काठमाडौं । तेस्रो संस्करणको साफ यू-१८ च्याम्पियनसिप फुटबलमा नेपालमा जारी छ । हलचोकस्थित शसस्त्र प्रहरी बल एपीएफको मैदानमा जारी प्रतियोगिताको सेमिफाइनल समीकरण समेत पुरा भईसकेको छ ।
बुधबार भारत र श्रीलंकाबीचको खेलसँगै समूह चरणको खेल सकिएको थियो । र, सेमिफाइनल पुग्ने चार टोलीको तय भएको थियो ।
यस संस्करणमा भारत, बंगलादेश, माल्दिभ्स र भुटानले अन्तिम चारको यात्रा तय गरेका छन् । शुक्रबार हुने सेमिफाइनलमा भारतले माल्दिभ्स र बंगलादेशले भुटानसँग खेल्नेछ । दुई पटकको च्याम्पियन नेपाल भने समूह चरणबाटै बाहिरिएको छ ।
अघिल्ला दुई संस्करणमा जबर्जस्त प्रदर्शन गरेको नेपाल प्रतियोगिताबाट बाहिरिने पहिलो टिम समेत बनेको थियो । नेपालले सन् २०१५ र १७ मा भएको दुई संस्करणको उपाधि जितेको थियो ।
नेपाल घरेलु मैदानमा उपाधि जित्दै ह्याट्रिक गर्ने दाउमा थियो । तर, खराब प्रदर्शन गरेपछि नेपालको सपना तुहिएको थियो । हारसँगै प्रशिक्षक चेत नारायण श्रेष्ठले पदबाट राजीना नै दिएका थिए ।
समूह 'ए' को नेपालले मात्र १ अंक जोडेको थियो । यस समूहबाट भुटान समूह विजेता र माल्दिभ्स उपविजेताको रुपमा सेमिफाइनल पुगे ।
नेपाल प्रतियोगिताबाट बाहिरिएपछि साफ यू-१८ फुटबलले नयाँ च्याम्पियन पाउँदैछ । त्यसैले अब चार राष्ट्रलाई पहिलो पटक उपाधि हात पार्ने अवसर रहेको छ ।
सेमिफाइनल पुगेका चार वटै टिम उपाधिका लागि अब्बल देखिएका छन् । चार वटै टिमले समूह चरणमा जबर्जस्त प्रदर्शन गरेका थिए । तर, अघिल्ला संस्करणको नतिजा हेर्दा भारत र बंगलादेशलाई मुख्य दाबेदार मानिएको छ ।
सन् २०१५ मा भएको पहिलो संस्करणमा भारत फाइनल पुगेको थियो । तर, भारत आयोजक नेपालसँग पेनाल्टी सुटआउटमा पराजित भएको थियो । दोस्रो संस्करणमा भारत तेस्रो भएको थियो ।
तर, भारत तेस्रो सहभागितामा भने च्याम्पियन बन्ने योजनामा हुनेछ । भारत समूह 'बी' को विजेता समेत हो । समूह चरणमा भारतले श्रीलंकालाई हराउँदा बंगलादेशसँग बराबरी खेलेको थियो ।
भुटानमा भएको सन् २०१७ को साफमा बंगलादेश फाइनल पुगेको थियो । तर, बंगलादेश नेपालसँग हेड टु हेडमा पराजित भएको थियो । पाच देश सहभागी प्रतियोगिता राउण्ड रोविनको आधारमा खेलाईएको थियो । जसमा नेपाल र बंगलादेशको समान ९ अंक भएपनि नेपाल हेड टु हेडको आधारमा उपाधि हात पार्न सफल भएको थियो ।
यस पटक भने बंगलादेश उपाधि जितेर घर फर्कन चाहन्छ । बंगलादेशले समूह चरणमा आफुलाई प्रमाणित समेत गरेको छ । समूह 'बी' को उपविजेता बंगलादेशले भारतसँग बराबरी खेल्दा श्रीलंकालाई हराएको थियो ।
यता, भुटान र माल्दिभ्स भने अण्डर डग टिमको रुपमा रहेका छन् । समूह चरणमा दुवै टोलीले नेपालविरुद्ध सनसनी प्रदर्शन गरेको थियो । जसको कारण दुई पटकको च्याम्पियन नेपालको यात्रा समूह चरणबाटै सकिएको थियो ।
भुटानले नेपाललाई ३-० ले हराएको थियो । भुुटानले नेपाललाई दोस्रो संस्करण झै तेस्रो संस्करणमा पनि हराउन सफल रह्यो । भुटान प्रतियोगितामा नेपाललाई हराउने एक्लो टिम हो । तेस्रो संस्करणसम्म आउदा ९ खेल खेलेको नेपाल २ खेलमा मात्रै पराजित भएको छ । दुवै पटक नेपाल भुटानसँग पराजित भएको हो ।
भुटानले माल्दिभ्ससँग भने गोलरहित बराबरी खेलेको थियो । र, भुटान ४ अंक जोडेर समूह विजेता बनेको थियो । समूह चरणमा उच्च प्रदर्शन गरेको भुटान पहिलो पटक फाइनल पुग्दै उपाधि जित्न चाहन्छ । तर, अहिलेसम्म भुटानले फाइनलमा स्थान बनाउन सकेको छैन ।
माल्दिभ्सले पहिलो खेलमा नेपालसँग १-१ गोलको बराबरी खेलेको थियो । दोस्रो खेलमा भुटानसँग गोलरहित बराबरी खेल्दा माल्दिभ्स उपविजेता बन्दै सेमिफाइनलमा पुगेको हो । माल्दिभ्स पहिलो पटक सेमिफानल पुगेको हो । तर, यस संस्करणमा भने माल्दिभ्स उपाधि जित्न चाहन्छ ।
