एजेन्सी । ५२ वर्षको उमेरमा ब्यवसायिक फुटबलका लागि क्लबसँग नयाँ सम्झौता । सुन्दै अचम्मलाग्दो छ ।
जापानी फुटबलर काजुयोसी मिउराले सोमबार जापानको शीर्ष डिभिजन जे लिग क्लब योकोहामा एफसीसँग सम्झौता गर्दै सबैलाई चकित बनाए । किनकी उनीसंगै खेल्न सुरु गरेका सबै खेलाडीले खेल जीवनबाट अवकास प्राप्त गरिसके ।
तर, जापानमा पूर्व खेलाडी मिउरा भने अझै मैदानमा उत्रन चाहन्छन् । त्यसैले मिउराले सोमबार क्लबसँग १२ महिनाको लागि नयाँ सम्झौता गरेका छन् ।
मिउराको लागि अबको सिजन ब्यवसायिक फुटबलमा ३५ औं सिजन हुनेछ । सिजन सकिदै गर्दा मिउरा ५३ वर्षका हुनेछन् ।
सन् १९८६ मा पहिलो पटक ब्यवसायिक लिग खेलेका मिउरा आउने सिजनमा टिमको लागि उत्कृष्ट प्रदर्शन गर्ने लक्ष्यमा रहेका छन् ।
'योकोहामा एफसीसँग मेरो सम्झौता नवीकरण भएको छ,' मिउराले भनेका छन्, 'क्लबको लक्ष्यको लागि म दैनिक प्रयास गर्नेछु । म यस कृतज्ञतालाई भुल्ने छैन र फुटबलको मजा लिने छु । टिमको जितमा योगदान दिन कोशिश गर्नेछु ।'
योकोहामा यसै सिजन जे लिगमा बढुवा भएको क्लब हो । क्लब दोस्रो डिभिजनमा रहदा उनले मात्र ३ खेल खेल्न पाएका थिए । तर, शीर्ष डिभिजनमा भने उनी बढी भन्दा बढी मैदान उत्रन चाहन्छन् ।
को हुन् मिउरा ?
सन् १९६७ को फेब्रुवरीमा मिउरा जन्मिएका थिए । उनले १५ वर्षको उमेरमा सन् १९८२ बाट फुटबलको करियर सुरु गरेका थिए ।
१९ वर्षको उमेरमै मिउराले ब्राजिलियन क्लब सान्तोषबाट ब्यवसायिक लिग खेलेका थिए ।
मिउराले सन् १९९० देखि सन् २००० सम्म जापानको राष्ट्रिय फुटबल टोलीबाट खेलेका थिए। उनले राष्ट्रका लागि ८९ खेल खेल्दै ५५ गोल गरेका थिए ।
जापानलाई पहिलो पटक सन् १९९८ को विश्वकपमा छनोट गराउन पनि उनले मुख्य भूमिका खेलेका थिए । छनोट चरणको खेलमा उनले १४ गोल गरेका थिए । तर, उनले विश्वकप खेल्ने अवसर भने पाएनन्।
सन् १९९३ मा पहिलो पटक जे लिग सुरु हुँदा मिउराले भर्डी कावासाकीबाट खेलेका थिए । उनकै टिम लिग च्याम्पियन बनेको थियो । अझ, मिउरा लिगकै सर्वाधिक गोलकर्ता बनेका थिए ।
मिउराले त्यसै वर्ष ‘एसियन प्लेयर अफ दि इयर’ अवार्ड समेत पाएका हुन् । यो अवार्ड पाउने उनी पहिलो जापानी खेलाडी हुन् ।
ब्यवसायिक फुटबलमा सबैभन्दा बढी उमेरमा गोल गर्ने खेलाडीको कीर्तिमान उनको नाममा रहेको छ । मिउराले सन् २०१७ मा इन्ग्लिश खेलाडी स्टानली म्याथ्युजको नाममा रहेको कीर्तिमान भंग गरेका थिए ।
मिउराले ब्राजिलपछि इटाली, क्रोएसिया र अष्ट्रेलियाको लिग समेत खेलेका छन् ।
