काठमाडौं । बिग्रड ब्वाईज ‘लाहुरे’को क्लब हो । बिग्रडको काठमाडौंका अन्य ए डिभिजन क्लब जस्तो नियमित आर्थिक स्रोत छैन । तर फुटबलप्रतिको मोहले उसलाई ए डिभिजनमा टिकाई राखेको छ । ब्रिगेडले यसपटक समेत एन्फा एकेडेमीका खेलाडी राखेर लिग खेल्ने टिम बनाएको छ ।
केही अनुहार छाड्ने हो भने ब्रिगेडले एन्फा एकेडेमीका खेलाडीलाई लिग खेल्न जम्मा गरेको छ । ब्रिगेडले एन्फाबाट बाहिरिएका यू–१८ साफ र यू–१९ एएफसी छनोट खेलेका खेलाडीलाई टिममा राखेको हो ।
तर उमेर समूहका खेलाडीको भिडमा केही परिचित अनुहार ब्रिगेडमा छन् । विजय गुरुङ त्यसैको उदाहरण हुन् ।
करिब १५ बर्ष अघि ब्रिगेडबाट ए डिभिजन लिगमा डेब्यु गरेका अनिल गुरुङले ब्रिगेडको नेतृत्व गरेका छन् ।
अर्का खेलाडी उत्तम गुरुङ पोखरेली भिडमा अनिल र विजयसंग मिसिन आईपुगेका छन् ।
एन्फा एकेडेमीका उत्पादन विजयले करिब ७ बर्षपछि घरेलु लिगमा शनिबार पुनरागमन गरे ।
घरेलु फुटबलमा ब्रिगेडको लामो ईतिहास छैन । यसले जितेको पनि केही हैन । तर उसले नयाँ सिजन अनिल, उत्तम र विजयलाई समावेश गर्दै युवा खेलाडीले भरिएको टिम बनाएको छ । करिब ६ बर्ष पछि घरेलु लिगमा फर्किएका विजयले युवा टिमसँग मिलेर ब्रिगेडलाई यस सिजन रेलिगेशनबाट जोगाउनुपर्ने जिम्मेवारी छ ।
शनिबार आफ्नै पुरानो ट्रेडमार्क जर्सी नम्बर ७ लगाएर विजय लिगमा देखिए । प्लेईङ सेटमै मैदान छिरेका उनले फिटनेशमा सुधार गर्नुपर्ने देखे ।
‘धेरै समय पछि लिगमा फर्किएको छु । पहिलो दिन राम्रोनै भन्नुपर्छ । फिटनेश कम भयो । धेरै पछि खेल्दा केही अप्ठ्यारो महशुस गरे ।’ खेलपछि उनले भने ।
शनिबारबाट सुरु सहिद स्मारक ए डिभिजन लिगको उद्घाटन खेलमा ब्रिगेडले पहिलो खेलमा मछिन्द्रसँग खेल्यो । उपाधि जित्ने लक्ष्य सहित घरेलु फुटबलका अधिकांश स्टार खेलाडी अनुबन्धन गरेको मछिन्द्रले ब्रिगेडलाई २–० ले हरायो ।
सुरुवाती सेटमै रहेर विजयले खेलको सुरुवात गरेका थिए । उनलाई ८१ औं मिनेटमा उत्तम गुरुङले स्थानान्तरण गरे ।
विजयले युवा खेलाडीले सुरुमै बलियो टिमसँग खेल्दा लय नसमातेको र खेल्न गाह्रो भएको प्रतिक्रिया दिए ।
‘जुनियर भाईहरु छन् । सुरुवात भएको छ, लयमा आउन केहि समय लाग्छ । सुरुवातमै बलियो टिम पर्दा गाह्रो भयो ।’ उनी भन्छन् ।
मनाङले २०७० सालमा सातौ पटक ए डिभिजन लिग जित्दा थ्रीस्टारबाट खेलेका विजयले त्यसयता लिग खेलेका छैनन् । गत बर्षमात्र रोकिएको लिग सुचारु भयो । तर विजय खेल्न आएनन् ।
७२ मा सम्पन्न भएको राष्ट्रिय लिग थ्रीस्टारलाई जिताउन विजयले महत्वपुर्ण भुमिका खेलेका थिए ।
अन्तिम खेलमा उनी म्यान अफ दि म्याच पनि भएका थिए । तर त्यसपछि उनी फुटबल मैदान बाहिर छन् ।
उनी यसपटक समेत फुटबलमा नआउने सोचमा थिए । धेरै समय उनी फुटबलबाट बाहिर रहे । फिटनेशले साथ नदिने उनमा आशंका थियो ।
उनले लिगका बारेमा सोचेका पनि थिएनन् । तर राष्ट्रिय फुटबल टिमका पुर्व कप्तान अनिल गुरुङले फोन गरेर उनलाई लिग खेल्न अनुरोध गरे । विजयीले हुदैन भन्न सकेनन् । अनिल र विजय दुवै पोखराका हुन् । एउटै टोलमा बस्ने दुवै राष्ट्रिय फुटबल टिमका पुर्व सदस्य हुन् ।
‘मैले लिग खेल्ने सोचमै थिईन । नखेल्ने भनेर बसेको थिए । अनिलले दाई आउनुपर्छ, युवा टिम छ, अनुभवी छैनन् भनेर आग्रह गर्यो ।’ ब्रिगेड आउनुको कारण उनले खुलाए ।
बिजयले चौथो क्लबको रुपमा ब्रिगेड रोजेका हुन् । यसअघि विजयले फ्रेन्ड्स, थ्रीस्टार र मनाङबाट खेलेका थिए । ए डिभिजन लिगमा विजयको यात्रा फ्रेण्ड्सबाट सुरु भयो ।
एकसिजन फ्रेण्ड्सबाट खेलेपछि उनी थ्री स्टार लागे । अनि मनाङलाई गन्तव्य बनाए । मनाङमा खेलेपछि उनी पुन थ्री स्टार फर्किए । त्यसपछि करिब १० बर्ष उनी थ्री स्टारबाट खेले । फुटबल करियरको उत्तारार्धमा उनी ब्रिगेड पुगेका छन् । जुन क्लबबाट उनकै गृहबासी अनिलले फुटबल करियर सुरु गरेका थिए ।
ब्रिगेड फर्किएका विजयको कुनै ठुलो आश छैन । मात्र अनिलको शब्द काट्न नसकेर आएका हुन् । हुन त फुटबल उनको प्यासन हो । त्यही प्यासनले उनले गत पुसमा इरानमा भएको एएफसी फुटसल च्याम्पियनसिप छनोट खेलेका थिए ।
ब्यक्तिगत रुपमा कुनै ठुलो लक्ष्य नभएपनि ब्रिगेडलाई लिगको शीर्ष ६ भित्र राख्ने विजयको प्रतिबद्वता छ ।
युवा खेलाडीले भरिएको ब्रिगेडलाई तीन पोखरेली (अनिल गुरुङ, विजय गुरुङ, उत्तम गुरुङ)को अनुभवमा ए डिभिजनमा टिक्नु छ ।
‘हामीसँग अझै समय छ, तयारी गर्छाै । लयमा आउँछौं । विस्तारै राम्रै गछौं ।’ विजय आशावदी देखिन्छन् ।
-1756819320.jpg)
