जगदीशको दाबी – भलिबलमा स्वर्ण पदक लगाउँछौ

काठमाडौं । राष्ट्रिय महिला भलिबल टिमका मुख्य प्रशिक्षक जगदीश भट्टले सागको फाईनलमा भारतविरुद्व बिना दबाब खेलेर स्वर्ण जित्ने बताएका छन् ।

नेपालमा आयोजना भएको १३ औं दक्षिण एसियाली खेलकुद सागको फाइनल पुगेको नेपाली टिमका मुख्य प्रशिक्षक भट्टले भारतविरुद्व बिना दबाब खेल्ने बताएका हुन् ।

'भोलि बिना दबाब खेल्दै स्वर्ण पदकका लागि भारतसंग खेल्नेछौ ।' उनले भने ।

उनले भारतविरुद्व जित्न नेपाललाई करिब ९० प्रतिशत मौका रहेको दाबी गरे ।

‘श्रीलंकासँग नजितेको भए कास्यका लागि खेल्नुपथ्र्यो । तर हामीले जितेका छौ । रजत पदक आईसकेको छ । अब भित्तामा स्वर्ण छ । अब रजत पदक फालेर स्वर्ण घाँटीमा लगाउनुछ । अब केही समस्या छैन ।’ उनले भने ।

उनले फाइनल खेल्न खेलाडीहरु मानसिक रुपमा तयार भएको बताए ।

‘खेलाडीहरु मानसिक रुपमा तयार भैसकेका छन् । भारतलाई हराउने रणनीति बनाएका छौ । त्यसमा सफल हुुदै खेल जित्छौ ।’ उनले थपे ।

प्रशिक्षक भट्टले भारतको खेल आफुले नियालिरहेको बताउँदै नेपालको सर्भिस बलियो भएमा भारतलाई हराउन सजिलो हुने बताए ।

नेपालले महिला भलिबलको फाईनलमा भोली भारतसंग प्रतिस्पर्धा गर्दैछ ।

दक्षिण एसियाली महिला भलिबलमा बलियो भारतलाई हराउँदै नेपालले स्वर्ण जित्ने लक्ष्य राखेको छ ।