काठमाडौं । नेपालको ऐतिहासिक एकदिवसीय क्रिकेट खेल टेलिभिजनबाट लाइभ हेर्न सकिने भएको छ । नेपालले एकदिवसीय क्रिकेटको ऐतिहासिक डेब्यु खेल नेदरल्याण्डसंग खेल्दै छ ।
नेपाल र नेदरल्याण्डबीचको एकदिवसीय सिरिज बुधबार र शुक्रबार हुनेछ । र, उक्त खेल कान्तिपुर टेलिभिजन एचडीले प्रत्यक्ष प्रसारण गर्ने भएको छ । कान्तिपुर मिडिया ग्रुपका अध्यक्ष कैलाश सिरोहियाले सोमबार सामाजिक संजाल ट्वीटरबाट नेपाल र नेदरल्याण्डबीचको खेल प्रत्यक्ष प्रसारण हुने जानकारी गराएका हुन् ।
अन्तर्राष्ट्रिय क्रिकेट परिसद (आइसीसी) बाट एकदिवसीय राष्ट्रको मान्यता पाएपछि नेपालले नेदरल्याण्डसंग डेब्यु खेल खेल्न लागेको हो । एमस्ट्राडममा हुने दुवै खेल नेपाली समय अनुसार २:४५ मा सुरु हुनेछ ।
नेदरल्याण्डसंगको ऐतिहासिक एकदिवसीय खेलपछि नेपालका भेट्रान स्पिनर शक्ति गौचनले सन्यास लिनेछन् । शक्तिले नेपालमै यो खेल अन्तिम खेल हुने बताईसकेका छन् ।
यसअघि क्रिकेट नेदरल्याण्डले दुवै खेल अनलाइनबाट प्रत्यक्ष प्रसारण गर्ने जनाएको थियो । क्रिकेट नेदरल्याण्डले लिभब्रोडकाष्टबाट नेपाल र नेदरल्याण्डबिचको खेल हेर्न सकिने बताएको थियो ।
