काठमाडौं । सहिद स्मारक 'ए' डिभिजन लिग फुटबलमा हिमालयन शेर्पा क्लब र फ्रेन्ड्स क्लबले बराबरी खेल्दै अंक बाडेका छन् ।
त्रिपुरेश्वरस्थित दशरथ रंगशालामा मंगलबार शेर्पा र फ्रेन्ड्सले गोलरहित बराबरी खेलेका हुन् । खेलमा पाएको अवसरलाई सदुपयोग गर्न नसक्दा दुवै टोलीले १-१ अंकमा चित्त बुझाएका हुन् ।
प्रतिस्पर्धात्मक बनेको खेलमा पहिलो हाफमा फ्रेन्ड्सले गोलको सुनौलो अवसर खेर फालेको थियो । खेलको ४३ औं मिनेटमा फ्रेन्ड्सका उत्तम राईले डिबक्स भित्रबाट गोल गर्न चुके । उनले शेर्पाका एक डिफेन्डरलाई बिट गरेर प्रहार गरेको पावर फुल सट पोस्टबारको माथिबाट गएको थियो ।
पहिलो हाफमा शेर्पाले उत्कृष्ट अवसर बनाउन सकेन् । खेलको २० औं मिनेटमा शेर्पाका सुरज हमालले डिबक्स बाहिरबाट हानेको प्रहारले पोस्टको दिशा लिन सकेन ।
दोस्रो हाफमा भने शेर्पाले केहि उत्कृष्ट अवसर सदुपयोग गर्न सकेन । खेलको ७२ औं मिनेटमा शेर्पाका सुरज हमाल वान भर्सेस वानमा गोल गर्न चुके । हमालले डिबक्सभित्रबाट हानेको प्रहार फ्रेन्ड्सका गोलकिपर देव लिम्बुले पन्च गर्दै बाहिर पठाए ।
त्यसअघि खेलको ५९ औं मिनेटमा फ्रेन्ड्सका विश्व अधिकारिको फ्रिकिक शेर्पाका गोलरक्षक गिरिले पन्च गरेर गोल हुनबाट जोगाएका थिए ।
खेलको अन्तिम समयमा गोलकिपर बिट भएको अवस्थामा अनमार्क रहेका शेर्पाका विशन गुरुङ गोल गर्न चुके । उनले डिबक्सभित्रबाट हानेको बल क्रसबार माथिबाट बाहिरिएको थियो ।
खेलमा शेर्पाका उल्रिच म्यान अफ दि म्याच चुनिए ।
बराबरीसँगै दुवै टिम अझै जित विहीन भएका छन् । लिगमा शेर्पाको यो तेस्रो बराबरी हो भने फ्रेन्ड्सको दोस्रो बराबरी हो ।
बराबरीसँगै शेर्पाले ५ खेलमा ३ अंक जोडेको छ । शेर्पा लिगको १२ औं स्थानमा रहेको छ ।
५ खेलमा २ अंक जोडेको फ्रेन्ड्स १३ औं स्थानमा रहेको छ ।
के भन्छन् प्रशिक्षक ?
बराबरीपछि फ्रेन्ड्सका ब्राजिलियन प्रशिक्षक मार्कुस डानटनले जित्नु पर्ने खेलमा बराबरीमा चित्त बुझाउनु परेको बताए ।
'बराबरी खेल्नु पर्ने खेल यो थिएन् । हामीले जित्नु पर्ने खेल बराबरी भयो,' मार्कुसले भने, 'तर, पराजित हुनु परेन । अंक आयो यसैमा खुसी छौं । अबको दिनमा अझै राम्रो गर्ने छौँ ।'
प्रशिक्षक मार्कुसले यात्रा सहज नभए पनि फ्रेन्ड्सको लक्ष्य शीर्ष ६ रहेको बताए ।
शेर्पाका प्रशिक्षक सन्जिब बुढाथोकीले पाएको अवसरमा गोल गर्न नसक्दा बराबरी खेल्नु परेको बताए ।
'हामीलाई दबाब थियो । त्यसैले फरक रणनीतिमा थियौं । अट्याकिङ खेल्यौ तर दुर्भाग्य पाएको अवासर सदुपयोग भएन ।नतिजाबाट खुसी हुने अवस्था छैन,' बुढाथोकीले भने ।
फ्रेन्ड्स प्लेईङ सेट -
फिलिपे डी सौजा, साउलो डी, सुरज गुरुङ,विश्व अधिकारी, देव लिम्बु, प्रिजेन तामाङ, उत्तम राई, रमेश बर्तौला,सन्जोग महर्जन, सरोज योन्जन लामा, निशेन सुब्बा
हिमालयन शेर्पा प्लेईङ सेट -
किशोर गिरी, मान बहादुर तामाङ, विजय श्रेष्ठ, त्रिदेभ गुरुङ, रबी थापा मगर, विशन गुरुङ, विनोद गुरुङ,विकास राई, सुरज हमाल, कमल थापा मगर, उल्रिच सीवी
