प्रतिस्पर्धा बिनै उपाध्यक्षको ‘छोरा’ राष्ट्रिय टिममा

काठमाडौं । प्रारम्भिक टोलीमै नपरेका अखिल नेपाल फुटबल संघ एन्फाका वरिष्ठ उपाध्यक्ष पंकज नेम्वाङको छोरालाई राष्ट्रिय टिममा समावेश गरिएको खुल्न आएको छ ।

जोर्डनमा भएको यू–१६ एएफसी च्याम्पियनसिप छनोटमा प्रतिस्पर्धा र छनोट प्रक्रियामा समावेशनै नगरि एन्फा उपाध्यक्षका छोरा पाथ्युङहाङ नेम्वाङलाई राष्ट्रिय टिममा समावेश गरिएको खुल्न आएको हो ।

नेपालले सेप्टेम्बर १४ देखि २२ सम्म जोर्डनमा भएको एएफसीको छनोट प्रतियोगिता खेलेको थियो ।

प्रतियोगिताको दौरान खेलपाटी डट कमले योग्य खेलाडीलाई बाहिर राख्दै उपाध्यक्षको छोरालाई राष्ट्रिय टिममा घुसाईएको समाचार प्रकाशन गरेको थियो ।

तर प्रतियोगिता सकेर नेपाल फर्किए लगत्तै समाचारको खण्डन गर्दै तीन जना प्रशिक्षकले संयुक्त बिज्ञप्ती जारी गर्दै खेलाडी छनोट निष्पक्ष भएको जिकिर गरेका थिए ।

हेर्नस बिज्ञप्ती -

मुख्य प्रशिक्षक सुनीलकुमार श्रेष्ठ, प्रशिक्षक राजकुमार केसी र गोलकिपर प्रशिक्षक विनोद महर्जनले निकालेको संयुक्त बिज्ञप्तीको दलिल थियो, एमआरआई गर्दा गोलकिपर इश्वर गुरुङ, प्रदीप लम्साल र असिम राई बाहिरिएपछि बैकल्पिक खेलाडीमा रहेका खेलाडीहरु मध्यबाट पाथ्युङ्ग हाङ्ग नेम्वाङ, दिपेश राई र कृष्टल शाक्यलाई ९ दिनको ट्रेनिङबाट पुन छनौट गरि सहभागि गराईएको हो ।

तर एन्फाले एएफसी यू–१६ का लागि निकालेको प्रारम्भिक सुचिमा उपाध्यक्षका छोरा पाथ्युङ्गको नामनै छैन । पाथ्युङ्ग मात्र नभएर दिपेश र कृष्टलसमेत प्रारम्भिक सुचिमा छैनन् ।

हेर्नुस एन्फाकाे प्रारम्भिक ४२ सदस्यीय टाेली :

तीन जना खेलाडीलाई प्रतिस्पर्धा बिनै सिधै राष्ट्रिय टिममा समावेश गराएको तथ्य खुल्न आएको छ ।

एन्फा स्रोतका अनुसार आफ्नो छोरालाई राष्ट्रिय टिममा राख्न एन्फाका वरिष्ठ उपाध्यक्ष नेम्वाङले दबाब दिएका थिए । उनकै निर्देशनमा प्रराम्भिक टोलीमै नरहेका गोलकिपरमा पाथ्युङहाङ सहित तीन खेलाडीलाई राष्ट्रिय टोलीमा सिधै समावेश गरिएको हो ।

प्रशिक्षकको छनोट कमिटिले उमेर समुहको प्रतियोगितामा पहिलो रोजाईबाट खेल्दै आएका गोलकिपर रोशन नेपाललाई टिम बाहिर राख्दै खेलाडी छनोट गरेको थियो ।
गोलकिपर प्रशिक्षक बिनोद महर्जनले रोशनको उचाई कम भएको कारण उनलाई टिम बाहिर राखेको खेलपाटीलाई बताए ।

