काठमाडौं । सहिद स्मारक 'ए' डिभिजन लिग फुटबलमा विभागीय टिम त्रिभुवन आर्मी क्लबले दोस्रो जित निकालेको छ ।
शुक्रबार भएको खेलमा हिमालयन शेर्पा क्लबलाई २-० गोल अन्तरले पराजित गर्दै आर्मीले दोस्रो जित निकालेको हो ।
एन्फा कम्प्लेक्स सातदोबाटोमा आर्मीलाई जित दिलाउन कप्तान भरत खवास र टेक बहादुर बुढाथोकीले एक एक गोल गरे ।
खेलमा भरत म्यान अफ दि म्याच चुनिए ।
जितसँगै आर्मीले ३ खेलमा ६ अंक जोडेको छ । र, आर्मी लिगेको तेस्रो स्थानमा उक्लिएको छ ।
आर्मीले यस अघि पहिलो खेलमा फ्रेन्डस् क्लबलाई २–१ गोल अन्तरले हराएको थियो । दोस्रो खेलमा साविक विजेता मनाङसँग १–० ले पराजित भएको थियो ।
शेर्पाले ३ खेलमा २ अंक जोडेको छ । शेर्पा लिगको दशौँ स्थानमा रहेको छ । शेर्पाले पहिलो खेलमा नेपाल पुलिससँग गोलरहित बराबरी तथा दोस्रो खेलमा एपीएफसँग १–१ गोलको बराबरी खेलेको थियो ।
दोस्रो हाफमा आर्मीलाई सफलता
पहिलो हाफमा शेर्पासँग गोलरहित बराबरी खेलेको आर्मीले दोस्रो हाफमा भने पाएको अवसर गुमाएँन् ।
पहिलो हाफमा पाएको मौका गुमाउदा दुवैले बराबरी खेलेका थिए खेलको । आठौं मिनेटमा शेर्पाका आशिष गुरुङ गोल गर्न चुके । डिबक्स भित्रबाट उनको प्रहार सशक्त नहुँदा आर्मीका गोलकिपर विकेश कुथुले सहजै बचाए ।
खेलको २५ औं मिनेटमा आर्मीले गोल गर्ने अवसर गुमायो । जर्ज प्रिन्स कार्कीको कर्नरमा विकास तामाङको हेड दोस्रोबारबाट बाहिरियो ।
३६ औं मिनेटमा आर्मीले गोलको अर्को अवसर बनायो । तर, आर्मीका जर्ज प्रिन्सले कप्तान भरतलाई निकालेको क्रस शेर्पाका गोलकिपर किशोर गिरीले सहजै बचाए । लगत्तै टंक बहादुर बस्नेतले डिबक्स नजीकैबाट प्रहार गरेको बल क्रसबारको केही इन्च माथिबाट बाहिरियो ।
दोस्रो हाफको सुरुवातमै आर्मीले गोल गर्यो ।
शेर्पाका डिफेन्डर आशिष गुरुङ र गोलरक्षक किशोरलाई बिट गर्दै कप्तान भरतले ५७ औं मिनेटमा चिप गोल गरे ।
त्यसपछि टेकले ६१ औं मिनेटमा शेर्पाका विदेशी खेलाडी उल्रीच शिवीले क्लियर गर्न नसकेको बल खोस्दै गोल गर्दै आर्मीलाई २-० को जित दिलाए ।
के भन्छन् प्रशिक्षक ?
आर्मीका मुख्य प्रशिक्षक नबिन न्यौपानेले टिमको मिडफिल्डमा अझै समस्या रहेको बताए ।
'खेल राम्रो भयो । तर, मुख्य समस्या सेन्टर मिडफिल्डमा छ,' उनले भने, 'पहिलो हाफमा गोल नहुदा धेरै गोल हुन सकेन । पावर खेल भईरहेको छैन ।'
शेर्पाका प्रशिक्षक सन्जिब बुढाथोकीले सानो गल्तीले गोल खाएको बताए ।
'हाम्रो खेल ठिकै भयो । सानो गल्तीले गोल खायौं । तर, हाम्रो खेल राम्रो हुदैछ,' उनले भने ।
आर्मी प्लेईङ सेट -
विकेश कुथु, दिपक गुरुङ,विकास तामाङ,विकास खवास, युद्ध शाही, टेक बहादुर बुढाथोकी, सेसेहाङ आङदेम्बे, नवयुग श्रेष्ठ, दिनेश हेन्जन,जर्ज प्रिन्स कार्की, भरत खवास
हिमालयन प्लेईङ सेट -
किशोर गिरी, मान बहादुर तामाङ,स्टेफन समिर, त्रिदेभ गुरुङ, विश्वास श्रेष्ठ, निरज बस्नेत, रबि थापा मगर,आशिष गुरुङ, उल्रीच शिवी, विनोद गुरुङ, खामिर गिल्सन काङदंवा
