काठमाडौं। बुलावायोमा भएको दोस्रो टेस्टको पहिलो दिन दक्षिण अफ्रिकाका वियान मुल्डरले आफ्नो कप्तानी डेब्यूमा अविजित २६४ रन बनाएर इतिहास रचे।
दक्षिण अफ्रिकाले खेल समाप्त हुँदा जिम्बाब्वेविरुद्ध ४ विकेट गुमाएर ४६५ रनको विशाल स्कोर बनाएको थियो। अन्तिम सत्रमा मात्र २२२ रन बनायो।
केशव महाराजको अनुपस्थितिमा मुल्डरलाई कप्तान नियुक्त गरिएको थियो। उनले डेब्यूमा सबैभन्दा धेरै व्यक्तिगत स्कोर बनाउँदै न्युजिल्यान्डका ग्राहम डोवलिङको कीर्तिमान भंग गरे।
डोवलिङले सन् १९६८ मा क्राइस्टचर्चमा भारतविरुद्धको आफ्नो पहिलो कप्तानी इनिङ्समा २३९ रन बनाएका थिए। यो दक्षिण अफ्रिकी ब्याटरले जिम्बाब्वेविरुद्ध बनाएको यो उच्चतम स्कोर पनि हो । मुल्डरले सन् २००१ मा हरारेमा ग्यारी कर्स्टनले बनाएको २२० रनको कीर्तिमानलाई पनि भंग गरे।
मुल्डरले आफ्नो दोहोरो शतक २१४ बलमा पूरा गरेका हुन्। दक्षिण अफ्रिकी खेलाडीको दोस्रो सबैभन्दा छिटो दोहोरो शतक पनि हो। उनीभन्दा पहिले हर्शेल गिब्सले सन् २००३ मा पाकिस्तानविरुद्ध २११ बलमा दोहोरो शतक बनाएका थिए।
यस म्याराथन इनिङ्सको क्रममा मुल्डरले ३४ चौका र ३ छक्का प्रहार गरे। यो दक्षिण अफ्रिकी खेलाडीको एक इनिङ्समा सबैभन्दा धेरै चौका प्रहार गर्ने कीर्तिमान हो । यसअघि यो कीर्तिमान ग्रीम स्मिथको नाममा थियो। उनले २७७ रनको इनिङ्समा ३५ चौका प्रहार गरेका थिए।
यो एकै दिनमा कुनै पनि दक्षिण अफ्रिकी ब्याटरले बनाएको उच्चतम स्कोर पनि हो। मुल्डरले सन् २००३ मा पाकिस्तानविरुद्ध गिब्सले बनाएको २२८ रनको कीर्तिमान तोडे।
विश्वव्यापी तथ्याङ्कको हिसाबले उनी सूचीमा छैटौं स्थानमा छन्। शीर्ष स्थानमा डन ब्राडम्यान छन्। उनले सन् १९३० मा लीड्समा इङ्ग्ल्यान्डविरुद्ध ३०९ रन बनाएका थिए।
