काठमाडौं । जुमानु राई, भोला सिलवाल, सन्तोष साहुखल, राजु तामाङ र विराज महर्जन कुनै समय नेपाली फुटबलका स्टार थिए ।
पछिल्लो समय उनीहरु राष्ट्रिय टिमबाट बाहिर रहदै आएका छन् । तर, उनीहरुले फुटबलबाट सन्यास घोषणा भने गरिसकेका छैनन् ।
राजुले बाहेक अन्य खेलाडीले क्लब फुटबल खेलिरहेका छन् । यद्दपी पाँचै खेलाडी सन्यासको संघारमा रहेका छन् ।
सन्यासको संघारमा रहेका उनीहरु सुखद विदाईको पर्खाइमा छन् । उनीहरु पूर्व कप्तान तथा गोलरक्षक उपेन्द्रमान सिंह, पूर्व स्ट्राइकर हरि खड्का, पूर्व कप्तान अनिल गुरुङले जस्तै अखिल नेपाल फुटबल संघ (एन्फा) बाट सुखद विदाई चाहन्छन् । सुखद विदाईका लागि उनीहरुले एन्फासँग पनि आग्रह गरिसकेका छन् ।
पाँचै खेलाडीको एउटै भनाई छ, ‘हामीलाई सुखद विदाई दिनुहोस् । हामीले गरेको मेहनतको कदर गर्दिनुस् ।’
जुमानु राई
नेपाली फुटबलले पाएको स्ट्राइकर मध्येका जुमानु एक उच्च कोटीका खेलाडी हुन् । नेपाल पुलिसका प्रहरी नायब निरीक्षक (सई) रहेका जुमानु नेपाली राष्ट्रिय टिमका आक्रामक खेलाडीमा गनिन्छन् ।
जुमानुले राष्ट्रिय टिमबाट ११ गोल गरिसकेका छन् । जुन सर्वाधिक गोल गर्ने निराजन रायमाझी र हरि खड्का भन्दा २ गोलले पछि हो ।
सन् २००६ मा ब्रुनाईविरुद्ध राष्ट्रिय टिमबाट डेब्यु गरेका जुमानु सन् २०१५ मा भारतविरुद्ध भएको खेलसँगै राष्ट्रिय टिमबाट बाहिर छन् । वर्तमान नेपाली टिमका डिफेन्डर अनन्त तामाङले यसै खेलबाट डेब्यु मौका पाएका थिए ।
गत वर्षको सहिद स्मारक 'ए' डिभिजन लिगमा जुमानुले ह्याट्रिक पुरा गरेका थिए । विभागीय मिसनबाट फर्किएपछि जुमानुले लिग खेलेका थिए ।
भोला सिलवाल
राष्ट्रिय टिमको मिडलाईनबाट उत्कृष्ट बल सप्लाई गर्ने खेलाडीमा पर्छन् भोला सिलवाल । एक समय नेपाली टिमका लागि नभई नहुने खेलाडी थिए । तर, चोटका कारण मैदान बाहिर रहँदा उनी राष्ट्रिय टिमबाट बिस्तारै बाहिरिए ।
सन् २००८ बाट राष्ट्रिय टिममा रहेका भोला सन् २०१६ बाट भने टिम बाहिर छन् । पछिल्लो समय भोलाले नेपाल निलोको नेतृत्व गर्दै दशरथ रंशगालामा जापानीज फुटबल लिगको टिमसँग खेलेपनि त्यो खेल कुनै आधिकारीक थिएन् ।
नेपाल पुलिसका प्रहरी नायब निरीक्षक (सई) समेत रहेका भोला लिगपछि मोफसलका प्रतियोगिता खेलिरहेका छन् ।
राजु तामाङ
सन् २००५ मा श्रीलंकामा भएको साफ च्याम्पियनसिपबाट राजुले नेपाली राष्ट्रिय फुटबल टिममा डेब्यु गरेका थिए । नेपाल आर्मीका जागिरे समेत रहेका राजुले सन् २००५ बाट २०१५ सम्म निरन्तर खेले ।
राजु नेपाली फुटबलका उत्कृष्ट मिडफिल्डरको अग्रपंक्तिमा आउने गर्छन् । तर, राजु ७३ सालयता भने राष्ट्रिय टिम बाहिर रहेका छन् ।
उनी अहिले सुखद विदाईको तयारीमा छन् । अहिले भने राजु टर्च लाईनमा देखिन थालेका छन् ।
सन्तोष साहुखल
सन्तोष साहुखल अन्तर्राष्ट्रिय फुटबलमा भन्दा पनि घरेलु फुटबलमा धेरै भाग्यशाली र चर्चित रहे । उनी शीर्ष डिभिजनको लिगमा १०० गोल पुरा गर्ने एकल खेलाडी हुन् । गत वर्षको सहिद स्मारक ए डिभिजन लिगमा सन्तोषले च्यासल युथ क्लबबाट खेल्दै सय गोलको कोशेढुंगा पार गरेका थिए ।
सन् २००७ बाट राष्ट्रिय टिमबाट डेब्यु गरेका सन्तोष २०१५ बाट भने टिम बाहिर रहँदै आएका छन् । उनले राष्ट्रिय टिममा रहँदा २९ खेल खेलेका छन् भने ४ गोल गरेका छन् ।
लिग खेल्न स्वदेश आउने गरेपनि सन्तोष जापान बस्दै आईरहेका छन् ।
विराज महर्जन
नेपाली फुटबलमा सर्वाधिक क्याप जित्ने खेलाडीमा पर्छन् विराज महर्जन । उनले गत सागमा ६८ क्याप पुरा गर्दै पूर्व कप्तान राजुकाजी शाक्यको नाममा रहेको सर्वाधिक क्यापको कीर्तिमानी तोडेका थिए ।
पूर्व कप्तान समेत रहेका लेफ्ट ब्याक विराजले ७२ क्याप पुरा गरिसकेका छन् । सन् २००८ मा पाकिस्तानविरुद्ध पोखरामा भएको ‘होम एण्ड अवे’ मैत्रीपूर्ण खेलका क्रममा विराजले राष्ट्रिय टिमबाट डेब्यु गरेका थिए ।
त्यस यता लगातार एघार वर्ष राष्ट्रिय टिमबाट खेलेका विराजले एक गोल समेत गरेका छन् । सन् २००९ मा दशरथ रंगशालामा विराजले किर्गीस्तानविरुद्ध फ्रिकिक मार्फत आकर्षक गोल गरेका थिए ।
पाकिस्तानविरुद्ध डेब्यु गरेका विराजले गत जेठ १९ मलेसियाविरुद्ध भएको अवे खेलमा अन्तिम पटक नेपाली टिमको आर्म ब्याण्ड लगाएका थिए । जुन खेलमा उनले ९० मिनेटनै मैदानमा बिताएका थिए ।
मुख्य प्रशिक्षक जोहान कालिनसँग सम्बन्ध चिसिएसँगै टिम बाहिर रहेका विराज मछिन्द्र क्लबबाट घरेलु फुटबलमा रमाईरहेका छन् ।
