बंगलादेशले हरेक महिना एउटा अन्तर्राष्ट्रिय मैत्रीपूर्ण खेल खेल्ने

काठमाडौं। आगामी वर्ष अस्ट्रेलियामा हुने एएफसी महिला एसियन कप खेल्न लागेको बंगलादेशले तयारी तीव्र बनाउन हरेक महिना कम्तीमा एउटा अन्तर्राष्ट्रिय खेल आयोजना गर्ने योजना सार्वजनिक गरेको छ।

बंगलादेश फुटबल महासंघ (बीएफएफ) महिला समिति अध्यक्ष तथा एएफसी कार्यकारी समितिका सदस्य महफुजा अख्तर किरोनले मंगलबार बीएफएफ हाउसमा आयोजित कार्यक्रममा यो जानकारी दिइन्। 

सोमबार सार्वजनिक भएको ड्र अनुसार बंगलादेश ‘बी’ समूहमा परेको छ। यो समूहमा ९ पटकको च्याम्पियन चीन, उत्तर कोरिया र उज्बेकिस्तानजस्ता कठिन प्रतिद्वन्द्वीहरूसँग प्रतिस्पर्धा गर्नुपर्नेछ। यो प्रतियोगिता मार्च १ देखि अस्ट्रेलियाका तीन सहरमा सुरु हुनेछ।

किरोनका अनुसार क्याम्प सेप्टेम्बरदेखि सुरु गर्ने योजना छ। स्विडेनमा बसोबास गर्दै आएकी १९ वर्षीया फरवार्ड अनिका सिद्दीकी पनि क्याम्पअघि ट्रायलका लागि बंगलादेश आउने सम्भावना छ।

‘हाम्रो लक्ष्य सेप्टेम्बरदेखि सिनियर क्याम्प सुरु गर्ने हो, अनि त्यसपछि हरेक महिनामा कम्तीमा एक अन्तर्राष्ट्रिय खेल खेल्ने हो,’ किरोनले भनिन्, ‘तर, योजना अनुसार सबै कुरा जान नपनि सक्छ, किनकि हामीले सोचेका प्रतिद्वन्द्वीहरूसँग पनि आफ्नै ब्यस्त कार्यक्रम छन्।’

बीएफएफ अध्यक्ष तविथ अवालबाट स्वीकृति पाएपछि किरोनले जापान र दक्षिण कोरियाको फुटबल संघलाई एक–एक महिनाको प्रशिक्षण क्याम्प तथा दुई–दुई मैत्रीपूर्ण खेलका लागि प्रस्ताव पठाएको जानकारी दिइन्।

दक्षिण कोरियाले घरेलु लिग र एसियन कप तयारीका कारण बंगलादेशलाई समय दिन नसक्ने जानकारी दिएको छ। ‘उनीहरूको टोली सेप्टेम्बरदेखि मार्चसम्म युरोपमा हुनेछ,’ किरोनले भनिन्,‘जापानबाट भने अहिलेसम्म जवाफ आएको छैन, तर हामी आशावादी छौं।’

किरोनले समूहमा नरहेका शीर्ष एसियाली टिम र स्पेनजस्ता युरोपेली टोलीसँग पनि सम्पर्क राख्ने योजना रहेको बताइन्। ‘हामी समय खेर फाल्न चाहन्नौं। हाम्रो टोलीलाई तयार पार्न सकिने हरेक सम्भावना प्रयोग गर्नेछौं,’ उनले भनिन्।

उनका अनुसार अन्तिम खेल तालिका अन्य टोलीको तालिकासँग मिलाएर निर्धारण गरिनेछ। उनले भनिन्,‘हामी मार्चसम्म यो तयारी कार्यक्रम निरन्तर चलाउन चाहन्छौं र हरेक महिनामा कम्तीमा एक खेल सुनिश्चित गर्न चाहन्छौं।’

उनले बंगलादेशले भएको समूहलाई कठिन होइन, अवसरको रूपमा लिएकी छन्। ‘हामीलाई बलिया प्रतिद्वन्द्वीहरूसँग खेल्ने मौका विरलै मिल्छ। अन्तिम चरणमा प्रतिस्पर्धा गर्नु भनेको हामी कहाँ छौं भनेर बुझ्ने अवसर हो। यो सिक्ने समय हो र धेरै कुरा बुझेपछि मात्र सुधार सम्भव हुन्छ,’ उनले भनिन्।

किरोनले महिला राष्ट्रिय टिमको तयारी योजना सफल बनाउन निजी क्षेत्र र कर्पोरेट घरानाहरूलाई आर्थिक सहयोग गर्न अपिल पनि गरेकी छन्।