काठमाडौं। म्यानचेस्टर सिटीमा जियानलुइजी डोनारुम्मा पुगेसँगै अब प्रिमियर लिगमा इटालीका ११ खेलाडीले प्रतिनिधित्व गर्ने भएका छन्।
डोनारुम्माले पेप गार्डिओलाको टोलीसँग करिब ३० मिलियन युरोको सम्झौता गरेका हुन्। योसँगै उनले सिटीमा पाँच वर्ष बिताउने भएका छन्। उनलाई पेरिस सेन्ट-जर्मेन (पीएसजी) ले ट्रान्सफर मार्केटमा राखेको थियो।
एसी मिलान पूर्वगोलरक्षक डोनारुम्मा यस सिजन प्रिमियर लिगमा आएका पाँच नयाँ इटालियनमध्ये एक हुन्। डिएगो कोप्पोलाले भेरोनाबाट ब्राइटनमा प्रवेश गरेका छन्।
युवा डिफेन्डर जियोभानी लियोनी लिभरपुल पुगेका छन्। निकोलो सावोनाले युभेन्ट्स छाडेर नटिङ्घम फरेस्टमा आवद्ध भए भने लिड्स युनाइटेड प्रिमियर लिगमा उक्लिएसँगै विल्फ्रेड ग्नोन्टो पुनः शीर्ष डिभिजनमा फर्किएका छन्।
रिकार्डो कालाफियोरी (आर्सनल), मिचेल कायोडे (ब्रेन्टफोर्ड), फेडेरिको चिएसा (लिभरपुल), सान्द्रो टोनाली (न्यूक्यासल), डेस्तिनी उडोगी र गुइलियेल्मो भिकारियो (टोटनह्याम) ले पनि प्रिमियर लिगमा खेलिरहेका छन्।
