काठमाडौं । सहिद स्मारक 'ए' डिभिजन लिग फुटबलमा न्युरोड टिम एनआरटीले दोस्रो जित निकालेको छ ।
बुधबार भएको तेस्रो खेलमा च्यासल युथ क्लबलाई २-१ गोल अन्तरले पराजित गर्दै १० खेलाडीमा सिमित एनआरटीले दोस्रो जित निकालेको हो ।
त्रिपुरेश्वरस्थित दशरथ रंगशालामा एनआरटीलाई जित दिलाउन जुनियर निकेनगुए र दर्शन गुरुङले एक एक गोल गरे । च्यासलका अमिर श्रेष्ठले एक गोल फर्काए ।
खेलमा एनआरटीका दर्शन म्यान अफ दि म्याच चुनिए ।
जितसँगै एनआरटीले ३ खेलमा ४ अंक जोडेको छ । गत सिजन लिगको पुछारमा रहेको कारण एनआरटीको २ अंक घटेको हो ।
च्यासलले पनि ३ खेलमा ४ अंक जोडेको छ ।
पहिलो खेलमा संकटालाई २–० ले हराएको च्यासलले दोस्रो खेलमा मछिन्द्रसँग १-१ गोलको बराबरी खेल्दै अंक बाँडेको थियो ।
पहिलो खेलमा सरस्वती युथ क्लबलाई ४–० गोल अन्तरले पराजित गर्दै लिगमा प्रभावशाली सुरुवात गरेको न्युरोड टिमले दोस्रो खेलमा संकटासंग १–० को हार ब्यहोरेको थियो ।
रोमान्चक खेल
खेलको तेस्रो मिनेटमै च्यासलले एनआरटीको पोस्ट आक्रमण गरेको थियो । च्यासलका आमिर श्रेष्ठले बायाँ भागबाट प्रहार गरेको लामो सट क्रसबारमा लागेर फर्कियो । आमिरको प्रहार एनआरटीका गोलरक्षक अजित प्रजापतिले पत्तै पाएनन् ।
१२ औं मिनेटमा कप्तान सन्तोष शाहुखले गोलको राम्रो अवसर गुमायो । जापानी खेलाडी हायातो क्रसमा सन्तोषको हेड दोस्रो बारबाट बाहिरियो ।
खेलको १७ औं मिनेटमा एनआरटीका कप्तान प्रकाश बुढाथोकीले डिबक्स बाहिरबाट गरेको प्रहार क्रसबार माथिबाट बाहिरियो । १९ औं मिनेटमा बुढाथोकीको अर्को प्रहार च्यासलका गोलकिपर एलेन न्यौपानेले सहजै बचाए ।
२३ औं मिनेटमा एनआरटीका कप्तान प्रकाश बुढाथाेकीले डिबक्स बाहिरबाट प्रहार गरेकाे बल च्यासलका गाेलकिपर एलेन न्यौपानेले पन्च गर्दै बाहिर फालेका थिए ।
तर, खेलको २३ औं मिनेटमा जुनियर निकेनगुएले हेड गोल गर्दै एनआरटीलाई अग्रता दिलाएका थिए ।
३७ औं मिनेटमा च्यासलले गोलको उत्कृष्ट अवसर सिर्जना गरेको थियो । तर, सुनिल बलले बायाँ तर्फबाट सेकेण्डबार च्याप्दै प्रहार गरेको बल एनआरटीका गाेलकिपर अजित प्रजापतिले मुस्किलले बचाए ।
खेलको ४० औं मिनेटमा च्यासलका जापानी खेलाडी हायातोले बायाँ भागबाट हानेको प्रहार दोस्रो बारमा लागेर फर्कियो ।
पहिलो हाफको तुलनामा दोस्रो हाफमा च्यासल आक्रामक देखियो ।
५३ मिनेटमा च्यासलका आमिर श्रेष्ठले डिबक्स बाहिरबाट गरेको प्रहार बाहिरियो । लगतै उनले बाँया भागबाट गरेको प्रहार एनआरटीका गोलरक्षक अजितले पन्च गर्दै बाहिर पठाए ।
