काठमाडौं । त्रिभुवन आर्मी क्लबका मिडफिल्डर सन्तोष तामाङले खेलाडीमा धैर्यता नहुँदा चालू सिजनको लिग उपाधिबाट बञ्चित हुनु परेको बताएका छन् ।
राष्ट्रिय फुटबल टिमका मिडफिल्डर समेत रहिसकेका सन्तोषले अन्तिम खेलमा खेलाडीमा घमण्ड बढ्दा र धैर्यता गुमाउँदा लिग उपाधि गुमाउनु परेको खुलासा गरेका हुन् ।
चालू सिजनको सहिद स्मारक ए डिभिजन लिगको उपाधि भिडन्तको अन्तिम खेलमा आर्मी क्लब मछिन्द्रसंग पराजित बनेको थियो । लिगको अन्तिम खेलमा आर्मीलाई १–० ले हराउँदै मछिन्द्र पहिलो पटक लिग च्याम्पियन बनेको थियो ।
‘त्यो अन्तिम दिन हामीमा धैर्यता भएन । खेलाडीमा जित्नुपर्छ भन्ने मात्रै भयो । जुन टिमलाई पनि जित्न सक्छौै भन्ने भाव थियो ।’ सन्तोषले खेलपाटीसंग भने, ‘बाहिर आर्मी बलियो टिम मानिएको थियो । सबैमा घमण्ड पनि थियो । अन्तिम खेलमा पनि गोल गरेरै जित्ने भनेर लाग्यौ ।’
लिग उपाधि उचाल्न आर्मीलाई बराबरीको नतिजा पर्याप्त थियो । प्रतिद्धन्दी मछिन्द्रलाई जित्नुपर्ने दबाब थियो । आर्मी पहिलो पटक उपाधिको नजिक समेत थियो । तर अन्तिम खेलमा लय गुमाउँदा आर्मीले लिग उपाधि मछिन्द्रलाई सुम्पिएको थियो ।
अन्तिम खेल अघिसम्म आर्मीलाई लिगका प्रमुख दाबेदार मानिएको थियो । प्रतियोगिता अवधिभर आर्मीको गति र लयलाई हेरेर सबैले विभागीय टिमलाई प्रवल दाबेदारको रुपमा चित्रित गरेका थिए ।
तर, फागुन ३ गते दशरथ रंगशालामा भएको अन्तिम खेलमा आर्मीले बिर्सनलायक खेल प्रदर्शन गर्याे ।
उपाधि उचाल्न मछिन्द्रलाई जित्नैपर्ने दबाब थियो भने आर्मीलाई बराबरीको नतिजानै पर्याप्त थियो ।
लिगको अन्तिम खेलमा आर्मीले सुरुवातबाटै दबाब झेल्यो । खेलको ३३ औ मिनेटमा आर्मीले आफ्नै पोस्टमा गोल गर्यो । सोही गोल उपाधि छिनोफानोका लागि निर्णायक बन्यो ।
लिगका १२ खेलमै ९० मिनेट मैदान बिताएका गोलरक्षक विकेश कुथु अन्तिम खेलमा घाईते देखिए । उनलाई तत्काल हस्पिटल लगियो । आर्मी थप दबाबमा आयो । विभागीय टिम खेलमा फर्कनै सकेन । अनि आर्मीको पहिलो पटक लिगको उपाधि जित्ने लक्ष्य असफल बनेको थियो । ठुलो लगानी सहित लिगमा उत्रिएको मछिन्द्रले ऐतिहासिक उपाधि हात पार्न सफल भयो ।
खेल जितेपछि मछिन्द्रका खेलाडी, अफिसियल तथा समर्थक खुसीले उफ्रिएका थिए । आर्मीका खेलाडी भने मैदानमा लडिरहेका थिए । आमीका लागि अन्तिम खेल निकै पिडादायी रहन गयो ।
सन्तोष आर्मीको टिमका मुख्य खेलाडी थिए ।
सेन्टर मिडफिल्डमा सेसेहाङ आङदेम्बेसंग उनको तालमेल गज्जव देखिन्थ्यो । सन्तोष र सेसेहाङको जोडीले विपक्षी टिमको रक्षापङ्तीलाई लिग अवधिभर दुख दिएको थियो ।
आर्मीका प्रशिक्षक नविन न्यौपानेले दुवै खेलाडीलाईनै आफ्नो मुख्य हतियार बनाएका थिए । अन्तिम खेलमा दुई मिडफिल्डरबीच तालमेल नमिल्दा हार ब्यहोरेको उनको प्रतिक्रिया थियो ।
फ्रेन्ड्स क्लबबाट आफ्नो करियर सुरु गरेका ललितपुर निवासी सन्तोष विगत ४ बर्षयता आर्मीसँग आवद्ध छन् । उनी आर्मीका जागिरे हुन् ।
स्विडेनका प्रशिक्षक योहान कालिन राष्ट्रिय फुटबल टिमको मुख्य प्रशिक्षकमा आएपछि सन्तोषले राष्ट्रिय टिमबाट मौका पाउँदै आएका थिए । कालिनको पहिलो कुवेत भ्रमण क्रममा सन्तोषले राष्ट्रिय टिमबाट डेब्युको अवसर पाए । त्यसयता उनले राष्ट्रिय टिमबाट लगातार ६ क्याप जिते ।
तर सन्तोष पछिल्लो ७ महिना राष्ट्रिय टिम बाहिर छन् ।
विश्वकप छनोट अन्तर्गत भुटानमा भएको कुवेतबिरुद्धको खेल अगाडी टिम भावना विपरित गतिविधि गरेको भन्दै सन्तोष सहित चार खेलाडीलाई एन्फाले प्रतिबन्ध गर्यो । उनले राष्ट्रिय टिमसंगै क्लब फुटबलबाट समेत खेल्न पाएनन् । जुन दिनलाई सन्तोष बिर्सेर पनि सम्झन चाहदैनन् ।
‘त्यो घटना जे भयो अब सम्झन चाहन्न । त्यसलाई नकारेर अगाडि बढिरहेको छु ।’ सन्तोषले भने ।
सन्तोष राष्ट्रिय टिममा आफ्नो पुनरागमनलाई सबैभन्दा कठिन चुनौती मान्छन् ।
‘राष्ट्रिय टिममा पर्न एकदमै गाह्रो छ । युवा खेलाडीले निकैनै मेहनत गरेका छन् । अझ बढी मेहनत गर्नुपर्ने भएको छ । त्यही अनुसारको लक्ष्य बनाएको छ ।’ सन्तोषले भने ।
एन्फाको कारबाही फुकुवापछि मैदान छिरेका सन्तोषले पहिलो खेलमै थ्रीस्टारविरुद्ध गोल गर्दै सनसनी मच्चाएका थिए । लिग अवधिभर उनले ४ गोल गरे ।
घरेलु फुटबलमा सबै दाबेदार देखिदै आएको आर्मी अहिलेसम्म लिगमा उपाधि विहिन छ । आर्मीले घरेलु फुटबलमा अभागी टोलीको पहिचान बनाएको छ । तर सन्तोष आर्मीले चाँडै लिग उपाधि जितेर देखाउने प्रतिबद्धता व्यक्त गर्छन् ।
‘मलाई पनि लाग्छ, कतै आर्मीलाई लिगनै नफापेको हो कि ? तर एकदिन जितेरै छाड्छौं । मेहनत गर्न छाड्ने छैनौ । एकदिन कसो नतिजा नआउँला !’ उनी भन्छन् ।
