उपाधिले बिर्सिएका एमबाप्पे

काठमाडौं। करिब दुई वर्षअघि किलियन एमबाप्पे फ्रान्सेली क्लब पेरिस सेन्ट–जर्मेन (पीएसजी) छोडेर रियल मड्रिडमा सरुवा भएका थिए। उनको मुख्य लक्ष्य च्याम्पियन्स लिग जित्ने थियो।

तर, फ्रान्सका कप्तान र च्याम्पियन्स लिगकै सबैभन्दा सफल क्लब अझै पनि त्यो उपाधिको प्रतीक्षामा छन्। यसैबीच, उनको प्रस्थानलगत्तै पीएसजीले च्याम्पियन्स लिग ट्रफी जित्यो। यो सिजन पनि पीएसजी सेमिफाइनलमा पुगेको छ।

बुधबार क्वार्टरफाइनलमा बायर्न म्युनिखसँग पराजित भएपछि एमबाप्पेको पहिलो युरोपेली उपाधि जित्ने आशा फेरि समाप्त भयो। इतिहासकै सबैभन्दा चर्चित सरुवामध्ये एक मानिएको एमबाप्पेको आगमनपछि रियल लगातार दोस्रो सिजन ठूलो उपाधिविहीन हुने संघारमा छ।

सन् २०२४ मा यूईएफए सुपर कप र इन्टरकन्टिनेन्टल कप जित्नुबाहेक एमबाप्पेसँग रियलले अन्य सफलता हासिल गर्न सकेको छैन। उनी आएयता स्पेनमा पनि कुनै उपाधि जित्न सकेको छैन।

यस सिजन अब बाँकी रहेको एकमात्र सम्भावना ला लिगा हो। तर, सात खेल बाँकी रहँदा रियल शीर्ष स्थानको बार्सिलोना भन्दा ९ अंकले पछाडि छ।

एमबाप्पेले गोल गरे पनि केही समर्थकबाट आलोचना खेपिरहेका छन्। च्याम्पियन्स लिगमा पुनः असफल भएपछि उनीमाथिको दबाब अझ बढ्ने देखिन्छ।

च्याम्पियन्स लिग

२०२४–२५ सिजनमा रियलबाट पहिलो पटक खेलेका एमबाप्पेले ७ गोल गरे, जुन शीर्ष स्कोररभन्दा ६ गोल कम थियो। डिफेन्डिङ च्याम्पियन रियल क्वार्टरफाइनलमै इङ्लिस प्रिमियर लिग क्लब आर्सनलसँग पराजित भयो।

यस सिजन भने उनले १५ गोल गर्दै शीर्ष स्कोरर बने। यो रियलकै पूर्वस्टार क्रिस्टियानो रोनाल्डोको एक सिजनमा १७ गोलको कीर्तिमानभन्दा दुई गोल कम हो। बायर्नसँगको ४–३ को हारमा पनि उनले गोल गरेका थिए।

स्पेनिस लिग (ला लिगा)

२०२४–२५ सिजनमा उनले ३१ गोल गर्दै शीर्ष स्कोरर बने। यो क्याटलन बार्सिलोनाका रोबर्ट लेवान्डोव्स्कीभन्दा ४ गोल बढी थियो। तर, रियल तालिकामा ४ अंकले पछाडि रह्यो।

यस सिजन पनि उनले २३ गोल गर्दै अग्रता लिएका छन्, जुन मल्लोर्काका वेदात मुरिकी भन्दा २ गोल बढी हो। तर, पछिल्ला खेलमा कमजोर प्रदर्शनले रियल बार्सिलोनाभन्दा पछाडि परेको छ।

कोपा डेल रे

गत सिजन रियल सेमिफाइनलमा रियल सोसिएडाडलाई हराएर फाइनल पुगेको थियो। तर, बार्सिलोनासँग ३–२ ले पराजित भयो। उक्त खेलमा एमबाप्पेले गोल गरेका थिए।

यस सिजन भने दोस्रो डिभिजनको अल्बासेटेसँग अन्तिम १६ मा नै स्तब्ध बन्यो। यो हार प्रशिक्षक जाभी अलोन्सोलाई हटाएर अल्भारो आर्बेलोआलाई नियुक्त गरेलगत्तै भएको थियो।

स्पेनिस सुपर कप

२०२५ को फाइनलमा एमबाप्पेले गोल गरे पनि रियल बार्सिलोनासँग ५–२ ले पराजित भयो। यस सिजन पनि फाइनलमा बार्सिलोनाले ३–२ ले जित्दै रियललाई फेरि हरायो।