काठमाडौं । सहिद स्मारक 'ए' डिभिजन लिग फुटबलमा साविक विजेता मनाङ मर्स्याङ्दी क्लबले लगातार दोस्रो जित निकालेको छ ।
त्रिपुरेश्वरस्थित दशरथ रंगशालामा सोमबार भएको खेलमा त्रिभुवन आर्मी क्लबलाई १-० गोल अन्तरले पराजित गर्दै मनाङले दोस्रो जित निकालेको हो ।
मनाङको जितमा दयानन्द सिंहले निर्णायक गोल गरे । उनले खेलको इन्जुरी समयमा गोल गरेका थिए ।
खेलको अन्तिम समयमा सुमन अर्यालले रातो कार्ड पाउँदा आर्मी १० खेलाडीमा समेटिएको थियो । उनले इन्जुरी समयमा हातले गोल गर्दा दुई पहेलो कार्डसहित रातो कार्ड पाएका थिए ।
त्यसअघि २० औं मिनेटमा मनाङका विमल रानाको पासलाई फेमी जोश्वाले गोल गर्न सकेनन् । २३ औं मिनेटमा आर्मीका सुमन अर्यालको उत्कृष्ट हेडर मनाङका किपर दिप कार्कीले पन्च गर्दै बाहिर पठाए । यस्तै ३६ औं मिनेटमा विमलकै पासलाई दयानन्द सिंहको प्रहार फितली रह्यो ।
यस्तै ५१ औं मिनेटमा भरतको क्रसलाई नवयुग श्रेष्ठले पोस्टको दिशा दिन सकेनन् ।
जितसँगै मनाङ लिगको शीर्ष स्थानमा उक्लिएको छ । मनाङले दुई खेलमा ६ अंक जोडेको छ ।
मनाङले आफ्नो पहिलो खेलमा अर्काे विभागीय क्लब एपीएफ क्लबलाई २-० गोल अन्तरले पराजित गरेको थियो ।
यस्तै मनाङले लगातार दोस्रो सिजन आर्मीलाई हराउन सफल भएको छ । गत सिजन पनि मनाङले आर्मीलाई १-० गोल अन्तरले पराजित गरेको थियो ।
आर्मीको यो पहिलो हार हो । आर्मीले पहिलो खेलमा फ्रेन्ड्स क्लबलाई २-१ गोल अन्तरले हराएको थियो ।
खेलमा मनाङका किपर दिप कार्की म्यान अफ दि म्याच चुनिए ।
के भन्छन् प्रशिक्षक ?
मनाङका मुख्य प्रशिक्षक तोपे फुजाले खेल सोचेको जस्तो भएको बताए ।
'एक अंकमा चित्त बुझाउने अवस्था थियो तर तीन अंक आयो,' उनले भने, 'खेल सोचेको जस्तो भयो ।'
आर्मीका प्रशिक्षक नवीन न्यौपानेले पाएको अवसर गुमाउदा हार व्यहोर्नु परेको बताए ।
'पाएको अवासर गुमायौं । त्यो नै हारको कारण रह्यो । ठुला खेलमा पाएको अवसर गुमाउदा यस्तै हुन्छ,' उनले भने ।
मनाङ प्लेईङ सेट -
दिप कार्की,भिदाल लुइस,एक राज बुढाथोकी,लार्बा फ्लोरेस्ट,सुरज बिके, कमल श्रेष्ठ, पुजन उपरकोटी, दयानन्द सिंह,फेमी जोश्वा,जगजित श्रेष्ठ, विमल राना
आर्मी प्लेईङ सेट -
विकेश कुथु, विकाश तामाङ, विकास खवास,दिपक गुरुङ,सुमन अर्याल,आशिष शाक्य,सेसेहाङ आङदेम्बे,दिनेश हेमजङ,जर्ज प्रिन्स कार्की, नवयुग श्रेष्ठ, भरत खवास
-1747226778.jpeg)
