर लिगमा आफूलाई कसरी बचाउनु पर्छ, त्यो जानेको छ । बर्नलीका लागि लिगमा बच्नु र कपतिर राम्रो नतिजा निकाल्नु खास उद्देश्य हुन सक्छ । तर पनि पूरा सिजन बर्नलीमाथि खालि एउटै डर हुनेछ र त्यो रेलिगेसन नै हो । फेरि क्लबले कोही राम्रा नयाँ खेलाडी किनेको पनि छैन् ।
चेल्सी
पछिल्लो चार वर्षमा चेल्सीले उपाधिका लागि सबैभन्दा बलियो चुनौती यसै सिजन प्रस्तुत गर्न सक्नेछ । सिधा भन्दा चेल्सी यसपल्ट लिग उपाधिका लागि सबैभन्दा बलियो प्रत्यासीमध्ये एक हो । आखिरमा चेल्सी युरोपेली च्याम्पियन पनि हो । गत सिजन चेल्सीको सुरुआत राम्रो रहेन् । त्यसैले टिमको व्यवस्थापनमा आए, थोमस टुचेल । उनी आएपछि चेल्सीको प्रदर्शन नै फेरियो । अब उनकै नेतृत्वमा चेल्सीले अझ राम्रो गर्नेछ त ? यसको उत्तर सायद धेरै हदसम्म रोमेलु लुकाकुको प्रदर्शनमा पनि भर पर्नेछ ।
क्रिस्टल प्यालेस
प्रत्येक सिजन क्रिस्टल प्यालेसका लागि युरोपमा खेल्ने सपना हुन्छ र प्रत्येक अवसरमा यो अन्तिम सयममा टुट्छ पनि । यसपल्टको कथा पनि त्यही हो, क्रिस्टल प्यालेसले फेरि एकपल्ट युरोपमा खेल्न लागि प्रयास गर्नेछ । सायद यसका लागि उसलाई लिग भन्दा पनि कम बढी सहज हुन सक्नेछ । अहिले टिमका नयाँ प्रशिक्षक रहेका छन्, प्याट्रिक भिएरा । यी आर्सनल लेजेन्डले व्यवस्थापकका रूपमा अहिलेसम्म सम्झनलायक केही पनि गरेका छैनन्, त्यसैले उनी आफै एउटा चुनौती रहेका छन् ।
एभर्टन
सायद झिनो सम्भावना मान्न सकिन्छ, एभर्टनले युरोपमा खेल्ने अवसर मिलाउने । एभर्टनका लागि यसको बाटो लिग भन्दा पनि कप नै बढी हुन सक्नेछ । गुडसन पार्कमा समर्थक एक प्रकारले अन्यौलमा छन्, आफ्नो व्यवस्थापक राफेल बेटिनेजलाई लिएर । एभर्टनको खेलको विश्लेषण गर्ने हो उसको सबैभन्दा ठूलो विशेषता हो, सबैको धेरै विश्वास, तर अन्त्यमा शून्य उपलब्धी । यसपल्ट यही सत्यलाई तोड्ने सबैभन्दा ठूलो चुनौती हुनेछ, एभर्टन र बेनिटेज दुवैलाई । र, टिममा राम्रा खेलाडीको कुनै कमी छैन्, यो पनि सत्य हो ।
लिड्स युनाइटेड
गत सिजन माथिल्लो डिभिजनमा उक्लेर एक समय लिड्स युनाइटेडले तहल्का नै मच्चाएको थियो । तर अन्त्यमा लिड्स नवौं स्थानमा रह्यो । यसपल्ट पनि लिगको शीर्ष १० भित्र लिड्स पर्छ भने त्यो उपलब्धी नै हुने । लिड्सलाई लिएर समस्या के छ भने उपलब्ध टिमको आधारमा उसले आफू माथि रहेका टिमलाई खासै चुनौती दिन सक्दैन, त्यसैले यो मिड टेबल टिमनै रहनेछ । टिमको यसपल्ट सबैभन्दा बलियो पक्ष रहनेछ, प्रतिभाशाली प्याट्रिक बामफोर्ड आउनु ।
लेस्टर सिटी
लेस्टर सिटीले पछिल्लो दुई सिजन लगातार च्याम्पियन्स लिग छनोटको नजिक पुगेर पनि अन्तत: छनोट हुन सकेन् । यो निकै पीडादायी स्थिति थियो । तर यी दुवै अवसरमा टिमको प्रदर्शन आफैमा उत्साहनजक थियो । यसपल्ट पनि लेस्टरको लक्ष्य भनेको लिग तालिकाको शीर्ष चारमा प्रवेश नै हो । उसका लागि यसपल्ट युरोपा लिग जितेर च्याम्पियन्स लिगमा जाने बाटो पनि छ । अहिलेको टिममा प्रतिभाशाली खेलाडीको कुनै कमी छैन्, त्यसैले लेस्टरबाट धेरै आश गर्न सकिन्छ ।