उनले खेल्न क्रममा गोलकिपर रोशनले चरम लापरबाही गरेको देखिएका कारण उनलाई टिम बाहिर राखेको समेत आरोप लगाए ।

'म्याच खेल्न जाँदा जर्सी नहुने । टिम लाईनअपमा हुदाँ गोलकिपर नहुने जस्तो घटना सुने । सोही कारण उसलाई टिममा नराखेको हो ।' महर्जनले खेलपाटीसंग भने ।

तर रोशनले एन्फा कम्प्लेक्समा बिहानै उठेर अभ्यास गरेको कारण देखाउँदै टिम बाहिर राखेको जानकारी आफुले पाएको खेलपाटीस‌‌ग बताएका थिए ।

प्रशिक्षकको प्रष्टिकरण

यु–१६ टिमका गोलकिपर प्रशिक्षक बिनोद महर्जनले सहजताका आधारमा एन्फा उपाध्यक्षको छोरालाई राष्ट्रिय टिममा राखिएको प्रष्टिकरण दिएका छन् ।

'पाँच जना खेलाडीमा दुई जना एमआरआईमा बढी उमेरका देखिए । समय कम थियो । सहजताका आधारमा पाथ्युङ्गलाई टिममा राखेको हुँ ।' उनले भने, 'खेल्न नजान्ने भएपनि उचाई भएका खेलाडीलाई लिनु भन्ने निर्देशन थियो ।'

प्रशिक्षक महर्जनले पाथ्युङहाङ भन्दा रोशनको खेल राम्रो भएको स्विकार गरे । तर उचाईका आधारमा पाथ्युङहाङलाई राष्ट्रिय टिममा राखिएको दाबी गरे ।

उपाध्यक्षको दबाब

एन्फा स्रोतका अनुसार उपाध्यक्ष पंकज नेम्वाङले दबाब दिएर प्रशिक्षकलाई झुटो बिज्ञप्ती निकाल्न बाध्य बनाएका हुन् । फुटबलमा आमुल परिवर्तनको नारा सहित एन्फा प्रवेश गरेका वरिष्ठ उपाध्यक्ष नेम्वाङ फुटबल संघभित्र फरक गुट बनाएर निर्णय प्रक्रियामा हाबी हुदै आएका छन् ।

उनकै निर्देशनमा प्रवक्ता किरण राईले तयार पारेको बिज्ञप्तीमा प्रशिक्षकलाई हस्ताक्षर गर्न लगाएर बिज्ञप्ती जारी गरिएको एन्फा स्रोत बताउँछ ।

उपाध्यक्षको निर्देशन अनुसार बिज्ञप्ती जारी गरेपछि बर्खास्तीको तयारीमा रहेका तीनै जना प्रशिक्षकको पद जोगिएको छ । एएफसी छनोट च्याम्पियनसिपमा खराब नतिजा निकालेपछि एन्फाले तीनै जना प्रशिक्षकलाई बर्खास्त गर्ने तयारी गरेको थियो ।

तर उपाध्यक्षको छोरालाई प्रतिस्पर्धा बिनै राष्ट्रिय टिममा राखेपछि तीन जना प्रशिक्षकको पद जोगिएको हो । जोर्डनमा भएको छनोटमा नेपाल घरेलु टोली र ताजकिस्तानसंग ७–० गोल अन्तरले पराजित भएको थियो । त्यस्तै कुवेतसंग १–१ को बराबरी खेलेको नेपालले श्रीलंकालाई ३–० ले हराएको थियो ।

जोर्डनमा लज्जास्पदक नतिजा आत्मसाथ गरेपछि एन्फाले सुनीलकुमार श्रेष्ठ, राजकुमार केसी र गोलकिपर बिनोद महर्जनलाई बर्खास्तको तयारी गरेको थियो । तर उपाध्यक्षलाई जोगाउने झुटो बिज्ञप्ती सार्वजनीक गरेपछि तीन जनाकै पद तत्कालका लागि जोगिएको एन्फा स्रोत बताउँछ ।

