काठमाडौं । एकदिवसीय अन्तराष्ट्रिय क्रिकेटको डेब्यु खेलमा नेपाल नेदरल्याण्डसंग ५५ रनले पराजित भएको छ ।
आईसीसीबाट एकदिवसीय राष्ट्रको मान्यता पाएपछि खेलिएको पहिलो खेलमा नेपाल नेदरल्याण्डसंग पराजित भएको हो ।
हारसंगै नेपालले एकदिवसीय अन्तराष्ट्रिय क्रिकेटमा पाइला चालेको छ । अब नेपालले शुक्रबार घरेलु टोलीसंग दोस्रो खेल खेल्दै छ ।
भीआरए क्रिकेट मैदानमा नेदरल्याण्डले दिएको १ सय ९० रनको लक्ष्य पछ्याएको नेपालले ४१ दशमलव ५ अाेभरमा अलआउट हुँदै १३४ रन मात्र बनाउन सक्यो ।
ओपनर ज्ञानेन्द्र मल्लले ५१ र दिपेन्द्र सिंह ऐरीले ३३ रन बनाउनु बाहेक अन्यको प्रर्दशन गतिलो रहेन । ज्ञानेन्द्र एकदिवसीय अन्तर्राष्ट्रिय क्रिकेटमा अर्धशतक बनाउने पहिलो नेपाली खेलाडी समेत बने ।
मल्लले अनिल कुमार साहसंग मिलेर ५८ रनको साझेदारी गर्दै नेपालले गतिलो सुरुवात दिलाएका थिए ।
तर, ५८ रनमा पहिलो विकेटको रुपमा शाहलाई गुमाएपछि नेपालको व्याटिङ लाईन धरासायी बनेको थियो ।
शाह २१ रनमा आउट हुदाँ कप्तान पारस खड्काले १२ रन मात्र बनाउन सके ।
आरिफ शेख, बसन्त रेग्मी र सोमपाल कामी शुन्य रनमा पेविलियन फर्किएका थिए ।
शक्ति गौचन ९ रनमा अविजित रहदा शरद भेषवाकर ४ रनमा आउट भए । शरद फिल्डीङको दौरान हातमा चोट बोकेपछि पुछारमा ब्याटिङ गर्न आएका थिए ।
नेपाललाई सस्तैमा समेट्न नेदरल्याण्डका फ्रेड क्लासेन, माइकल रिप्पोन र पिटर सिलरले समान ३/३ विकेट लिए ।
यसअघि, टस जितेर पहिले ब्याटिङ्ग गरेको नेदरल्याण्डले ४७ ओभर ४ बलमा अलआउट हुँदै १८९ रन बनाउन सक्यो ।
नेदरल्याण्डका माइकल रिप्पोनले ५१ रनको अर्धशतकीय पारी खेलेका थिए ।
यस्तै, बास डी लिडले ३०, स्टेफेन माईबर्गले २९, बेन कुपरले २०, स्कोट एडवार्डले १८ रन जोड्दा फ्रेड क्लासेनले ११ रनमा अाउट भएका थिए ।
नेपालका कप्तान पारस खड्काले किफायती बलिङ गरे । पारसले १० ओभर बलिङ गर्दै २६ रन खर्चेर ४ विकेट लिए ।
यस्तै सोमपाल कामीले ३ विकेट लिए । नेपालका सन्दीप लामिछाने, करण केसी र बसन्त रेग्मीले एक एक विकेट लिए ।
गत फेब्रुअरीमा जिम्बावेमा भएको विश्वकप छनोटबाट अन्तर्राष्ट्रिय क्रिकेट परिषद (आईसीसी) बाट एकदिवसीय अन्तर्राष्ट्रिय राष्ट्रको मान्यता पाएपछि नेपालले डेब्यु खेल खेलेको हो ।
छनोटमा एसोसिएटतर्फ उत्कृष्ट तीन टोलीमा रहेर नेपालले ऐतिहासिक सफलता पाएको थियो । चार बर्षको लागि नेपालले पाएको मान्यता यहीँ जुलाईबाट लागु भएको हो ।
नेपालले एसोसियट राष्ट्रको मान्यता पाएको २२ बर्षपछि एकदिवसीय राष्ट्रको मान्यता पाएको हो । सन् १९९६ मा एसोसियट राष्ट्रको मान्यता पाएको नेपाल सन् १९८८ मा आईसीसीको सदस्य बनेको थियो ।
नेपालले एकदिवसीय मान्यता पाएपछि नेदरल्याण्डले ऐतिहासिक क्षणको लागि आथित्यमा प्रदान गरेको हो ।
नेदरल्याण्डविरुद्धको दुई सिरिजपछि नेपालका भेट्रान स्पिनर शक्ति गौचनले सन्यास लिनेछन् ।
-1746268248.JPG)
-1746264449.JPG)
