काठमाडौं । राष्ट्रिय फुटबल टिमका मिडफिल्डर रोहित चन्दले पर्सिजा जाकार्तासँग सम्झौता नविकरण गर्ने भएका छन् ।
नयाँ सिजनका लागि पर्सिजाले राखेको प्रस्तावलाई स्विकार गर्दै रोहितले क्लबसंग दुई बर्षको नयाँ सम्झौता गर्न सहमत भएका हुन् ।
रोहितले नयाँ सिजनका लागि पर्सिजाको टोलीमा अभ्यास समेत सुरु गरिसकेका छन् ।
क्लब र रोहितबीच सहमती बनेपनि औपचारिक हस्ताक्षर भएको छैन । क्लबले चाँडै रोहितसंग औपचारिक हस्ताक्षर गरेर सार्वजनीक गर्नेछ ।
'शर्तको बिषयमा दुवै पक्ष सहमत छौ । दुई बर्ष पर्सिजामै बस्ने सहमती हो ।' रोहितका म्यानेजर समेत रहेका दाजु रोबिन चन्दले खेलपाटीसंग भने, 'सबै बिषयमा सहमत भएरै क्लबमा अभ्यास सुरु गरेको हो ।'
सहमती अनुसार आगामी दुई सिजन रोहितले पर्सिजाबाट खेल्नेछन् ।
'ईन्डोनेसिया भन्दा राम्रो ठाउँबाट प्रस्ताव आएको खण्डमा क्लबले रिलिज गर्न शर्त राखिएको छ ।' रोबिनले भने, 'ईन्डोनेसियाको हकमा भने क्लबको निर्णयनै मान्य हुनेछ ।'
रोहित सन् २०१३ मा ईन्डोनेसियाको क्लब पीएसपीएसमा अनुबन्धित भएका थिए । लगत्तै अर्को सिजन उनी पर्सिजा जाकार्तामा सरुवा भएर गएका थिए ।
चोटका कारण उनले सन् २०१५ र १६ को सिजन खेल्न पाएनन् । त्यसपछि नियमित रुपमा उनी पर्सिजाबाट खेल्दै आएका छन् । सन् २०१८ मा पर्सिजालाई लिग जिताउन महत्वपूर्ण भूमिका खेलेका उनी बर्षको सर्वोकृष्ट खेलाडी घोषित भएका थिए ।
गत सिजन पर्सिजाले लिगमा राम्रो नतिजा निकाल्न सकेन । तर व्यक्तिगत रुपमा रोहितको प्रर्दशन उच्च रह्यो । सोही कारण क्लबले उनलाई थप दुई बर्ष अनुबन्धनको प्रस्ताव राखेको थियो । क्लबको आकर्षक प्रस्तावमा रोहित समेत सहमत बनेका हुन् ।
डिफेन्स पोजिसनबाट खेल्दै आएका रोहित पछिल्लो समय मिडफिल्डमा जमेका छन् । पर्सिजा पुगेपछि उनले खेल्ने स्थान परिवर्तन गरेका हुन् । राष्ट्रिय टिममा उनी मिडफिल्डबाट खेल्दै आएका छन् ।
