काठमाडौं । सहिद स्मारक ए डिभिजन लिग फुटबलमा विभागीय टिम नेपाल पुलिस क्लबले हिमालयन शेर्पा क्लबसँग बराबरी खेलेको छ ।
त्रिपुरेश्वरस्थित दशरथ रंगशालामा मंगलबार भएको खेलमा पुलिसले शेर्पासँग गोलरहित बराबरी खेल्दै अंक बाडेको हो । बराबरीसँगै दुवै टोलीले एक एक अंक पाएको छ ।
शेर्पाविरुद्ध पहिलो हाफमा आक्रामक खेलेको पुलिसले दोस्रो हाफमा भने उत्कृष्ट प्रदर्शन गर्न सकेन ।
पुलिसले पहिलो हाफमा गोलको केहि अवसर समेत खेर फालेको थियो ।
पुलिसका कप्तान जुमानु राईले १३ औं मिनेटम पाएको मौका सदुपयोग गर्न सकेनन् । डिबक्स भित्र पाएको अवसरलाई उनले बाहिर प्रहार गरे । ३१ औं मिनेटमा जुमानुको पासमा डिबक्स भित्र सुमन लामाका प्रहार शेर्पाका गोलरक्षक किशोर गिरिले उत्कृष्ट बचाउ गरे ।
पुलिसका मुख्य प्रशिक्षक अनन्त थापाले पाएको अवसर सदुपयोग गर्न नसक्दा बराबरीमा रोकिएको बताए ।
'पाएको मौका गुमाउदा एक अंकमा चित्त बुझाउनु परेको छ । दोस्रो हाफमा पनि राम्रो खेलेका हौँ तर गोल गर्न सकेनौं,' प्रशिक्षक अनन्तले भने ।
यस्तै प्रशिक्षक अन्नतले दुई अंक गुमाउँदा घाटा भएको बताए ।
'उनीहरुको योजना एक अंक लिने थियो । हामीले ब्रेक गर्न खोजेको तर सकेनौ,' अनन्तले थपे, '२ अंक गुमाउदा अवश्य टिमलाई घाटा हुन्छ ।'
अनन्तले दोस्रो खेलमा राम्रो गर्ने समेत बताए ।
शेर्पाका मुख्य प्रशिक्षक सन्जिब बुढाथोकीले प्रशिक्षणको डेब्यु खेलमा अंक जोड्दा खुसी भएको बताए ।
'पुलिस राम्रो टिम हो । सोचे जस्तो भयो । योजना सफल भयो,' प्रशिक्षक सन्जिबले भने ।
यस्तै प्रशिक्षक सन्जिबले टिमलाई विदेशी खेलाडीले खेल्न नपाउदा गार्हो भएको बताए ।
खेलमा शेर्पाका आशिष गुरुङ म्यान अफ दि म्याच चुनिए । पुलिसविरुद्ध म्यान अफ दि म्याच बनेका आशिषले प्रशिक्षकको निर्देशन अनुसार खेलेको कारण अंक खोस्न सफल भएको बताए ।
उनले दशरथ रंगशालामा पहिलो पटक खेल्दा आफ्नो लागि विशेष रहेको समेत बताए ।
पुलिसको प्लेईङ सेट -
अजित भण्डारी,अन्जन राई,निर कुमार राई,रबी शंकर पासवान,सन्तोष हेम्रन,शत्रुधन चौधरी,सुमन लामा, तेज तामाङ,जुमानु राई, प्रवेश कुवर,सौजन राई
हिमालयन शेर्पा प्लेईङ सेट -
किशोर गिरी,मान बहादुर तामाङ,विजय श्रेष्ठ,त्रिदेभ गुरुङ,विश्वास श्रेष्ठ, निरज बस्नेत,रबि थापा मगर,आशिष गुरुङ,भिषण गुरुङ,कैलाश बस्नेत,विनोद गुरुङ
