काठमाडौं । सहिद स्मारक 'ए' डिभिजन लिग फुटबलमा जावलाखेल युथ क्लबले जित निकालेको छ ।
त्रिपुरेश्वरस्थित दशरथ रंगशालामा बिहिबार १० खेलाडीमा सिमित जावलाखेलले विभागीय टिम एपीएफ क्लबलाई १-० गोल अन्तरले हराएको हो ।
जावलाखेललाई जित दिलाउन विदेशी खेलाडी फोडे फोफानाले निर्णायक गोल गरे । फोफानाले खेलको ७१ औं मिनेटमा गोल गरेका हुन् ।
खेलको ५७ औं मिनेटमा जावलाखेल १० खेलाडीमा समेटिएको थियो । गोलकिपर टेकेन्द्र थापाले रातो कार्ड पाएपछि जावलाखेलले १० खेलाडीमा रहेर खेलेको थियो ।
एपीएफका आशिष लामासँग वान भर्सेस वानमा अवस्थामा डिबक्सको ठिक बाहिर ह्याण्ड गरेपछी रेफ्री कबिन ब्यन्जनकारले गोलरक्षक टेकेन्द्रलाई सिधै रातो कार्ड देखाएका थिए । तर, एपीएफले त्यसको फाइदा उठाउन सकेन ।
त्यसअघि खेलको पहिलो हाफमै गोल गरेको थियो । तर, सातौं मिनेटमा आशिष लामाको चिप गोललाई रेफ्री कबिनले अफ साइडको इशारा गर्दा एपीएफ अग्रता बनाउन असफल भएको थियो ।
यस्तै १३ औं मिनेटमा आशिषको २० यार्डबाट हानेको फ्रिकिकलाई टेकेन्द्रले पन्च गरेर बाहिर फ्यालेका थिए । पहिलो हाफको अन्तिम समयमा पाएको सुन्दर मौकालाई आशिषले पुनः पोस्टको दिशा दिन सकेनन् ।
खेलको ६९ मिनेटमा जावलाखेलले गोल गर्ने सुन्दर मौका पाएको थियो । तर, उसका सुजित बुढाथोकी चुके । रुप बहादुर लामाले प्रहार गरेको बल एपीएफका गोलरक्षक राजु योगीले पन्च गर्दा आएको रिबाउण्ड बललाई सुजितले पोस्टको दिशा दिन सकेनन् ।
खेलमा जावलाखेलका फोडे म्यान अफ दि म्याच चुनिए ।
एपीएफमाथिको जितसँगै जावलाखेल लिगको पाँचौं स्थानमा उक्लिएको छ । जावलाखेलले ८ खेलमा १२ अंक जोडेको छ ।
पराजित एपीएफ ८ खेलमा ५ अंक जोडेर पुछारबाट दोस्रो स्थानमा रहेको छ ।
के भन्छन् प्रशिक्षक ?
एपीएफका प्रशिक्षक राजेन्द्र तामाङ टिमको प्रदर्शनबाट चिन्तित देखिए ।
'फुटबलमा कस्ले बाजी मार्छ थाहा हुँदैन । जित्ने प्रयास गरेको हो । हामीले खेलाउन जानेनौ भनौ अब । खेलाडीमा पनि समस्या आयो,' तामाङले भने, 'हामी गाह्रो अवस्थामा छौँ। पुछारबाट माथि उठ्न गार्हो छ ।'
यस्तै तामाङले पाएको मौकाको फाइदा उठाउन समेत नसकेको बताए ।
'आशिष लामाले पाएको मौकामा गोल नहुदा गाह्रो भयो । डिफेन्सको गल्तिले गोल खायौं । खेलाडीमा ज्ञान नहुँदा १० खेलाडीलाई रोक्न सकेनौ । अत्तालिएर खेलेको जस्तो भयो,' उनले थपे ।
जावलाखेलका प्रशिक्षक नरेश थापाले अट्याकिङ खेल्दा जित निस्किएको बताए ।
'दुई खेल हार्दा अट्याकिङ खेलेका थियौं । यसपटक डिफेन्स खेल्दै अट्याक गर्यौ जसले जित दिलायो,' उनले भने, '१० जना हुँदा पनि खेलाडीले जोस बढाएर खेले । गोल गरेपछी डिफेन्स खेल्यौं । एपीएफले खासै राम्रो खेलेन ।'
जावलाखेल प्लेईङ सेट -
गौतम श्रेष्ठ, कुलदिप कार्की,सुरज ठकुरी,टेकेन्द्र थापा,रुप बहादुर लामा, एडमा डोम्बिया, फोडे फोफाना,दिलन लोक्ताम,विजय घलान,सिमान्त थापा, मनिष पौडेल
एपीएफ प्लेईङ सेट -
राजु योगी, सुदीप शिख्राकार,नबिन लामा,रमेश दंगाल,युवराज खड्का,आशिष लामा,विरेन्द्र यादब,बुद्धिमान राई,टोप बहादुर बिष्ट, आकाश बुढामगर,रबि थिङ
