पोखरा । पर्यटकीय सहर पोखरामा आयोजना हुने पोखरा प्रिमियर लिग (पीपीएल) टी – ट्वान्टी क्रिकेट प्रतियोगिताको लागि मैदान निर्माण कार्य दुई महिना भित्र सकिने भएको छ ।
आगामी कार्तिकमा हुने पहिलो संस्करणको पीपीएल क्रिकेटको लागि पोखरा रंगशालाभित्र रहेको क्रिकेट मैदान निर्माण कार्य तीव्र गतिमा अघि बढेको र दुई महिनाभित्र सम्पन्न हुने आयोजक क्विन्स इभेन्ट्स म्यानेजमेन्ट प्रालिले जनाएको छ ।
आयोजक क्विन्स इभेन्ट्सका प्रबन्ध निर्देशक छुम्बि लामाले मैदानको पिच निर्माणसंगै अन्य कार्य द्रुत गतीमा अघि बढेको खेलपाटीलाई बताए ।
'प्रतियोगिताको लागि चार वटा क्रिकेट पिच बनिरहेको छ, भारतबाट क्युरेटर आएर पिच निर्माण गरिरहेका छन् र आउट फिल्ड लगायतका कामहरु भईरहेको छ । दुई महिनाभित्र तयार हुनेछ,' प्रबन्ध निर्देशक लामाले भने ।
प्रबन्ध निर्देशक लामासहित नेपाली टोलीका मुख्य प्रशिक्षक जगत टमटा, कप्तान पारस खड्का र उपकप्तान ज्ञानेन्द्र मल्लको टोलीले आइतबार मैदानको निरीक्षण गरेका थिए ।
मैदानको पिच निर्माण भारतको मुम्बईबाट आएका पिच क्युरेटर सन्तोष सिंहले गरिरहेका छन् । यस्तै प्रतियोगिताको लागि ४५ हजार दर्शक क्षमताको कृतिम प्याराफिट निर्माण भईरहेको प्रबन्ध निर्देशक लामाले बताए । प्रबन्ध निर्देशक लामाले प्रतियोगिताको लागि पेभेलियन, बाउण्ड्री रोप, स्थायी स्कोरबोर्डको व्यवस्थापन भईरहेको पनि बताए ।
सर्वाधिक पुरस्कार राशीको हुने लिग कार्तिक ९ देखि २० सम्म संचालन हुनेछ । लिगमा एभरेष्ट प्रिमियर लिग र धनगढी प्रिमियर लिग खेल्ने ६ टोली र ३ नयाँ टोलीले यो प्रतियोगितामा सहभागिता जनाउने छन् ।
फ्रेन्चाइज बेसमा नेपालका प्रमुख सहरको स्वामित्वमा रहने टिमले खेलाडी अक्सनबाट छनोट गर्नेछन् । टिम र अक्सनबारे पछि जानकारी गराईने छ ।
लिगमा दुई विदेशी खेलाडी रहनेछन् । अहिलेसम्म नेदरल्याण्ड, हङकङ, युएई लगायतका खेलाडी खेल्न इच्छुक रहेको आयोजक क्विन्स इभेन्ट्सका प्रबन्ध निर्देशक लामाले बताए ।
-1751975074.jpeg)
