काठमाडौं । राष्ट्रिय फुटबल टिमका फरवार्ड बिमल घर्तिमगर मछिन्द्र क्लबमा आबद्व भएका छन् ।
ए डिभिजन लिगको अन्तिम चरणको खेल अगाडी मछिन्द्र क्लबले राष्ट्रिय फुटबल टिमका फरवार्ड बिमललाई क्लबमा आबद्व गरेको हो ।
सम्झौतासंगै बिमलले लिगको अन्तिम खेल मछिन्द्रको जर्सीमा उत्रनेछन् ।
'बिमललाई क्लबमा आबद्व गरेका छौ । लिगको अन्तिम खेल बिमलले मछिन्द्रबाट खेल्छन् ।' क्लबका म्यानेजर अनिल श्रेष्ठले खेलपाटीलाई भने ।
श्रेष्ठका अनुसार बिमलले लिगसंगै मोफसलका खेल समेत मछिन्द्रबाटै खेल्नेछन् । बैशाखमा हुने राष्ट्रिय लिगलाई हेरेर बिमललाई क्लबमा आबद्व गरिएको श्रेष्ठको भनाई छ ।
मुख्य फरवार्ड अभिषेक रिजाल माल्दिभ्सको लिग खेल्न हिडेपछि मछिन्द्र क्लब फरवार्डको खोजीमा थियो ।
करिब तीन महिनाको निलम्बनबाट फुकुवा हुने संघारमा रहेको बिमललाई मछिन्द्रले अनुबन्धन गरेको हो ।
बिमलले माल्दिभ्सको टीसी स्पोर्ट्स क्लबबाट ब्यवसायीक लिग खेल्दै आएका थिए । कारबाहीमा परेपछि उनी नेपालमै थिए । उनले लिगको सुरुवातमा न्युरोड टिम एनआरटीमा रहेर अभ्यास गरिरहेका थिए । पछिल्लो समय उनी मछिन्द्र क्लबका खेलाडीसंग अभ्यासमा देखिएका थिए ।
राष्ट्रिय टिमबाट विश्वकप छनोटको खेल खेल्न भुटान उड्नु अघिल्लो रात नाईट क्लबमा भेटिएपछि बिमल सहित राष्ट्रिय फुटबल टिमका चार खेलाडीलाई एन्फाले कारबाही गरेको थियो ।
बिमल सहित अन्जन विष्ट, दिनेश राजवंशी र सन्तोष तामाङ एन्फाको कारबाहीमा परेका थिए । अन्जन र सन्तोषलाई ४५ दिन फुटबल खेल्न प्रतिबन्ध लगाईएको थियो भने विमल र दिनेशलाई ९० दिनको प्रतिबन्ध लागेको थियो ।
बिमल ९० दिनको प्रतिबन्धको कारबाही भोगेर फुटबलमा फर्किन लागेको हुन् । अन्जन र सन्तोष क्लब फुटबलमा फर्किसकेका छन् । उनै सन्तोषको प्रेरणादायी प्रर्दशनमा आर्मी लिग च्याम्पियन बन्ने संघारमा आईपुगेको छ ।
एन्फाको अनुशासन कमिलिे मंसिर २७ गतेदेखि लागु हुने गरि बिमल सहितका खेलाडीलाई कारबाही गरेको थियो ।
तर क्लब र खेलाडीको अपिलका आधारमा घटना भएको दिन कात्तिक ३० गतेलाई आधार बनाएर प्रतिबन्धको समय घटाईएको थियो ।
बिमलमाथिको प्रतिबन्ध फागुन १ गते भोली (बिहिबार) सकिदैछ ।
मछिन्द्रले फागुन ३ गते लिगको अन्तिम खेल खेल्दैछ । सोही खेलले यस बर्षको सहिद स्मारक ए डिभिजन लिग विजेता टोलीको टुङ्गो लगाउनेछ ।
बिमलको अनुबन्धनसंगै मछिन्द्रले लिग अगाडी आर्मीमाथि मानसिक दबाब बढाएको छ । आर्मी २९ अंक जोडेर लिगको शीर्ष स्थानमा छ । मछिन्द्र २८ अंक सहित दोस्रो स्थानमा छ ।
