काठमाडौं। आरएस रिसोर्ट एन्ड बिच फुटबल एन्फा महिला लिगमा छनोट भएको छ।
एन्फा महिला लिग छनोटअन्तर्गत च्यासल रंगशालामा बिहीबार सम्पन्न आफ्नो अन्तिम खेलमा स्टुडेन्स् फुटबल क्लबलाई ४–१ ले हराउँदै आफ्नो स्थान सुरक्षित गरेको हो।
आरएस रिसोर्टको जितमा सरिता विकेले दुई गोल गरे। विपना परियार र सलिना सरुको नाममा समान एक गोल रह्यो। स्टुडेन्स्की बसन्ती खुलालले एक गोल फर्काइन्।
खेलको पहिलो मिनेटमै विपनाले आरएस रिसोर्टलाई सुरुआती अग्रता दिलाएकी थिइन्। त्यसको आठ मिनेटपछि नै सरिताले अग्रता दोब्बर बनाइन्।
तर, २५औं मिनेटा बसन्तीले गोल फर्काउँदै खेल २–१ मा ल्याइन्। पहिलो हाफको इन्जुरी समयको तेस्रो मिनेटमा सरिताले व्यक्तिगत दोस्रो तथा टोलीका लागि तेस्रो गोल गर्दै अग्रता ३–१ मा पुर्याइन्।
दोस्रो हाफको इन्जुरी समयको तेस्रो मिनेटमा सलिनाले अर्को गोल थप्दै आरएस रिसोर्टको ४–१ को सहज जित पक्क गरिन्।
जितसँगै ६ खेलबाट १५ अंक जोडेको आरसी समूह ‘ए’ मा को शीर्ष स्थानमा उक्लिएको छ। ६ खेल नै खेलेको राप्ति एफसी १३ अंकसहित दोस्रो स्थानमा छ। चर्च ब्वाइजको भने १३ अंक छ। चर्च ब्वाइजसँग अन्तिम खेल खेल्न बाँकी रहेको छाहरी भने १० अंकसहित चौथो स्थानमा छ। त्यसले सोझै महिला लिगमा छनोट हुने अब एक टोलीको टुंगो भने चर्च ब्वाइज र छाहरीबीचको खेलको नतिजाले लगाउने भएको छ।
हरेक समूहबाट विजेता र उपविजेता गरेर दुई टोली सिधै महिला लिगमा छनोट हुनेछन्। बाँकी एक स्थानका लागि भने दुवै समूहका तेस्रो टोलीबीच एक नकआउट खेल हुनेछ। उक्त खेलको विजेताले पाँचौं टोलीका रूपमा एन्फा महिला लिगमा स्थान बनाउने छन्। समूह ‘बी’ बाट संकटा क्लब यसअघि नै महिला लिगमा छनोट हुने पहिलो टोली बनिसकेको छ।