यस्तै खेलको ६१ औं मिनेटमा जापानी खेलाडी हायातोको पासमा सन्तोषको प्रहार एनआरटीका गोलरक्षक अजितले पन्च गर्दै बाहिर पठाउदा च्यासल बराबरी गोल गर्न चुकेको थियो ।
खेलको ७२ औं मिनेटमा एनआरटी १० खेलाडीमा सिमित भयो । उसका जोर्डनले दोहोरो पहेलो कार्डसहित रातो कार्ड पाएर मैदानबाट बाहिरिएका थिए । च्यासलका अविशेक लिम्बुलाई फउल गरेपछि जोर्डनले रातो कार्ड पाएका हुन् ।
खेलको ८४ औं मिनेटमा च्यासलका नाकामुराले डिबक्सको ठिक नजिकबाट प्रहार गरेको फ्रिकिक अजितले उत्कृष्ट बचाऊ गरे ।
त्यसको दुई मिनेट नबित्दै ८६ औं मिनेटमा दर्शनले काउन्टरमा गोल गर्दै एनआरटीलाई २-० को अग्रता दिलाए । मध्ये भागबाट बल लगेर उनले च्यासललाई डिफेन्डरलाई बिट गर्दै गोल गरेका थिए ।
त्यसपछि खेलको इन्जुरी समयमा अमिरले एक गोल फर्काएपनि च्यासल २-१ ले पराजित भयो ।
के भन्छन् प्रशिक्षक ?
च्यासलका प्रशिक्षक बालगोपाल शाहुखलले खेलाडीले सजिलो रुपमा लैजादा एनआरटीविरुद्वको खेल गुमाएको बताए ।
'खेलाडीले निकै सुस्त खेले । धेरै मिस पास भए । विपक्षीलाई बढी ठाउ दिए,' खेलपछि पत्रकार सम्मेलनमा उनले भने, 'खेलाडीले सजिलो रुपमा लिएर । समस्या त्यहीबाट सुरु भयो ।'
उनले एनआरटीविरुद्व अंक गुमाएपनि खेलमा फर्कने अझै सम्भावना रहेको बताए ।
उनले भने, 'केही बिग्रिएको छैन । अझै १० खेल बाँकी छ । अझै सुधार गर्न सक्छौ भन्ने लाग्छ । उपाधि होडबारे उनले थपे, अब अरुको नतिजामा भर पर्नु पर्ने भएको छ,' शाहुखलले भने, 'एयर बलमा बढी कमजोर देखिएका छौ । एनआरटीका फरवार्डले धेरै दबाब दिए ।'
एनआरटीका प्रशिक्षक राजुकाजी शाक्यले महत्वपूर्ण खेलमा नतिजा आएको बताए । उनले मेहनतको नतिजा मैदानमा देखिएको उल्लेख गरे ।
'खेल्ने संरचना समेत परिवर्तन गरेका थियौ । जसले गर्दा राम्रो भयो,' उनले भने ।
प्रशिक्षक शाक्यले च्यासल आफुहरु भन्दा राम्रो टिम भएको बताउदै शीर्ष ६ मा पर्ने क्लबको लक्ष्य दोहोर्राए ।
च्यासल प्लेईङ सेट -
एलेन न्यौपाने, अमिर श्रेष्ठ, हेमन्त थापा मगर,नगेन्द्र चौधरी,सन्तोष शाहुखल, सुनिल बल, नितिन थापा,अविशेक लिम्बु, हायातो वाकिनो, ताइगा नाकामुरा, सन्जय राजबाहक
एनआरटी प्लेईङ सेट -
एरिक विष्ट, बिक्रम धिमाल, प्रकाश बुढाथोकी, अजित प्रजापति, अशोक थापा, शकल रेग्मी,दर्शन गुरुङ, नबिन गुरुङ,आन्द्रे थेरी,जुनियर निकेनगुए, जोर्डन एनदेम्बा
