महेशले लिए ८ बलमा ५ विकेट

काठमाडौं। फिनल्यान्डका तीव्र गतिका बलर महेश ताम्बेले टी–२० अन्तर्राष्ट्रिय क्रिकेटमा सबैभन्दा कम बलमा ५ विकेट लिने कीर्तिमान बनाएका छन्। 

उनले इस्टोनियाविरुद्ध खेलिएको तेस्रो टी–२० अन्तर्राष्ट्रिय खेलमा जम्मा ८ बलमा ५ जना ब्याटरलाई पभिलियन फर्काउँदै नयाँ कीर्तिमान बनाएका हुन्। यसअघि यो कीर्तिमान बहराइनका जुनैद अजीजको नाममा थियो, जसले सन् २०२२ मा जर्मनीविरुद्ध १० बलमा ५ विकेट लिएका थिए। 

ताम्बेले आइतवार सम्पन्न तेस्रो टी–२० खेलमा इस्टोनियाविरुद्ध सानदार प्रदर्शन गर्दै उक्त उपलब्धि हासिल गरेका हुन्। खेलमा फिनल्यान्डले पहिले बलिङ गर्दै इस्टोनियालाई १९.४ ओभरमा १४१ रनमा समेटेको थियो। इस्टोनियाले एक समय २ विकेटको क्षतिमा १०४ रन बनाइसकेको थियो र ठूलो स्कोरको सम्भावना देखिएको थियो। 

तर, त्यसपछि मैदानमा आएका ताम्बेले स्टेफन गूच, साहिल चौहान, मुहम्मद उस्मान, रुपम बरुआ र प्रणय गीवालालाई आउट गर्दै ५ विकेट लिए। योसँगै इस्टोनियाको इनिङ्स ध्वस्त भयो।

ताम्बेले जम्मा २ ओभरमा १९ रन खर्चेर ५ विकेट लिए, जसमध्ये ५ विकेट त उनले १.२ ओभर (८ बल)मै लिएका हुन्। त्यसपछि फिनल्यान्डले १४२ रनको लक्ष्य १८.१ ओभरमा ५ विकेटको क्षतिमा पूरा गर्दै खेल ५ विकेटले जित्यो। 

फिनल्यान्डका लागि अर्विन्द मोहनले ६० बलमा नटआउट ६७ रन बनाएर जितमा निर्णायक भूमिका खेले। उनले फराज मेहती अब्बास (१९ रन) र जोर्डन ओ’ब्रायन (१८ रन) सँग महत्त्वपूर्ण साझेदारी गर्दै टोलीलाई जिताए।

यो जितसँगै फिनल्यान्डले तीन खेलको टी–२० सिरिज २–१ ले आफ्नो पक्षमा पार्‍यो। यसैबीच, इस्टोनियाका साहिल चौहान टी–२० अन्तर्राष्ट्रियमा सबैभन्दा छिटो शतक बनाउने खेलाडी हुन्। 

उनले सन् २०२३ मा साइप्रसविरुद्ध मात्र २७ बलमा शतक प्रहार गरेका थिए। अब ताम्बेले पनि इस्टोनियाविरुद्ध सबैभन्दा छिटो ५ विकेट लिँदै अर्को कीर्तिमान बनाएका छन्।