दबाबमा प्रशिक्षककाे राजीनामा 

उपाध्यक्ष नेम्वाङ सहित एन्फाका केही पदाधिकारीले साफ यू–१८ च्याम्पियनसिपमा नेपालको खराब नजिताको कारण देखाउँदै चेतनारायण श्रेष्ठलाई पद छाड्न दबाब दिएका थिए । नेपाल समुह चरणबाटै बाहिरिएपछि उपाध्यक्ष नेम्वाङको निर्देशनमा चेतनारायणलाई राजीनामा बुझाउन दबाब दिईएको थियो ।

श्रेष्ठले साफमा खराब नतिजा निस्किएनि एएफसी च्याम्पियनसिप छनाेटसम्म टिम हेर्न दिन उपाध्यक्ष समक्ष अनुरोध गरेका थिए । तर भुटानसंग समेत हारेको कारण देखाउँदै उनलाई बर्खास्त गर्ने चेतावनी उपाध्यक्षले दिएका थिए ।

अन्तिममा उपाध्यक्षको दबाबमा परेका श्रेष्ठ नैतिकताको आधारमा पदबाट राजीनामा दिएको बताएका थिए । मुख्य प्रशिक्षक श्रेष्ठसंगै प्रशिक्षक सरोज श्रेष्ठ र गोलकिपर छन्नुराम चौधरीलाई समेत पद छाड्न दबाब दिईएको थियो ।

सोही कारण तीनै जना प्रशिक्षककाे पद गुमिसकेकाे छ ।

खराब नतिजाका कारण यू–१८ टिमका तीनै जना प्रशिक्षकसंग राजीनामा मागेका वरिष्ठ उपाध्यक्ष नेम्वाङ आफ्ना छोरालाई प्रतिस्पर्धा बिनै राष्ट्रिय टिममा समावेश गरेको यू–१६ का प्रशिक्षकबारे मौन बसेका छन् ।

बाध्य बनाएर बिज्ञप्ती – एन्फा उपाध्यक्ष

एन्फा उपाध्यक्ष तथा टेक्निकल कमिटिका संयोजक कृण्ण थापा भने प्रशिक्षकलाई बाध्य बनाएर बिज्ञप्ती निकालिएको हुन सक्ने बताएका छन् । खेलाडी छनोटमा प्रशिक्षकले टेक्निकल कमिटि लगायत अन्य प्रशिक्षकसंग कुनै सल्लाह नगरिएको बताउँदै उनले दबाबमा आएर बिज्ञप्ती निकालेको देखिएको खेलपाटीसंग बताए ।

उनले खेलाडी छनोटको विवादका बिषयमा प्रशिक्षकले बिज्ञप्ती जारी गर्न नमिल्ने बताउँदै एन्फा र टेक्निकल कमिटिले मात्र आधिकारिक धारणा राख्न सक्ने बताए ।

खेलाडी छनोटमा प्रशिक्षकको गल्ती देखिएको बताउँदै उपाध्यक्ष थापाले हतास र डराएर प्रशिक्षकले बिज्ञप्ती निकालेको उल्लेख गरेका छन् ।

प्रशिक्षकको बिज्ञप्ती आँखामा छारो हान्ने गरि आएको उल्लेख गर्दै उनले गल्ती ढाकछोप गर्न नमिल्ने खेलपाटीलाई बताएका छन् ।

प्रवक्ता भन्छन् – सबै जिम्मेवारी प्रशिक्षकको हो ।

एन्फा प्रवक्ता किरण राई भने खेलाडी छनोटको सम्पुर्ण अधिकार प्रशिक्षकको रहेको बताए ।

एन्फाले सम्पुर्ण जिम्मेवारी प्रशिक्षकलाई दिएको बताउँदै उनले प्रशिक्षकले कोही पनि खेलाडी छनोट गर्न सक्ने जिकिर गरेका छन् ।