लिभपुरपुल
सायद लिभरपुललाई अब खेलाडीको चोटको चिन्ता रहेन् । त्यसैले हामीले सम्भवत: सन् २०१९/२०२० को जस्तो लिभरपुल देख्न पाउन सक्छौं । त्यसो हो भने लिभरपुलले फेरि एकपल्ट लिग उपाधि जित्न सक्छ । म्यानचेस्टर सिटीलाई फेरि उपाधि जित्नबाट रोक्न सक्नेमा योर्गन क्लोपको लिभरपुल पनि पर्छ । यो मर्सिसाइड क्लबले यस्तै गर्ने हो भने उसको सबैभन्दा ठूलो काम हुनेछ, घरेलु एनफिल्डमा राम्रो नतिजा निकाल्ने । गत सिजन घरमै लिभरपुलले साह्रै खराव खेलेको थियो ।
म्यानचेस्टर सिटी
म्यानचेस्टर सिटीलाई फेरि एकपल्ट इंग्लिस प्रिमियर लिग जित्न धेरै गाह्रो नहन सक्छ, भलै यसका लागि कडा परिश्रम आवश्यक छ । सिटीले जित्न नसकेको भनेको युरोपेली च्याम्यिपन्स लिग नै हो । पेप ग्वार्डिओलाका लागि त यो प्रतिष्ठाकै विषय भइसकेको छ । केही खेल पण्डित के सम्म पनि भन्छन् भने सिटीलाई घरेलु लिग र कप जित्नबाट रोक्न गाह्रै छ । उसको खास परीक्षा भनेको युरोपमै हो । हुन पनि सिटीको टिममा कुन चाहिं पक्ष पो कमजोर छ र ?
म्यानचेस्टर युनाइटेड
म्यानचेस्टर युनाइटेडलाई लिएर सबैभन्दा महत्त्वपूर्ण तथ्य, व्यवस्थापकमा ओले गन सोल्सार आएयता क्लबले अहिलेसम्म पनि एउटै उपाधि जित्न सकेको छैन् । यो समर्थकका लागि निकै निराशाजक पक्ष हो । अब अर्को उत्तिकै महत्त्वपूर्ण तथ्य, म्यानचेस्टर उपाधि जित्ने उपलब्धीबाट नजिक नजिक भने छ । जाडोन सान्चो र राफेल भरानो आएपछि पक्कै पनि टिम अझ बलियो बनेको छ । फेरि टिममा स्टार खेलाडीको कमी नै छैन्, खालि टिमले कहिले उपाधि जित्ने भन्ने मात्र हो ।
न्युकालस युनाइटेड
इंग्लिस फुटबलमा न्युकासल युनाइटेड खुबै लोकप्रिय क्लबमा पर्छ, तर यसको पछिल्लो इतिहास भने पक्कै गर्विलो छैन् । न्युकासल जत्तिको क्लबले यसपल्ट पनि रेलिगेसनबाट बच्न नै खेल्नेछ । यो आफैमा निकै दुखद परिस्थिति हो । पछिल्ला दुई सिजन यस्तै आरोप लागेको भए पनि न्युकासल खासमा रेलिगेसनमा भने परेन् । यस्तोमा क्लबको उद्देश्य यसपल्ट शीर्ष १० मा प्रवेश हुन सक्छ । टिमका प्रशिक्षक स्टिभ ब्रुसको खेलाउने शैलीलाई लिएर प्रश्न गर्ने पनि उत्तिकै छन्, यो अर्को खराव पक्ष हो ।
नर्विच
माथिल्लो डिभिजनमा उक्लेपछि नर्विच र यसका समर्थकको खुसी हेरिनसक्नु हुन्छ । तर यही क्लब सबैभन्दा पहिले रेलिगेसनमा पर्ने पनि हुन्छ । क्लबको इतिहासमै उसले खालि तीन पल्ट मात्र माथिल्लो डिभिजनमा बाँच्न सकेको छ । यो आफैमा निकै खराव इतिहास हो । त्यसैले भन्नै पर्छ, यसपल्ट पनि नर्विचले रेलिगेसनबाट बच्नकै लागि खेल्नेछ । बचे, त्यही उपलब्धी । त्यसैले मुख्य प्रश्न हो, नर्विचले इतिहासबाट किन पाठ सिक्दैन् ? किन गोल र बारुदविना नै युद्धको मैदानमा उत्रिन्छ ?
