एजेन्सी । इटालियन क्लब युभेन्ट्सका स्टार स्ट्राइकर क्रिस्टियानो रोनाल्डोले हालै करियरको ७ सयौं गोल पुरा गरे ।
गत साता युरोकप छनोट अन्तर्गत युक्रेनविरुद्धको खेलमा गोल गर्दै पोर्चुगिज कप्तान रोनाल्डोले करियरको ७ सय गोल पुरा गरेका थिए ।
अहिलेसम्म करियरको ७०१ औं गोल गरिसकेका रोनाल्डोका लागि भने करियरको उत्कृष्ट गोल कुन हो त ? रोनाल्डोले हालै आफ्नो करियरको उत्कृष्ट गोलबारे खुलाएका छन् ।
रोनाल्डोले आफ्नो करियरको उत्कृष्ट गोल युभेन्ट्सविरुद्ध गरेको 'ओभर हेड किक' गोललाई मानेका छन् ।
'यदि तपाई मलाई मनपर्ने गोल छनोट गर भन्नु हुन्छ भने म युभेन्ट्सविरुद्धको गोल भन्न चाहन्छु किनकी यो गोल गर्न मैले वर्षौंबाट प्रयास गरिरहेको थिए,' रोनाल्डो फ्रान्स फुटबलसँग भने ।
स्पेनिस क्लब रियल मड्रिडमा रहदा रोनाल्डोले च्याम्पियन्स लिग खेल दौरान उक्त ओभर हेड गोल गरेका थिए ।
च्याम्पियन्स लिग अन्तर्गत क्वाटरफाइनलको पहिलो लेगमा रोनाल्डोले उसैको मैदानमा युभेन्ट्सविरुद्ध ओभर हेड गोल गरेका थिए । रियलले ३ – ० को जित निकालेको उक्त खेलमा रोनाल्डोले दुई गोल गरेका थिए ।
'मेरो करियरको त्यो सबैभन्दा राम्रो गोल थियो । यो शानदार थियो । यो गोल मेरो स्मृतिमा लामो समय रहने छ,' रोनाल्डोले थपे ।
रोनाल्डो गत सिजन भने रियल छाडेर टुरिन पुगेका थिए । उनलाई अनुबन्ध गर्न युभेन्ट्सले १०० मिलियन बढी खर्च गरेको थियो ।
यस्तै रोनाल्डोले करियरको ७ सय गोल गर्दा आफुलाई गर्व लागेको बताए ।
-1747226778.jpeg)
