एजेन्सी । भारतीय क्रिकेट टोलीका कप्तान विराट कोहली टेष्ट क्रिकेटको ब्याट्सम्यानतर्फ शीर्ष स्थानमा फर्किन सफल भएका छन् ।
अन्तर्राष्ट्रिय क्रिकेट काउन्सिल (आईसीसी) ले बिहिबार सार्वजनिक गरेको टेष्ट ब्याट्सम्यानको नयाँ वरियतामा कोहली शीर्ष स्थानमा फर्किएका हुन् । कोहलीले अष्ट्रेलियाका पुर्व कप्तान स्टेभेन स्मिथलाई पछि पार्दै शीर्ष स्थानमा आएका हुन् ।
नयाँ वरीयता अनुसार कोहलीले ९३७ अंक प्राप्त गरेका छन् । इंग्ल्यान्डविरुद्ध टेष्टमा उत्कृष्ट प्रदर्शन गरेपछि कोहली शीर्ष स्थानमा फर्किएका हुन् । नयाँ वरियताको दोस्रो स्थानमा रहेका स्मिथले ९२९ अंक पाएका छन् ।
तेस्रो स्थानमा रहेका न्युजिल्यान्डका केन विलियम्सनले ८४७ अंक जोडेका छन् । यस्तै अष्ट्रेलियाका पुर्व उपकप्तान डेभिड वार्नर ९२० अंकसहित चौथो र ८१८ अंकसहित इंग्ल्यान्डका जोए रुट पाँचौ स्थानमा रहेका छन् ।
टेष्ट क्रिकेटकै ब्याट्सम्यानतर्फ भारतका चेतेश्वर पुजारा, श्रीलंकाका दिमुथ करुनारत्ने, श्रीलंकाकै दिनेश चण्डीमाल, दक्षिण अफ्रिकाका डीन एल्गेर र अफ्रिकाकै एडीन मार्क्रम क्रमशः छैटौंदेखि दशौ स्थानमा रहेका छन् ।