साउथह्याम्टपन
साउथह्याम्पटनलाई दशा लागेको हुनु पर्छ, नत्र उसले आफ्ना प्रमुख खेलाडी डानी इंग्सलाई गुमाउन थिएन् । तर उनको स्थानमा साउथह्याम्पटनले केही चलाखी गरेर नयाँ खेलाडी पनि भित्र्याएको छ । खासमा यो पनि मिड टेबलमा बस्न रूचाउने टिम हो, अबको सिजन शीर्ष दस भित्र रहे, त्यो पनि उपलब्धी नै हुनेछ । साउथह्याम्पटनलाई सबैभन्दा बढी चाहिने भनेको एकनासे खेल नै हो, न कि कहिले राम्रो कहिले खराव । यो टिम पक्कै रेलिगेसनमा पर्ने छैन् । तर युरोपतिर यसले नजर पनि लगाउन सक्ने छैन् ।
टोटनहम
टोटनहमले आफ्ना समर्थकलाई दिन खोजेको संदेश हो, क्लबलाई समर्थन गरिरहनु, मज्जा पनि लिनु, तर केही जित्ने छ भनेर आश पनि नगर्नु । पछिल्लो केही सिजन टोटनहमका लागि राम्रो रहेन्, जोसे मउरिन्हो जत्तिको व्यवस्थापकले पनि केही गर्न सकेन् । उल्टै उनले टिमलाई बिगारेर गए । अहिले नयाँ व्यवस्थाक छन्, नुनु सान्टोका रूपमा । तर उनी पनि विचरा नै छन्, प्रमुख खेलाडी तथा कप्तान ह्यारी केनविना उनले पनि के नै गर्न सक्छन् र ? यी सबैका बाववजुत टोटनहमले अर्को सिजन युरोपमा खेल्छ भने त्यो उपलब्धी नै हुने ।
वाटफोर्ड
बढुवा खाएर प्रिमियर लिगमा आएको अर्को क्लब हो, वाटफोर्ड । बढुवा हुने टिमको समस्या यही हुन्छ, फेरि कसरी यसमै टिकेर बस्ने भनेर । वाटफोर्डका लागि पनि इंग्लिस फुटबलको माथिल्लो डिभिजनमा कायम रहनु नै मुख्य चुनौती हो । त्यसका लागि वाटफोर्डले कम्तीमा खराव सुरुआत लिनु हुन्न । प्रिमियर लिगमै हुँदा वाटफोर्डलाई जहिल्यै गोल गर्नमा समस्या हुन्थ्यो । यसपल्ट यसलाई सल्टाउन अत्यावश्यक छ नै । साँच्चै वाटफोर्डले नियमित अन्तरमा गोल निकाल्छ भने यो टिम प्रिमियर लिगमै रहनेछ ।
वेस्ट ह्याम
वेस्ट ह्यामका समर्थक हुनुको मज्जा के भने यो क्लबले कहिलेकाहीं निकै चोट पनि दिने गर्छ, कहिलेकाहीं उत्तिकै मीठा उपलब्धी पनि । पोहोर वेस्ट ह्यामले लगभग गज्जब जस्तै खेल्यो । यसपल्ट पनि वेस्ट ह्यामले यस्तै खेल्नेछ, विश्वास गर्न सकिन्छ । अझ भन्ने हो भने वेस्ट ह्यामले युरोपका लागि मज्जाले प्रयास गर्न सक्छ, यत्तिको टिम छ पनि । क्लबले व्यवस्थापक डेविड मोयसलाई विश्वास कायम राख्छ भने वेस्ट ह्यामले शीर्ष आठमा पक्कै स्थान बनाउने छ ।
उल्भ्स
उल्भ्समा नुनो सान्टोका रूपमा अब उम्दा व्यवस्थापक रहेन् । यो नै क्लबको यस सिजन सबैभन्दा ठूलो समस्या हो । अहिले ब्रुना लागेको जिम्मामा छ, टिम । उनी धेरैका लागि नयाँ छन्, अझ अपरिचत नै छन् भन्दा पनि हुन्छ । गत सिजन टिमको प्रदर्शन उतारचढावपूर्ण रह्यो । तर उल्भ्सले सबैको मन छुने खेल भने खेल्छ, यसमा शंका नगरे हुन्छ । उल्भ्सले पनि अर्को सिजन युरोपमा खेल्ने सपना साँचेर खेल्न सक्छ । यस्तो भन्दैमा केही खराव नतिजापछि पनि उल्भ्सलाई रेलिगेसनको चिन्ता हुने छैन्, यसलाई पनि ठ्याक्कै भन्न सकिन्न ।
-1751975074.jpeg)
