काठमाडौं । नेपाल पुलिस क्लबले सहिद स्मारक 'ए' डिभिजन लिग फुटबलमा पहिलो जित निकालेको छ ।
शुक्रबार भएको खेलमा सरस्वती युथ क्लबलाई २-० गोल अन्तरले पराजित गर्दै पुलिसले पहिलो जित निकालेको हो ।
त्रिपुरेश्वरस्थित दशरथ रंगशालामा १० खेलाडीमा सिमित पुलिसलाई जित दिलाउन सुमन लामा र भोला सिलवालले एक एक गोल गरे ।
पहिलो हाफको इन्जुरी समयमा अन्जन राई दाहोरो पहेलो कार्डसहित रातो कार्ड पाउँदै मैदानबाट बाहिरिदा पुलिस १० खेलाडीमा सिमित भएको थियो ।
पहिलो हाफमा सरस्वतीसँग गोलरहित बराबरी खेलेको पुलिसले दोस्रो हाफमा दुई गोल गर्यो ।
खेलको ४६ औं मिनेटमा सुमनले गोल गर्दै पुलिसलाई १-० को अग्रता दिलाए । त्यसपछि खेलको ७९ औं मिनेटमा भोलाले गोल गर्दै पुलिसलाई २-० को जित दिलाए ।
त्यसअघि पहिलो हाफमा राजकुमार घिसिङले डिबक्सको ठिक बाहिरबाट प्रहार गरेको फ्रिकिक क्रस बारमा लाग्दा सरस्वतीले अग्रता बनाउने मौका गुमाएको थियो ।
खेलमा पुलिसका सुमन लामा म्यान अफ दि म्याच चुनिए ।
जितसँगै पुलिसले ३ खेलमा ४ अंक जोडेको छ । पुलिस लिगको सातौं स्थानमा रहेको छ ।
पुलिस पहिलो खेलमा हिमालयन शेर्पा क्लबसँग गोलरहित बराबरीमा रोकिएको थियो । दोस्रो खेलमा थ्रीस्टार क्लबसँग १–० गोल अन्तरले पराजित भएको थियो ।
सरस्वतीको यो लगातार तेस्रो हार हो । पहिलो खेलमा सरस्वती एनआरटीसँग ४–० र दोस्रो खेलमा जावलाखेल युथसँग १–० गोल अन्तरले पराजित भएको थियो ।
अंक विहीन सरस्वती लिगको पुछारमा रहेको छ ।
फर्किए रविन
पुलिसका डिफेन्डर रविन श्रेष्ठले सरस्वतीविरुद्धको खेलबाट पुनरागमन गरेका छन् ।
रविन पुलिसको कप्तानी गर्दै लामो समयपछि मैदानमा फर्किएका हुन् ।
दायाँ खुट्टाको लिगामेन्ट गएपछि मैदान बाहिर रहदै आएका रविन चोटमुक्त हुँदै करिब डेढ वर्षपछि मैदान फर्किएका हुन् ।
रविन फर्किएको खेलमै पुलिसले जित समेत हात पार्यो ।
लामो समय पछि मैदान फर्कन पाउँदा रविन खुसी देखिए ।
'मैदान फर्कन पाउँदा खुसी लागेको छ । खेल राम्रो भयो । चाहिएको अंक हामीले पायौं,' रविनले भने ।
के भन्छन् प्रशिक्षक ?
पुलिसका प्रशिक्षक अनन्त थापाले काउन्टर खेल खेल्दा जित निस्किएको बताए ।
'तीन अंक पायौं । काउन्टर खेल खेल्दा सहज भयो,' उनले भने, 'पहिलो हाफमा रेड कार्ड खादा केहि असर गर्यो ।'
सरस्वतीका प्रशिक्षक प्रदीप नेपालले डिफेन्सको कमजोरीले हार्न पुगेको बताए ।
'खेल राम्रो भयो । डिफेन्सको गल्तिले गोल खायौं,' उनले भने, 'सुरुमै बल पोस्टमा लाग्नु दुर्भाग्य भयो । मुख्य डिफेन्सले गर्दा हार्यौ ।'
पुलिस प्लेईङ सेट -
अजित भण्डारी, अन्जन राई,हेम तामाङ,निर कुमार राई,रबी पासवान,शत्रुधन चौधरी,सुमन लामा,तेज तामाङ,प्रवेश कुँवर,सौजन राई, रविन श्रेष्ठ (कप्तान)
सरस्वती प्लेईङ सेट -
राज शाही,दिपेश श्रेष्ठ,प्रदीप भण्डारी, सुशन लामा,रमेश तामाङ,दिनेश केसी,मनिष थापा,राज कुमार घिसिङ,दिपक भुसाल,पूर्ण बहादुर श्रेष्ठ, एमबेइ आन्द्रे
