पाक्वेटाले पाए स्पट फिक्सिङमा सफाइ
काठमाडौं। इङ्ल्यान्ड फुटबल संघ (एफए)ले वेस्ट ह्याम युनाइटेडका ब्राजिली मिडफिल्डर लुकास पाक्वेटालाई स्पट फिक्सिङको मुद्दामा निर्दोष ठहर गरेको छ।
क्लबले बिहीबार विज्ञप्ति जारी गर्दै स्वतन्त्र नियामक आयोगले उनलाई चार वटा गम्भीर आरोपबाट मुक्त गरेको जानकारी दिएको हो। एफएले उनलाई सन् २०२२ को नोभेम्बरमा लेस्टर सिटीविरुद्ध र सन् २०२३ मा एस्टन भिल्ला, लिड्स युनाइटेड र बोर्नमाउथविरुद्ध खेलेका खेलहरूमा जानाजानी रेफ्रीबाट कार्ड खान प्रयास गरेको र त्यसमार्फत सट्टेबाजी बजारलाई प्रभावित पार्न खोजेको आरोप लगाएको थियो।
यी आरोप पुष्टि भएको भए पाक्वेटाले आजीवन प्रतिबन्धको सामना गर्नु पर्ने थियो। तर, पाक्वेटाले सधैं आफ्नो निर्दोषिता दोहोर्याउँदै आएका थिए र सुनुवाइपछि स्वतन्त्र आयोगले आरोप प्रमाणित नभएको ठहर गर्यो।
यद्यपि, एफएले भने पाक्वेटाले अनुसन्धानमा सहकार्य नगरेको भन्दै दुईवटा छुट्टै आरोप प्रमाणित भएको जनाएको छ। ती आरोपको सन्दर्भमा उचित कारबाहीबारे आयोगले चाँडै निर्णय लिनेछ। उनी सन् २०२२ मा वेस्ट ह्याममा आबद्ध भएका थिए।
