काठमाडौं । ७५ सालको भदौमा बंगलादेशमा सम्पन्न १२ औं संस्करणको साफ च्याम्पियनसिपमा नेपालका पूर्व कप्तान विराज महर्जनले एक कीर्तिमान बनाएका थिए ।
विराजले बंगलादेश साफबाट देशका लागि सर्वाधिक क्याप जित्ने खेलाडीको कीर्तिमान आफ्नो नाममा लेखाएका थिए ।
उनले पूर्व खेलाडी राजुकाजी शाक्यको नाममा रहेको ६८ क्यापको कीर्तिमान भङ्ग गरेका थिए ।
खेलाडी जीवन र प्रशिक्षकको रुपमा नेपाललाईतीन पटक दक्षिण एसियाली खेलकुद (साग) को स्वर्ण पदक दिलाउन सफल राजुकाजीले १७ वर्षे अन्तर्राष्ट्रिय करियरमा ६८ क्याप जितेका थिए ।
विराजले ढाका साफको उद्घाटन खेलमा पाकिस्तानविरुद्ध मैदान उत्रदै राजुकाजीसँग बराबरी गरेका थिए । उक्त खेलमा नेपाल २–१ गोल अन्तरले पराजित भयो ।
तर, भुटानविरुद्ध दोस्रो खेलमा ४–० को जितमा विराजले कीर्तिमान बनाएका थिए । विराजले अहिलेसम्म ७२ क्याप पुरा गरिसकेका छन् ।
साफ पछि विराजले ३ खेलमात्रै खेलेका छन् । स्विडिस प्रशिक्षक जोहान कालिनको आगमनसँगै विराजले नेपालका लागि कम खेल खेलेका छन् ।
नेपालका लागि सर्वाधिक धेरै क्याप जित्ने तीन खेलाडीको चर्चा तल गरिएको छ ।
विराज महर्जन
डिफेन्डर विराजले सन् २००८ मा राष्ट्रिय टिममा डेब्यु गरेका थिए । पोखरामा भएको पाकिस्तानसँगको मैत्रीपूर्ण खेलमा विराजले राष्ट्रिय टिममा डेब्यु गरेका थिए ।
तर, गत वर्षको जेठ १९ मा मलेसियाविरुद्ध भएको मैत्रीपूर्ण खेल यता भने विराज टिम बाहिर छन् । संन्यासको संघारमा रहेका विराज सुखद् विदाईको पर्खामा छन् ।
विराज नेपालका लागि सर्वाधिक क्याप जित्ने खेलाडी हुन् । अहिलेसम्म उनले ७२ क्याप जितिसकेका छन् ।
बंगलादेशको १२ औं साफ च्याम्पियनसिपमा भुटानविरुद्ध मैदान उत्रदै उनले ६८ क्यापको कीर्तिमान ‘ब्रेक’ गरेका थिए । त्यसयता उनले ताजकिस्तान, कुवेत र मलेसियाविरुद्ध मात्रै खेलेका छन् ।
उनले गत वर्षको लिग मछिन्द्र फुटबल क्लबबाट खेलेका थिए । मछिन्द्रले सहिद स्मारक 'ए' डिभिजन लिगको उपाधि जितेको थियो ।
विराजले थ्रीस्टार, मनाङ मर्स्याङ्दी क्लब र मछिन्द्रबाट लिगको उपाधि जितेका छन् ।
राजु काजी शाक्य
राष्ट्रिय टिमको प्रशिक्षक समेत रहिसकेका राजुले सन् १९८१ बाट नेपाली टिमको प्रतिनिधित्व गरेका थिए । सन् १९९७ मा संन्यास लिएका उनले १७ वर्ष राष्ट्रिय टिमबाट खेलेका थिए ।
पूर्व कप्तान समेत रहेका शाक्य नेपालका लागि सर्वाधिक क्याप जित्ने खेलाडीको दोस्रो स्थानमा रहेका छन् । शाक्यले ६८ क्याप जितेका छन् । उनको कीर्तिमान विराज महर्जनले तोडेका थिए ।
सिक्किममा भएको गर्भर्नस गोल्डकपबाट डेब्यु गरेका शाक्यले पहिलो साफ च्याम्पियनसिप अन्तर्गत पाकिस्तानविरुद्धको खेलसँगै सन्यास लिएका थिए ।
राजुले सन् १९८४ र १९९३ को सागमा नेपाललाई स्वर्ण पटक जिताएका थिए । पछिल्लो स्वर्ण भने उनले आफ्नो कप्तानीमै भित्राएका हुन् । यस्तै उनले सन् २०१६ आफ्नै प्रशिक्षणमा नेपाली टिमलाई स्वर्ण दिलाएका हुन् ।
पछिल्लो समय उनी ए डिभिजन लिगका प्रशिक्षक रहेका छन् । गत वर्षको शीर्ष डिभिजन लिगमा उनले एनआरटी सम्हालेका थिए ।
किरण कुमार लिम्बु
नेपाली राष्ट्रिय टोलीका कप्तान ततः गोलकिपर किरण कुमार लिम्बु (चेम्जोङ) नेपालका लागि सर्वाधिक क्याप जित्ने खेलाडीको तेस्रो स्थानमा रहेका छन् ।
भारतीय आई लिग क्लब पञ्जाब एफसीबाट खेलिरहेका किरणले ६२ क्याप जितेका छन् ।
विराजको बर्हिगमनसँगै राष्ट्रिय टिमका कप्तानी किरणले सम्हालिरहेका छन् ।
राष्ट्रिय टिममा नियमित रहेका कारण किरणले विराजको नाममा रहेको कीर्तिमान तोड्न सक्ने सम्भावना रहेको छ ।
किरणले कुवेतविरुद्ध भुटानमा खेलिएको होम खेलमा नेपालको प्रतिनिधित्व गर्दै ६२ क्याप पुरा गरेका हुन् । किरण सन् २००८ बाट राष्ट्रिय टिममा नियमित रुपमा रहेका छन् ।
