काठमाडौं । गत सिजन तेस्रो भएको थ्रीस्टार र पाचौं भएको एपीएफ क्लबले चालू लिगमा खासै उत्कृष्ट खेल प्रदर्शन गर्न सकेका छैनन् ।
नतिजा पनि सोहि अनुसारको छ । एक प्रकारले दुबै टिम खराब समयबाट गुज्रिरहेका छन् ।
दुवै टिम सहिद स्मारक ए डिभिजन लिगमा शनिबार प्रतिस्पर्धा गर्दैछन् ।
अखिल नेपाल फुटबल संघ एन्फाका अनुसार शनिबार दशरथ रंगशालामा एक मात्रै खेल हुनेछ ।
खेल दिउँसो तीन बजे सुरु हुनेछ ।
दुबै टिम स्पष्ट तीन अंक हात पार्ने लक्ष्य सहित मैदान उत्रदैछन् ।
गत सिजन तेस्रो भएको थ्रीस्टारले चालू सिजनमा एक जित र एक बराबरीको नतिजा निकालेको छ ।
एपीएफ भने एक बराबर र एकमा हार ब्यहोरेको छ ।
थ्रीस्टारले नयाँ सिजनमा राष्ट्रिय टिमका केही महत्वपुर्ण सदस्यलाई क्लबमा राख्न सकेन । त्यसैले लिगमा थ्री स्टारको प्रभाव देखिने नतिजा आउन सकेको छैन ।
राष्ट्रिय टिमका सदस्य समेत रहेका मिडफिल्डर सुनिल बल, डिफेन्डर रन्जित धिमाल लगायत गोलरक्षक एलन न्यौपाने, अभिषेक बराल, बुद्धराज चेम्जोङ, विजय धिमाल र रेजिन सुब्बाले टिम छाड्न पुगे ।
थ्री स्टारसँग अहिले राष्ट्रिय टिमका तीन खेलाडीमात्रै छन् । कप्तान विक्रम लामा, डिफेन्डर अनन्त तामाङ र मिडफिल्डर मिक्छेन तामाङ मात्रै राष्ट्रिय टिमका सदस्य हुन् ।
तीन विदेशी खेलाडी टिममा राखेको थ्री स्टारसंग अनुभवी खेलाडीको रुपमा रुपेश केसी मात्रै छन् ।
बाँकी सबै नयाँ अनुहार छन् ।
त्यसैले पनि लिगमा थ्री स्टारले अपेक्षाकृत प्रर्दशन दिन सकेको छैन ।
पहिलो खेलमै जावलाखेलसँग गोलरहित बराबरीमा रोकिएको थ्री स्टारले दोस्रो खेलमा पुलिस क्लबमाथि १–० को कठिन जित निकालेको थियो ।
लिगको तेस्रो खेलमा विभागीय टिम एपीएफसंग खेल्न लागेको छ ।
थ्री स्टारका मुख्य प्रशिक्षक मेघराज केसी एपीएफविरुद्व जित निकाल्न टिम तयार रहेको बताउँछन् ।
‘तयारी ठिक छ । एपीएफसँग जित्ने लक्ष्यसहित मैदान उत्रन्छौं ।’ उनी भन्छन् ।
केसीले एपीएफ राम्रो टिम रहेको उल्लेख गर्दै राम्रो पोजिसन बनाउँदै मेहनत गरेर जित हात पार्ने बताउँछन् ।
‘एपीएफ बलियो टिम छ । राम्रो पोजिसन राखेर मेहनत गर्याै भने नतिजा हात पर्छ ।’ उनी भन्छन् ।
दुई पहेलो कार्ड ब्यहोरेका थ्री स्टारका रुपेश केसी एपीएफबिरुद्ध उपलब्ध हुने छैनन् । गत सिजन थ्री स्टारले एपीएफलाई २–० ले हराएको थियो ।
त्यस्तै, विभागीय टिम एपीएफका प्रशिक्षक राजेन्द्र तामाङ थ्री स्टारविरुद्ध जित निकाल्न चाहन्छन् ।
यसअघि मनाङसँग हार ब्यहोरेको एपीएफले हिमालयन शेर्पासँग एक एक गोलको बराबरी खेलेको थियो । त्यसैले थ्री स्टारविरुद्व जित निकाल्दै एपीएफ लिगमा पहिलो जित दर्ता गर्न चाहन्छ ।
‘थ्रीस्टार बलियो टिम हो । राष्ट्रिय टिमका खेलाडी छन् । विदेशी खेलाडी पनि राम्रा छन् । तरपनि जितको लागि नै खेल्छौं ।’ उनी भन्छन् ।
गत सिजन पनि टिम हेरेका तामाङ थ्री स्टारले पछिल्लो समय सुधारिएको प्रर्दशन गरेका कारण सजक भएर खेल्ने बताउँछन् ।
‘थ्री स्टारले पुलिसविरुद्ध राम्रो खेल्यो । सजक भएर ९० मिनेटनै खेल्छौं । थ्री स्टारविरुद्व अंक गुमाउन चाहन्नौं ।’ उनी भन्छन् ।
एपीएफविरुद्ध जित निकाल्न सफल भएमा थ्री स्टार लिगको दोस्रो स्थानमा उक्लने छ ।
